شەكارا شەبى – ءبىر بولەك تىلسىم دۇنيە. الايدا ۋاقىت وزعان سايىن شەكاراعا تونگەن قاۋىپ پەن قاتەردىڭ دە كەلبەتى دە وزگەردى. كوز ىلەسپەس جىلدامدىقپەن دامىپ جاتقان تەحنولوگيالارمەن قاتار شەكارا كەڭىستىگىندەگى زاڭ بۇزۋشىلىق تا مىڭ قۇبىلدى. ۇلى دالا باتىرلارىنىڭ بۇگىنگى ءىزباسارلارى – شەكاراشىلاردىڭ موينىنا ارتىلعان جۇك استە جەڭىل ەمەس.
جالپى ۇزىندىعى 15 مىڭ شاقىرىمنان اساتىن قازاقستان رەسپۋبليكاسىنىڭ مەملەكەتتىك شەكاراسىندا تاۋ مەن تاس, ءشول مەن شولەيت, قىر مەن قىرات, سۋ مەن سۋات تا كەزدەسەدى, ءبىر سوزبەن ايتقاندا, تابيعات جاعدايى مەن اۋا رايى الۋان ءتۇرلى. اپتاپ ىستىق, قار-جاڭبىر, قاقاعان اياز, اق تۇتەك بورانعا توتەپ بەرىپ, قايىسپاي ەلىن كۇزەتۋ – شەكاراشىلاردىڭ ۇيرەنشىكتى ءىسى. ابىرويلى قىزمەتتىڭ اۋىر جۇگىمەن قوسا بابالار اماناتىن بىرگە ارقالاعان وتان ساقشىلارى حالىق سەنىمىنىڭ ۇدەسىنەن شىعىپ كەلەدى.
حالقىمىزدىڭ قوناقجاي ەكەنى الەمگە ايان. سول ءۇشىن دە بىزبەن تانىسىپ-ارالاسۋعا, اسەم تابيعاتىمىزدى تاماشالاۋعا قۇمارتىپ, سارى دالامىزعا اعىلىپ جاتقان تۋريستەر سانى دا جىل ساناپ ارتىپ كەلەدى. زاڭدى قاقپالار ارقىلى ەلىمىزگە كۇن سايىن ءجۇز مىڭداعان ادام كىرىپ-شىعادى. ولار اۋە جولىمەن, ەل شەبىندەگى اۆتوكولىكتىك باقىلاۋ-وتكىزۋ پۋنكتەرىندە كولىكپەن, تەمىرجول بەكەتتەرىندە پويىزبەن, وعان قوسا تەڭىز ارقىلى كەمەمەن كەلەدى. قانداي جولمەن كەلسە دە قوناقتاردى ەڭ الدىمەن شەكاراشىلار قارسى الادى. تاۋەلسىز قازاقستانعا كىرەتىن قاقپا بولىپ سانالاتىن بۇل بولىمشەلەر ەلىمىزدىڭ قۇشاعى ىسپەتتەس. دوستىق كوڭىل بىلدىرگەندەردى قۇشاعىمىزدى ايقارا اشىپ قابىلداۋعا دايىن بولعانىمىزبەن, ولاردىڭ اراسىندا قارا نيەت, ارام پيعىلدى «قوي تەرىسىن جامىلعان» قىلمىسكەرلەردىڭ دە جوق ەمەسى اقيقات.
