مەملەكەتتىك ساراپتاما كەزىندە جايلى مەكتەپتەردىڭ جسق قاراۋ ۋاقىتى ءۇش ەسەگە قىسقارادى. جايلى مەكتەپتەردىڭ جوبالىق-سمەتالىق قۇجاتتاماسىن قاراۋ مەرزىمى 45 كۇننەن 15 كۇنگە دەيىن قىسقارادى. بۇل تۋرالى Samruk-Kazyna Construction باسقارما توراعاسى ماۋلەن ايمانبەتوۆ Instagram-داعى ونلاين-بريفينگ بارىسىندا مالىمدەدى, دەپ حابارلايدى Egemen.kz.
2024 جىلدىڭ سوڭىنا دەيىن 207 جايلى مەكتەپ سالىنىپ, پايدالانۋعا بەرىلەدى. قازىر ءۇش سەيسميكالىق جانە ەكى كليماتتىق ايماق بويىنشا 32 ۇلگىلىك جسق ازىرلەنۋدە. SK Construction باسشىسىنىڭ ايتۋىنشا, جوبالىق-سمەتالىق قۇجاتتامالاردى ازىرلەۋ قىركۇيەكتىڭ سوڭى جانە قازان ايىنىڭ باسىندا اياقتالادى.
«ساراپشىلار جايلى مەكتەپتەردىڭ جوبالىق-سمەتالىق قۇجاتتامالارى بويىنشا ساراپتاما قورىتىندىسىن 45 كۇننىڭ ورنىنا 15 كۇن ىشىندە بەرۋگە دايىن, بىراق ولار ساپالى ازىرلەنگەن جاعدايدا عانا. بۇل "جايلى مەكتەپ" ۇلتتىق جوباسىن ىسكە اسىرۋ قازىر باسىمدىققا يە ەكەنىن بىلدىرەدى. سوندىقتان ءبىز تاپسىرىس بەرۋشى رەتىندە جسق ازىرلەۋ ساپاسىن قاتاڭ قاداعالايمىز», دەدى ايمانبەتوۆ.
ول جوبالىق-سمەتالىق قۇجاتتامانى ازىرلەۋگە ادەتتە 9 ايعا دەيىن ۋاقىت كەتەتىنىن اتاپ ءوتتى. الايدا, ۇلتتىق جوبادا بۇل ۇدەرىس ەرس-كەلىسىمشارت ەسەبىنەن جەدەلدەتىلەدى, ويتكەنى بارلىق ۇدەرىستەر ءبىر ۋاقىتتا جۇرەدى, بۇل ۋاقىتتى ۇنەمدەۋگە مۇمكىندىك بەرەدى.
سونداي-اق مەكتەپتەر پايدالانۋعا بەرىلگەننەن كەيىن كەشەندى ساراپتامانىڭ وڭ قورىتىندىسىن العان جايلى مەكتەپتەردىڭ دايىن جوبالىق-سمەتالىق قۇجاتتامالارى قۇرىلىس كوميتەتىنىڭ بانكىنە كىرەدى. بولاشاقتا قاجەت بولعان جاعدايدا وسى مەكتەپتەردىڭ دايىن جوبالارىن الۋعا بولادى.
تىكەلەي ەفير بارىسىندا ايمانبەتوۆ مەكتەپتەردىڭ سانى نەگە قىسقارعانىن ءتۇسىندىردى. باستاپقىدا ۇلتتىق جوبا اياسىندا 401 ءبىلىم بەرۋ نىسانىنىڭ قۇرىلىسى جوسپارلانعان ەدى. وڭتايلاندىرۋ جۇرگىزىلگەننەن كەيىن ولاردىڭ سانى 369-عا دەيىن قىسقاردى. SK Construction باسشىسىنىڭ ايتۋىنشا, مەكتەپتەردىڭ سانىن وقۋ-اعارتۋ مينيسترلىگى بەكىتەدى.
