ماڭعىستاۋدا «جەتى لاق» دەگەن شارۋاشىلىق بار. دۇكەن سورەلەرىنەن سۇيكىمدى سۋرەتتى قۇتىعا قۇيىلعان شارۋاشىلىقتىڭ ءسۇت ونىمدەرىن تۇرعىندار ءجيى ساتىپ الادى. 2020 جىلى قۇرىلىپ, ءوز جۇمىسىن باستاعان «جەتى لاق» فەرماسى تۇپقاراعان اۋدانىنداعى اقشۇقىر اۋىلىندا ورنالاسقان. كاسىپكەرلەر وتباسى ەشكى مەن تۇيە سۇتىنەن ىرىمشىك ونىمدەرىن شىعارۋمەن اينالىسادى, ياعني پاستەرلەنگەن ەشكى ءسۇتىن, يوگۋرت, ايران, سۇزبە, قايماق جانە ىرىمشىكتىڭ 12 ءتۇرىن شىعارادى. قازىرگى تاڭدا كوبزەۆتەر وتباسى ايىنا 3,5 توننا ەشكى ءسۇتىن وندىرەدى.
فەرما 10 گا جەردى الىپ جاتىر. ونىڭ ءتورت گەكتارى ەشكى وسىرۋگە ارنالسا, قالعان ايماقتا جەمشوپ قويماسى مەن ءسۇت وڭدەۋ تسەحى ورنالاسقان. ءوز شارۋاسىن دوڭگەلەتىپ وتىرعان ماڭعىستاۋلىق كاسىپكەرلەر – كوبزەۆتەر وتباسى قىركۇيەك ايىنىڭ 10-12 ارالىعىندا ەۋروپانىڭ تۋر قالاسىندا تۇڭعىش رەت وتەتىن حالىقارالىق ىرىمشىك بايقاۋىنا قاتىسىپ, قازاقستاننىڭ نامىسىن قورعايدى. فرانتسۋزدىق Le Mondial du fromage بايقاۋى – حالىقارالىق ءسۇت ونىمدەرىن شىعارۋشى كاسىپكەرلەردىڭ ءوز ونىمدەرىن ۇسىنا الاتىن جوعارى دەڭگەيدەگى الاڭى. كوبزەۆتەردىڭ جەتىستىگى – كونكۋرس ۇيىمداستىرۋشىلار تاراپىنان قازاقستاندا العاش رەت اككرەديتتەۋ الۋى.
ءوڭىر باسشىسى نۇرلان نوعاەۆتىڭ تۇپقاراعان اۋدانىنا جۇمىس ساپارى بارىسىندا شارۋاشىلىعىن دوڭگەلەتىپ وتىرعان كاسىپكەرلەر ءوز كاسىبىمەن تانىستىرىپ, مۇمكىندىكتەرى تۋرالى باياندادى.
– بيىل ءبىز ءوندىرىستى دامىتۋعا باعىتتالعان قايتارىمسىز 5 ملن تەڭگە گرانت ۇتىپ الدىق. سونىمەن قاتار «اۋىل اماناتى» باعدارلاماسىنىڭ قاتىسۋشىلارىمىز. اۋىل شارۋاشىلىعى كاسىپورنىن ءوز اقشاڭا دامىتۋ وتە قيىن, وسى تۇرعىدا مەملەكەت اۋىل شارۋاشىلىعى وندىرۋشىلەرىنە كوڭىل ءبولىپ, قولداۋ كورسەتىپ وتىرعانى قۋانتادى. بيىل ءبىز ءۇشىن ماڭىزدى وقيعا – Mondial du fromage-2023 حالىقارالىق ىرىمشىك بايقاۋىنا قاتىسۋ. وندا ءبىز ءوز ونىمدەرىمىزدى تانىستىرامىز. ايتا كەتۋ كەرەك, ەلىمىز تاۋەلسىزدىك العالى بەرى قازاقستان العاش رەت الەمدىك ىرىمشىك جاساۋشىلار بايقاۋىنا ءوز ونىمدەرىن ۇسىناتىن بولادى, – دەدى ىرىمشىك دايىنداۋشى الەكساندرا گريگولوۆا.
ءوڭىر باسشىسى ن.نوعاەۆ كاسىپورىننىڭ جەتىستىگى مەن ماڭعىستاۋ ىرىمشىك وندىرۋشىلەرىنىڭ الەۋەتى زور ەكەنىن اتاپ ءوتتى.
– ماڭعىستاۋدا وندىرىلەتىن وتاندىق ىرىمشىكتەر جاقىن ارادا وتاندىق ەكسپورتتى دامىتۋدىڭ نەگىزگى درايۆەرى بولا الادى. سىزدەر حالىقارالىق دەڭگەيدەگى بايقاۋدا ەلىمىزدى تانىستىرۋ مۇمكىندىگىنە يە بولعانىڭىز قۋانتادى. سىزدەرگە ساتتىلىك تىلەي وتىرا, كاسىپكەرلەردىڭ باستامالارىن قولداۋعا ارقاشان دايىن ەكەنىمىزدى ايتقىم كەلەدى, – دەدى ن.نوعاەۆ.
قازاقستاننىڭ ءسۇت ونىمدەرى ەۋروپادا توپ جارىپ ەل مەرەيىن اسىراتىن كۇن جاقىن دەپ ويلايمىز.