الماتىدا جۇمىسسىز جۇرگەن 400 ادام كاسىپتىك بىلىمگە تەگىن جولداما الدى. ولاردىڭ 687-ءسى ءبىلىم بەرۋ ۇيىمدارىنا, ال 313-ءى ارنايى جۇمىس ورىندارىندا كاسىپتىك ءبىلىم الاتىن بولادى.
الماتى قالاسى مانساپ ورتالىعىنىڭ باسشىسى ادىلەت جاڭاباەۆ جۇمىسسىزداردى وقىتۋ ماسەلەسىنە توقتالىپ, كاسىپتىك وقىتۋ ۇزاقتىعىنىڭ 3 ايدان اسپايتىنىن جەتكىزدى. ونىڭ ايتۋىنشا, مىڭنان استام ادامدى وقىتۋ جوسپارلانىپ وتىر. بيىل ءبىلىم بەرۋ ۇيىمدارىندا 18 ماماندىق بويىنشا وقىتۋ ءۇشىن 42 جۇمىس بەرۋشىنىڭ ءتىزىمى انىقتالىپ, 687 ورىن بەكىتىلسە, جۇمىس ورنىندا كاسىپتىك وقىتۋدى ۇيىمداستىرۋ ءۇشىن 12 ماماندىق بويىنشا 313 ادام ءبىلىم الاتىن بولادى. بۇل باعىتتا 13 جۇمىس بەرۋشىنىڭ ءتىزىمى بەكىتىلگەن.
كورسەتىلگەن كاسىپتىك وقىتۋ تۇرلەرى بويىنشا بيىل ءبىر ادامدى وقىتۋ ءۇشىن 50 مىڭ تەڭگە جۇمسالادى. كاسىپتىك ءبىلىم العىسى كەلەتىندەرمەن الەۋمەتتىك كەلىسىمشارت جاسالىپ, وقۋ اياقتالعانعا دەيىن 21 787 تەڭگە مولشەرىندە ستيپەنديا تولەنەدى. سونىمەن قاتار جۇمىس ورنىندا كاسىبي وقىتىلاتىندارمەن دە ەڭبەك شارتى جاسالىپ, اي سايىن مانساپ ورتالىعى سالىقتاردى, مىندەتتى الەۋمەتتىك اۋدارىمداردى, پايدالانىلماعان ەڭبەك دەمالىسىنا وتەماقىنى, بانكتىك قىزمەتتەردى جانە ەكولوگيالىق ۇستەمەاقىلار بويىنشا تولەمدەردى ەسەپكە الماعاندا 20 ايلىق ەسەپتىك كورسەتكىش (69 000 تەڭگە) مولشەرىندە جالاقى تولەپ وتىرادى.
الەۋمەتتىك كەلىسىمشارت جانە ەڭبەك شارتى شەڭبەرىندە وقۋ اياقتالعاننان كەيىن جۇمىس بەرۋشىلەر جۇمىسقا ورنالاسۋعا جاردەمدەسەدى. كەلەشەكتە ۇمىتكەرلەردىڭ ءوتىنىش جاساۋىنا قاراي ءتىزىم جاسالىپ, كاسىبي باعدار بەرۋ جۇمىستارى جالعاساتىن بولادى. جۇمىسسىزدىققا قاتىستى تۋىنداعان سۇراقتار بويىنشا دوستىق داڭعىلى, 85, «الەۋمەتتىك قىزمەتتەر ءۇيى» مەكەنجايىنا نەمەسە 310-47-82 بىرىڭعاي نومىرىنە حابارلاسۋعا, مانساپ ورتالىعىنىڭ الەۋمەتتىك جەلىلەردەگى @ctm_almaty اككاۋنتى بويىنشا تانىسۋعا بولادى.