«بۇعان دەيىن وڭىرلەردە ەگجەي-تەگجەيلى تەكسەرۋ جۇرگىزىلىپ, كەيبىر اكىمدىكتەر ءوتىنىم بەرۋ كەزىندە مەكتەپتەردىڭ سانىن قاجەتتىلىكتەن اسىرا كورسەتكەنى بەلگىلى بولدى. مىسالى, اۋىلدا ءبىر مەكتەپ بار, ونىڭ وزىندە وقۋشى سانى از. بۇعان قاراماستان جەرگىلىكتى اتقارۋشى ورگاندار «جايلى مەكتەپ» جوباسى بويىنشا تاعى بىرەۋىن سالۋعا ءوتىنىم بەرگەن. وسى جانە وزگە دە جاعدايلاردىڭ ءبارىن ەسكەرە وتىرىپ, مەكتەپتەردىڭ جالپى سانى ازايدى», دەدى ول.
باسقارما توراعاسى قۇرىلىستى كەشىكتىرگەن مەردىگەرلەر قانداي جاۋاپكەرشىلىككە تارتىلاتىنىن ايتتى. ەگەر مەردىگەر جسق ازىرلەۋ نەمەسە قۇرىلىس جۇمىستارىن ورىنداۋ مەرزىمىن كەم دەگەندە ەكى رەت 7 كۇننەن ارتىق ۋاقىتقا كەشىكتىرسە, كەلىسىمشارت بىرجاقتى تارتىپپەن بۇزىلادى. ال مەكتەپتىڭ قۇرىلىسى كونكۋرستا ەكىنشى ورىن العان كومپانياعا بەرىلەدى. ول تالاپتارعا ساي كەلمەگەن جاعدايدا, جاڭا مەردىگەر ءبىر كوزدەن ساتىپ الۋ ارقىلى انىقتالادى. بارلىق جايلى مەكتەپتەردى ۋاقىتىلى سالىپ, تاپسىرۋ ءۇشىن وسىنداي قاتاڭ شارالار قابىلدانىپ جاتىر.
«ونىڭ ۇستىنە, ەگەر مەردىگەر شارت تالاپتارىن ورىنداماي, جۇمىستى ۋاقىتىلى اتقارماسا, بىزدە بانكتىك كەپىلدىك بار. ياعني, مەردىگەر جوسىقسىز بولعاننىڭ وزىندە, بيۋدجەت اقشاسى دالاعا كەتپەيدى», دەپ سەندىردى ماۋلەن ايمانبەتوۆ.
«جايلى مەكتەپ» ۇلتتىق جوباسىنا 2,3 ترلن تەڭگە ءبولىندى. ونىڭ ىشىندە 461 ملرد تەڭگە ۇلتتىق قوردان, ال 1,8 ترلن تەڭگە رەسپۋبليكالىق بيۋدجەتتەن بەرىلەدى.
بۇگىنگى تاڭدا 116 جايلى مەكتەپ بويىنشا كونكۋرستىق راسىمدەردىڭ قورىتىندىسى شىعارىلىپ, مەردىگەرلەرمەن شارتتار جاسالدى. ولار الدىن-الا تولەم الىپ, قۇرىلىسقا دايىندىق جۇمىستارىن باستادى. قالعان نىساندار بويىنشا بايقاۋ قورىتىندىسى مەن شارت جاساسۋ 2023 جىلدىڭ 10 تامىزىنا دەيىن جوسپارلانعان.
ۇلتتىق جوبانى ىسكە اسىرۋدىڭ ەكىنشى كەزەڭىندە 2025 جىلدىڭ سوڭىنا دەيىن 152 مەكتەپ سالۋ جوسپارلانعان. قازىر باستاپقى دەرەكتەردى جيناۋ جانە ۋچاسكەلەردى راسىمدەۋ جۇمىستارى جۇرگىزىلىپ جاتىر.