بيىلعى جولداۋدىڭ بۇعان دەيىنگى قۇجاتتاردان كوپ ەرەكشەلىگى بار. ەڭ باستىسى, قۇجات ۋاقىتتىڭ ءوزى الدىمىزدان شىعارىپ وتىرعان كوپتەگەن كەزەك كۇتتىرمەس ماسەلەنى شەشۋ جولدارىن قامتىعاندىعىمەن قۇندى. سونىڭ ىشىندە ەڭ الدىمەن, ەكونوميكا سالاسىنداعى كۇردەلى ماسەلە قوزعالىپ وتىر.
پرەزيدەنت العا قويىپ وتىرعان مىندەتتەردى شەشۋ ءۇشىن ءوز ءىسىنىڭ مامانى, بىلىكتى كادرلار كەرەك ەكەنى ءسوزسىز. وسىعان وراي كەيىنگى كۇندەرى ەلىمىزدە كادرلىق اۋىس-ءتۇيىس بولىپ جاتىر. مۇنىڭ ءبارى جولداۋدا ايتىلعان تاپسىرمالاردى ورىنداۋ ءۇشىن جاسالىنىپ جاتقان العاشقى قادام دەپ تۇسىنەمىن. دەگەنمەن مەملەكەت باسشىسى قاسىم-جومارت كەمەل ۇلى حالىقتىڭ ءال-اۋقاتى كوتەرىلىپ, كەلەشەگى جارقىن بولۋى ءۇشىن ادال ازاماتتاردىڭ ەل تۇتقاسىن ۇستاۋى تۋرالى ايتتى. وعان كوپ ادام نازار اۋدارماعان سىڭايلى. بارلىق رەفورمانىڭ ءساتتى جۇزەگە اسۋى ءۇشىن ءوز ءىسىن شەبەر مەڭگەرگەن كادرلاردىڭ كەرەكتىگى ءوز الدىنا, ەڭ الدىمەن ولار قىزمەتىنە جانە ەلىنە ادال ازاماتتار بولعانى ماڭىزدى.
ادالدىق دەگەننەن كەلىپ شىعاتىن تاعى ءبىر وزەكتى ماسەلە بار. جولداۋدا كوپ باستاما كوتەرىلدى, كەلەلى ولار ايتىلدى. مۇنداي جاقسى باستامالار بۇعان دەيىنگى جولداۋلاردا دا ايتىلعانىن بىلەمىز. بىراق سونىڭ كوبى ورىندالعان جوق. نەگە؟ ويتكەنى وعان قوعامدى جايلاعان جەمقورلىق مۇمكىندىك بەرمەدى. رەفورمالاردىڭ ادىمىن اشتىرمادى. سوندىقتان ءبىز ەل ومىرىنە جاۋاپتى تۇتقالارعا ادال ازاماتتاردى اكەلىپ, سىبايلاس جەمقورلىق ىندەتىن ءبىرجولا شەشىپ الماي, جولداۋدا ايتىلعان سوزدەر سول ءسوز كۇيىندە قالا بەرەتىن بولادى. سەبەبى حالىقتىڭ جاعدايىن ەمەس, الدىمەن ءوزىنىڭ جەمساۋىن ويلايتىن شەنەۋنىكتەر ءارتۇرلى سەبەپ تاۋىپ, مەملەكەت باسشىسى ۇسىنىپ وتىرعان رەفورمالاردىڭ جۇزەگە اسۋىنا كەدەرگى كەلتىرەدى.
پرەزيدەنت ايتىپ كەلە جاتقان «ادال ازامات» ۇعىمىنىڭ ماڭىزى زور. ادىلدىك بار جەردە بەرەكە بولادى, بىرلىك ارتادى.
ورالباي ابدىكارىموۆ,
مەملەكەت جانە قوعام قايراتكەرى