قىسقاشا اتاپ وتسەك, جىل باسىنان بەرى ەل قورعاندارى جۇزگە جۋىق شەكارا بۇزۋشىنى ۇستادى, 2,8 ملرد تەڭگە دەكلاراتسيالانباعان ۆاليۋتا, التىن جانە باسقا دا تاۋارلاردىڭ زاڭسىز تاسىمالدانۋىنىڭ الدىن الدى. شەكاراشىلارعا بۇرىننان تانىس, ءتىپتى كۇندە كەزدەسەتىن زاڭسىز قارۋ-جاراقتى, وق-ءدارىنى, مەملەكەتتىك شەكارا ارقىلى وتۋگە تىيىم سالىنعان باسقا دا كونتراباندالىق زاتتاردى تاسىمالداۋ ارەكەتتەرى سياقتى ء«داستۇرلى» قاۋىپ-قاتەرمەن بىرگە, سوڭعى كەزدەرى سينتەتيكالىق ەسىرتكىنىڭ جاڭا تۇرلەرىن تاسىمالداۋ جاعدايلارى بەلەڭ الىپ تۇر. ولاردىڭ اراسىندا «الفا-PVP» جانە «مەفەدرون» اتتى ەسىرتكى زاتتارىن ەلىمىزگە كىرگىزۋگە تىرىسىپ باققانداردىڭ دەنى ارتىپ كەلەدى. ودان بولەك, زاڭسىز كوشى-قوننىڭ كۇننەن-كۇنگە ءورشي تۇسكەنى بايقالادى. الىس-جاقىن شەتەل ازاماتتارى مەن ءوز وتانداستارىمىزدىڭ جالعان جانە بوتەن قۇجاتتاردى پايدالانۋ فاكتىلەرى, سونداي-اق قوس ەلدىڭ ازاماتتىعىن يەلەنگەندەر دە انىقتالىپ جاتادى.
ەل ىرگەسىنىڭ بەرىك بولۋى, بىرىنشىدەن, شەكاراشىلاردىڭ ءوز ءىسىن جاۋاپتى اتقارۋى مەن كاسىبيلىگىنە بايلانىستى بولسا, ەكىنشى جاعىنان شەكارامىزدىڭ زاماناۋي تەحنيكامەن جابدىقتالۋىنا بايلانىستى. تاۋەلسىزدىك العاننان كەيىن باستالعان مەملەكەتتىك شەكارانى شەگەندەۋ جۇمىستارى, ونىڭ ىشىندە ينجەنەرلىك, تەحنيكالىق تۇرعىدا وزىق تەحنولوگيالارمەن جاراقتاندىرۋ جالعاسىپ كەلەدى. قازىرگى كەزدە شەكاراشى جاۋىنگەر زاماناۋي تەحنولوگيا جەتىستىكتەرىن قولدانۋ ارقىلى بولىمشەدە وتىرىپ-اق بەلگىلەنگەن ۋچاسكەنى كۇزەتە الادى. جاڭا تەحنيكا, ۇشقىشسىز باسقارۋ اپپاراتتارى, دروندار, بەينە كامەرالاردى قولدانۋ قولعا الىنۋدا.
قازىرگى ۋاقىتتا تسيفرلاندىرۋ مەملەكەتتىك شەكارا ارقىلى وتكىزۋ پۋنكتتەرىندە دە قارقىندى جۇرگىزىلىپ جاتىر. كەيبىر جەرلەردە اۆتوماتتاندىرىلعان «Q-Gate» پاسپورتتىق باقىلاۋ, «Vocord» تۇلعانى تانۋ جۇيەلەرى پايدالانىلادى. سونىمەن قاتار جاڭا تەحنولوگيانىڭ كومەگىمەن جولاۋشىنىڭ شەكارادان زاڭدى تۇردە وزدىگىنەن وتە الاتىن مۇمكىندىگى قاراستىرىلۋدا. بۇل رەتتە ول قۇجاتىن ارنايى اپپاراتقا قويىپ, كامەراعا قاراسا بولدى. ۇكىمەتتىڭ قولداۋىمەن يندۋستريا جانە ينفراقۇرىلىمدىق دامۋ جانە قارجى مينيسترلىكتەرى وتكىزۋ پۋنكتتەرىنىڭ جاڭا زاماناۋي ينفراقۇرىلىمىن قۇرۋ بويىنشا جۇمىستى باستادى.
جوسپار بويىنشا الداعى جىلدارى وڭىرلەردە بىرنەشە جاڭا شەكارا بولىمشەلەرى بوي كوتەرىپ, سول جەردە قىزمەت اتقاراتىن اسكەري قىزمەتشىلەرگە جانە ولاردىڭ وتباسى مۇشەلەرىنە تۇگەل جاعداي جاسالماق. وسىلايشا, ەگەمەن ەلىمىز شەكاراسى بەرىك, ايبىنىنا ايبارى ساي, ابىرويى اسقاق مەملەكەتكە اينالارى ءسوزسىز.
راۋان قابدولدانوۆ,
ۇقك شەكارا قىزمەتى «وتان ساقشىسى» گازەتىنىڭ رەداكتورى, پودپولكوۆنيك