مەن – جەتى جاستاعى ءازيز جامبىلدىڭ ناعاشى اجەسىمىن. ءبىز باتىس قازاقستان وبلىسىنداعى كازتالوۆ اۋدانىنىڭ كوكتەرەك اۋىلىندا تۇرامىز. مەن «Egemen Qazaqstan» گازەتى ارقىلى ءوزىم مەن جيەنىمنىڭ اناسى, ياعني قىزىم نۇرلى سەيفوللاقىزىنىڭ اتىنان اقتوبەدەگى «انا مەن بالانى قورعاۋ» ورتالىعىنىڭ ماماندارىنا العىسىمدى بىلدىرگىم كەلەدى.
ءازيز بەس جاسىنان باستاپ تاماقتى قينالىپ ىشەتىن. وتكەن جىلى قارا سۋ دا تاماعىنان دۇرىس وتپەيتىن بولعان سوڭ دارىگەرلەر ورال قالاسىنداعى بالالار اۋرۋحاناسىنا جاتقىزدى. بۇل جەردە بالانىڭ وڭەشى تارىلعان, وپەراتسيا جاساۋ كەرەك دەپ شەشتى. سودان اقتوبەدەگى اتالعان ورتالىققا پورتال ارقىلى كەزەككە تۇردىق. كەزەگىمىز كوپ كۇتتىرمەي كەلىپ, اقتوبەگە جول تارتتىق. «انا مەن بالانى قورعاۋ» ورتالىعىندا ءۇش ايعا جۋىق جاتىپ ەمدەلىپ, وپەراتسيا جاسالدى. اۋرۋحانادان شىققان سوڭ بەس-ون كۇن سايىن تەكسەرىستەن ءوتىپ تۇردىق. قازىر جيەنىمنىڭ جاعدايى ەداۋىر جاقساردى, ءبىر جارىم ايدا تەكسەرۋگە كەلىپ تۇرامىز.
ءارى-ءسارى كوڭىل كۇيدە كەلگەن بىزگە اقتوبەلىك دارىگەرلەر ءۇمىت سىيلادى. «انا مەن بالانى قورعاۋ» ورتالىعىنىڭ باس دارىگەرى ەربول جاپاقوۆ, ءبولىم مەڭگەرۋشىسى مارات يلياسوۆ, دارىگەرلەر – جاننا ەگيلوۆا, اينۇر داۋلەنوۆا, قايرات جالمۇحامبەتوۆ, باۋىرجان بيساليەۆ, باس مەدبيكە ايگۇل جاپاروۆا, مەدبيكەلەر – گۇلزيرا نۇرعاليەۆا, دايراتگۇل ماقانوۆا, ۆالەنتينا سارسەنوۆا سىندى قولى شيپالى, جۇرەگى مەيىرىمگە تولى ماماندارعا العىستان باسقا ايتارىمىز جوق. ۇجىمنىڭ اقىلشىسى, پروفەسسور بولات جانالاەۆ جانى قينالىپ كەلگەن ءسابيدى ساۋىقتىرعان تاماشا مامان, ۇلكەن جۇرەكتى ازامات ەكەن. كىممەن دە بولسىن وتە سىپايى سويلەسەتىن ەمدەۋشى دارىگەر باۋىرجان بيساليەۆ تۋرالى دا وسىلاي دەمەكپىز.
الاڭ كوڭىل بولىپ كەلگەن اتا-اناعا جىلى ءسوزدىڭ ءوزى ۇلكەن دەمەۋ عوي. راحمەت, اق جەلەڭدى ابزال جاندار!
رايا جۇماگەرەيقىزى
باتىس قازاقستان وبلىسى,
قازتالوۆ اۋدانى