تارازدا ساۋلەلىك تەراپياعا ارنالعان جوعارى تەحنولوگيالىق ۇدەتكىشپەن, سونداي-اق سوڭعى كت جانە مرت اپپاراتتارىمەن, ەندوسكوپيالىق جانە ەڭ از ءينۆازيۆتى جابدىقتارمەن جابدىقتالعان زاماناۋي ونكولوگيالىق ورتالىق اشىلدى, دەپ حابارلايدى Egemen.kz دەنساۋلىق ساقتاۋ مينيسترلىگىنە سىلتەمە جاساپ.
بۇعان دەيىن ورتالىققا قر پرەمەر-ءمينيسترى ءاليحان سمايىلوۆ بارعان ەدى. ۇكىمەت باسشىسىنا جاڭا مەديتسينالىق مەكەمەنى وزىق جابدىقتاۋ جانە جەرگىلىكتى تۇرعىندارعا بىلىكتى مەديتسينالىق كومەك كورسەتۋ جوسپارلارى تۋرالى بايانداما ۇسىنىلدى.
ورتالىقتا حالىقارالىق ستاندارتتارعا سايكەس رەانيماتسيا جانە انەستەزيولوگيا بولىمشەلەرى, سونداي-اق وپەراتسيالىق بلوك ۇيىمداستىرىلىپ, جاراقتاندىرىلدى.
ونكولوگيالىق ورتالىقتا تسيتوستاتيكتەردى ورتالىق سۇيىلتۋدىڭ اۆتوماتتاندىرىلعان كابينەتى ۇيىمداستىرىلعان, بۇل ۆەناىشىلىك ينفۋزياعا ارنالعان حيميالىق, تارگەتتىك جانە يممۋنولوگيالىق-ونكولوگيالىق پرەپاراتتاردىڭ ەرىتىندىلەرىن مۇمكىندىگىنشە ءدال جانە جىلدام دايىنداۋعا مۇمكىندىك بەرەدى.
«تاراز قالاسىنداعى جاڭا ونكولوگيالىق ورتالىق جەرگىلىكتى تۇرعىندارعا ونكولوگيالىق كومەكتىڭ زاماناۋي ادىستەرىنىڭ تولىق سپەكترىن ۇسىنادى. ەندى پاتسيەنتتەرگە ساۋلەلىك تەراپيا الۋ ءۇشىن باسقا وڭىرلىك بارۋدىڭ قاجەتى جوق, ويتكەنى ورتالىق كونفورمدى ساۋلەلىك تەراپيا, IGRT جانە IMRT سياقتى وزىق ادىستەردى جۇزەگە اسىرۋعا قابىلەتتى زاماناۋي اپپاراتپەن جابدىقتالعان. قازاقستاندا جاڭا اۋرۋحانالار سالۋ جانە قولدانىستاعى كلينيكالاردى تەحنولوگيالىق جاڭعىرتۋ ەسەبىنەن ونكولوگيالىق كومەكتىڭ قارقىندى دامۋى جالعاسۋدا», دەدى مينيسترلىك وكىلدەرى.