ەلدىڭ باسىم بولىگىندە تۇراقسىز اۋا رايى ساقتالادى

«قازگيدرومەت» رمك بولجامىنا سايكەس, اتموسفەرالىق فرونتالدى ۋچاسكەلەردىڭ اسەرىنەن ەلدىڭ باسىم بولىگىندە اۋا رايى تۇراقسىز بولادى. سينوپتيكتەر جاڭبىر جاۋادى دەپ بولجاپ وتىر. «سولتۇستىك-باتىستا قاتتى جاڭبىر, نايزاعاي, بۇرشاق بولادى. تەك رەسپۋبليكانىڭ شىعىسىندا جاۋىن-شاشىنسىز اۋا رايى ساقتالادى», دەلىنگەن حابارلامادا.

ەل اۋماعىندا جەل كۇشەيەدى, وڭتۇستىكتە شاڭدى داۋىل تۇرادى. سولتۇستىك-باتىستا تۇندە جانە تاڭەرتەڭ تۇمان تۇسەدى

استانادا كوشپەلى بۇلت شىعادى. كۇندىز وتكىنشى جاڭبىر جاۋادى, كۇن كۇركىرەيدى, بۇرشاق جاۋادى. وڭتۇستىك-شىعىستان ەكپىنى 9-14 مەتر, كۇندىز ەكپىنى 15-20 مەتر بولاتىن جەل سوعادى. اۋا تەمپەراتۋراسى تۇندە +20+22°س, كۇندىز وتە ىستىق +34+36°س.

الماتىدا كوشپەلى بۇلت شىعادى, جاۋىن-شاشىنسىز. وڭتۇستىك-باتىستان ەكپىنى 3-8 مەتر جەل سوعادى. اۋا تەمپەراتۋراسى تۇندە +23+25°س, كۇندىز وتە ىستىق +36+38°س.

شىمكەنتتە كوشپەلى بۇلت شىعادى, جاۋىن-شاشىنسىز. وڭتۇستىك-باتىستان سوعاتىن جەل سولتۇستىك-باتىسقا اۋىسادى. ەكپىنى 8-13 مەتر, كۇندىز ەكپىنى 15-20 مەتر. اۋا تەمپەراتۋراسى تۇندە +22+24°س, كۇندىز +36+38°س.