الماتىدا سكۋتەرىمەن بىرگە كولىك قاعىپ كەتىپ, ون كۇن بويى ەس-ءتۇسسىز جاتقان ءجاسوسپىرىمدى №2 قالالىق بالالار كلينيكالىق اۋرۋحاناسىنىڭ دارىگەرلەرى ەكىنشى رەت ومىرگە اكەلىپ, اياعىنان تۇرعىزدى. سول سياقتى قالالىق جەدەل شۇعىل كومەك كورسەتۋ اۋرۋحاناسىنا جەتكىزىلگەن جاتىرىندا ىسىگى بار, جۇكتىلىكتىڭ 13-14 اپتالىعىنداعى ناۋقاستى كوپبەيىندى دارىگەرلەر كومانداسى قۇتقارىپ قالدى. تىزە بەرسەڭ, مۇنداي وقيعالار لەگى جەتكىلىكتى. دەگەنمەن وسىلاردىڭ ىشىندە قازاقستاندا العاش رەت الماتىداعى پەدياتريا جانە بالالار حيرۋرگياسى عىلىمي ورتالىعىندا بالالارداعى باۋىر وبىرىن ەمدەۋدىڭ حيميوەمبوليزاتسيا ءادىسى ەنگىزىلىپ, العاشقى وپەراتسيا جۇزەگە اسقانىن ىلكىمدى وقيعالار قاتارىنا جاتقىزۋعا بولادى.
اتالعان وپەراتسيا ءبىر جارىم جاستاعى قىز بالاعا جاسالدى. ەكى ساعاتقا سوزىلعان وپەراتسيا ءساتتى ءوتتى. وپەراتسيانى كوپجىلدىق تاجىريبەسى بار ۇلتتىق عىلىمي مەديتسينالىق ورتالىعىنىڭ ونكوراديولوگى نياز مالاەۆ, پەدياتريا جانە بالالار حيرۋرگياسى عىلىمي ورتالىعىنىڭ بىلىكتى دارىگەرلەرى – رەنتگەنحيرۋرگ, بالالار ينتەرۆەنتسيالىق كارديولوگى ازيز وڭلاسىنوۆ جانە بالالار ونكوحيرۋرگى, رەنتگەنحيرۋرگ بەگايدار ەلىباەۆ جاسادى.
وسى ۋاقىتقا دەيىن بۇل ءادىس ەلىمىزدە تەك ەرەسەك ادامدارعا عانا قولدانىلىپ كەلگەن. ال دامىعان ەۋروپا ەلدەرىندە بالالارعا 2005 جىلدان جاسالىپ كەلەدى. باۋىر ارتەرياسىنىڭ حيميوەمبوليزاتسيا ءادىسى (باحە) – اعزاعا تيەتىن زاقىمى بارىنشا از, ءينۆازيۆتى ءادىس. بۇل ارنايى قۇرالدارمەن ميكروسفەرالارعا جۇكتەلگەن حيميوتەراپەۆتىك پرەپارات قان تامىرلارى جۇيەسى ارقىلى ميكروكاتەتەرلەردىڭ كومەگىمەن باۋىرداعى ىسىككە تىكەلەي جەتكىزىلىپ, حيميوتەراپيالىق جانە يشەميالىق اسەر ەتۋمەن ىسىكتى تىكەلەي جويۋعا مۇمكىندىك بەرەدى.
«پەدياتريالىق تاجىريبەگە حالىقارالىق ستاندارتتارعا سايكەس ەنگىزىلگەن بۇل ءادىستىڭ ارتىقشىلىعى – باسقا ورگانداردى زاقىمداماي, ىسىكتى تىكەلەي جويا الادى جانە اۋىر اسقىنۋلاردىڭ الدىن الىپ, قايعىلى وقيعالاردىڭ كورسەتكىشىن تومەندەتەدى. حيميالىق پرەپارات باۋىردا شوعىرلانعان ىسىككە تىكەلەي ەنگىزىلەتىندىكتەن, حيميوتەراپيالىق اسەرى جۇيەلى ادىسكە قاراعاندا بىرنەشە ەسە ءتيىمدى. ناۋقاستىڭ وزىنە ءوزى كەلەتىن كەزەڭى بار بولعانى 2-3 كۇندى الادى جانە پاتسيەنت پروتسەدۋرادان كەيىن 3-كۇنى شىعارىلادى. بۇل ءادىستى قولدانۋ ارقىلى حيرۋرگيالىق وپەراتسيا جاساۋعا كەلمەيتىن باۋىر ىسىكتەرىنىڭ كولەمىن تۇراقتاندىرۋعا نەمەسە ازايتۋعا بولادى», دەيدى پەدياتريا جانە بالالار حيرۋرگياسى عىلىمي ورتالىعىنىڭ رەنتگەنحيرۋرگى, بالالار ينتەرۆەنتسيالىق كارديولوگى ازيز وڭلاسىنوۆ.
جىل سايىن قازاقستاندا ورتا ەسەپپەن بالالاردا قاتەرلى ىسىكتەردىڭ 600-گە جۋىق جاڭا جاعدايى انىقتالادى. گەپاتوبلاستوما بالالارداعى بارلىق ىسىكتىڭ شامامەن 0,5-2% جانە باۋىردىڭ بىرىنشىلىك ىسىكتەرىنىڭ 2/3 بولىگىن قۇرايدى. 2013 جىلدان بەرى پەدياتريا جانە بالالار حيرۋرگياسى عىلىمي ورتالىعىندا گەپاتوبلاستوماعا شالدىققان 69 بالا ەمدەلگەن. ونىڭ 40-ى – رەميسسيادا.
«باۋىر ارتەرياسىنىڭ حيميوەمبوليزاتسيا ءادىسى وپەراتسيا جاساۋعا كەلمەيتىن قاتەرلى ىسىكتەردى ەمدەۋدىڭ تاڭداۋ ءادىسى رەتىندە قاراستىرۋعا مۇمكىندىك بەرەدى. باۋىر ىسىكتەرىن ەمدەۋدە حيميوەمبوليزاتسيانى قولدانۋدىڭ تيىمدىلىگى مەن مۇمكىندىگىنىڭ كەپىلى – تاۋەكەل توبىنداعى ناۋقاستاردا وسى قاتەرلى دەرتتى مۇمكىندىگىنشە ەرتە دياگنوستيكالاۋعا, سونداي-اق ينتەرۆەنتسيالىق ونكولوگيالىق ادىستەردى قولدانۋ ارقىلى دەر كەزىندە ەم-دوم جۇرگىزۋگە جول اشادى», دەيدى بالالار ونكوحيرۋرگى, رەنتگەنحيرۋرگ بەگايدار ەلىباەۆ.