بيىل استانادا 27 مىڭعا جۋىق بالا 1-سىنىپقا بارادى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ءبىرىنشى سىنىپقا قابىلدانعان بالالاردى بەيىمدەۋ ماقساتىندا 78 مەملەكەتتىك مەكتەپتە العاش رەت قىسقا مەرزىمدى «بالاقايلار مەكتەبى» اشىلدى. ول 1-25 تامىز ارالىعىندا وتەدى. مۇندا بالالاردى ءبىلىم ورداسىنا بەيىمدەۋ ماقساتىندا ويىن تۇرىندە وقىتادى. وقىتۋ باعدارلاماسىن استانا قالاسىنىڭ ادىستەمەلىك ورتالىعى جانە پەداگوگتەر ۇجىمى ۇلتتىق قۇندىلىقتارعا نەگىزدەپ ازىرلەدى.
الداعى ۋاقىتتا استانا قالاسىنىڭ بارلىق مەكتەپتەرىن قامتۋ جوسپارلانىپ وتىر. سونداي-اق جازعى دەمالىستان كەيىن وقۋشىلار مەن اتا-انالاردى بەيىمدەۋ ماقساتىندا تامىز ايىندا «اdaptation days» جوباسى ءوتىپ جاتىر.