بايقاپ وتىرساق, ۇلتتىق بەينەلەۋ ونەرىنىڭ نەبىر مايتالماندارى وتباسى, اۋلەت, تەك تاقىرىبىندا تاماشا تۋىندىلار قالدىرعان. ماسەلەن, ءابىلحان قاستەەۆتىڭ «انا», قاناپيا تەلجانوۆتىڭ «جامال», ساليحيتدين ايتباەۆتىڭ «باقىت», گۇلفايرۋس يسمايلوۆانىڭ «وتباسىمەن اۆتوپورترەت», جۇماقىن قايرامباەۆتىڭ «اكە پورترەتى» سىندى تۋىندىلارى – قايتالانباس ەن بايلىق.
بۇگىندە وسى قىلقالام شەبەرلەرىنىڭ جولىن جالعاستىرعان شاكىرتتەرى دە از ەمەس. وتباسى كۇنى قارساڭىندا الماتىدا ونەردە اعا بۋىننىڭ ءىزىن باسقان سۋرەتشى ورالبەك قابوكەنىڭ «Shezhire» اتتى كورمەسى اشىلدى.
مۇنداي كورمەلەردى ۇيىمداستىرۋعا «اrt of Her» مەن «Almaty Gallery» مەديا-پورتالى مۇرىندىق بولىپ ءجۇر. ال «Shezhire» سۋرەت كورمەسىن – ءاربىرىمىزدىڭ ءتۇپ-تامىرىمىز, اتا-بابالاردىڭ ءجۇرىپ وتكەن جولىن بەينەلەيتىن تاريحي جاد دەسەك تە بولعانداي.
تاريحپەن تابيعي بايلانىستاعى كورمەگە ۇلتتىق بەينەلەۋ ونەرىنىڭ كلاسسيكالىق كەسكىندەمە مەكتەبىنىڭ ءداستۇرىن جالعاستىرىپ جۇرگەن سۋرەتشىنىڭ 50-گە جۋىق تۋىندىسى قويىلعان. ولاردىڭ ءبىرازى – بۇعان دەيىن قازاقستان, وزبەكستان, سولتۇستىك كيپر, ءابۋ-دابي ء(باا), سەۋل (وڭتۇستىك كورەيا), بولگاريا, ماسكەۋ (رەسەي) سىندى حالىقارالىق جانە رەسپۋبليكالىق كورمەلەرگە قاتىسقان تۋىندىلار.
«Art of Her» – جاي عانا مەديا ەمەس, وتاندىق سۋرەتشىلەردى بىرىكتىرىپ, قولدايتىن, دامىتۋعا كومەكتەسەتىن الاڭ. ءبىز بىلتىردان بەرى «Almaty Gallery-مەن» بىرلەسىپ, قازاقستاندا وتباسى كۇنىنە وراي جاس سۋرەتشىلەردىڭ كورمەسىن ۇيىمداستىرىپ كەلەمىز. ورالبەك قابوكە ەڭبەكتەرىنەن قانىق تۇستەردى, سۇلبالاردىڭ ايقىندىعىن, كەسكىندەردىڭ, كومپوزيتسيالىق قۇرىلىمنىڭ ناقتىلىعى مەن قاراپايىمدىلىعىن كورۋگە بولادى», دەيدى وسى مەديا-پورتالدىڭ باس رەداكتورى رۋس بيكەتوۆ.
راسىندا, سۋرەتشى ۇمىتىلىپ بارا جاتقان وتباسى قۇندىلىقتارىن جاڭعىرتۋشى رەتىندە كورىنەدى. ونىڭ جەكە كورمەسىندەگى ادامدار بەينەسى مۇڭعا, قالىڭ ويعا, جان قينالىسىنا تۇسكەندەي. نەگە؟
«كەيىپكەرلەرىمنىڭ ءجۇزى نەگە وسىنداي كوڭىل كۇيدە؟ جۇمىستارىما مەنىڭ جەكە ءومىرىم مەن وتباسىلىق جاعدايىم دا اسەر ەتەتىن بولۋى كەرەك. ءدال قازىر مەن بۇل تۋرالى ءتىس جارعىم كەلمەيدى...», دەيدى سۋرەتشى.
الماتى