ساياسات پەن ەكونوميكا قاشاندا قاتار دامۋعا ءتيىس. ءار سالاعا ءوز ىسىنە بەرىك, جان-جاقتى قابىلەتتى, دارىندى ءارى بىلىكتى مامان جەتەكشىلىك ەتۋى كەرەك. ەگەر بەلگىلى ءبىر كاسىپتى باسقارۋ ءوز ءىسىن بىلمەيتىن ادامعا بەرىلسە, كوپ نارسە ب ۇلىنەدى.
ەل ەكونوميكاسىن جەدەل تۇردە كوتەرمەسە بولمايدى. جىلدار بويى جيناقتالعان ۇلتتىق قور قاراجاتىن وڭدى-سولدى ىسىراپ ەتۋگە جول جوق. بۇرىن قورداعى قاراجات 300 ميلليارد دوللار ەدى, ال قازىر نەبارى 50 ميلليارد قانا قالعان. وسىلايشا, قوردى جەپ تاۋىسۋعا شاق قالدىق.
وزگە ەلدەردىڭ وزىق تاجىريبەسىن دە نازارعا الۋ قاجەت. مىسالى, قىتايدا ءبارى سايلانادى. پارتيا وعان ارالاسپايدى. باسشىلار سايلاناتىن بولعان سوڭ, وندا كىل مىقتىلار, دارىندى ماماندار ىرىكتەلىپ الىنادى. سولار ەلدى دامىتادى, ورگە سۇيرەيدى.
ەلىمىزدە بەلگىلى مىس كومبيناتى بار. ولار مەملەكەتكە جىلىنا 3 ميلليارد دوللار تابىس الىپ كەلەدى ەكەن. ەگەر سول ءونىمدى وڭدەپ, ساپالى دەڭگەيگە جەتكىزىپ, مىسالى, ۇلكەن سۇرانىسقا يە كابىل شىعارساق, وندا ءۇش ميلليارد ەمەس, 24 ميلليارد دوللار تابىس تابۋعا بولادى. بۇل جەردە عىلىمنىڭ ماڭىزى زور. عالىمدار مەن وقىمىستىلار ىزدەنىپ, ءار سالادا جاڭالىقتار اشۋعا ءتيىس. ەندىگى جەردە جاڭا ەكونوميكالىق ساياساتتى قولعا الۋ ماڭىزدى.
مەملەكەت عىلىمسىز دامىمايدى. وزىق تەحنولوگيا اۋاداي قاجەت. كرەاتيۆ, ياعني تىڭ يدەيالار ۇسىناتىن سىندارلى عىلىم, ونى دامىتاتىن بىلىكتى عالىمدار كەرەك. ەكىنشىدەن, ۇلتتىق ءداستۇردى, ەل بىرلىگىن مىقتاپ قولعا الىپ, اۋىزبىرلىكتى نىعايتۋ ماڭىزدى. ەكونوميكاسى شارىقتاپ دامىعان سينگاپۋر, جاپونيا, وڭتۇستىك كورەيا, گەرمانيا سىندى ەلدەردىڭ وركەندەۋى وسى بىرلىكتىڭ ارقاسىندا. مىسالى, كورەيلەر الەمنىڭ قاي تۇكپىرىندە جۇرسە دە, ءوز ەلى ءۇشىن قىزمەت ەتەدى. ولاردا پاتريوتتىق سەزىم مىقتاپ قالىپتاسقان. ال ءبىزدىڭ «بولاشاق» باعدارلاماسىمەن وقىعان جاستاردىڭ ءبىرازى اقش پەن ەۋروپا ەلدەرىندە قالىپ قويىپ, ءىز-ءتۇزسىز كەتەتىنى قىنجىلتادى. وسىعان وراي ەلىمىزدە ءبىلىمدى كادرلاردىڭ جەتىسپەۋشىلىگى بايقالادى. دەمەك قازاقستان ەكونوميكانى دامىتۋ ءۇشىن جوعارىدا ايتقان ەلدەر سەكىلدى بىرلىكتى نىعايتىپ, وركەندەۋ جولىنا تۇسۋگە ءتيىس.
مۇرات جۇرىنوۆ,
اكادەميك