شەبىر اۋىلدىق وكرۋگىنىڭ اكىمدىگى ازىق-ت ۇلىك دۇكەندەرىنىڭ جۇمىس ۋاقىتىن نەگىزسىز شەكتەگەن بولىپ شىقتى. سىبايلاس جەمقورلىققا قارسى قىزمەت دەپارتامەنتى باسشىسىنىڭ ماڭعىستاۋ وبلىسى بويىنشا ءبىرىنشى ورىنباسارى ءبىرجان ءحايرۋلليننىڭ مالىمدەۋىنشە, «اتامەكەن» كاسىپكەرلەر پالاتاسى مەن ماڭعىستاۋ اۋدانىنىڭ پروكۋراتۋراسى بىرلەسىپ شەبىر اۋىلدىق وكرۋگى اكىمدىگىنىڭ ءىس-ارەكەتىنە شاعىمدانعان ازىق-ت ۇلىك دۇكەنى يەسىنىڭ ءوتىنىشىن قارادى.
«شەبىر اۋىلدىق وكرۋگىنىڭ اكىمدىگى ازىق-ت ۇلىك دۇكەنىنىڭ جۇمىس ۋاقىتىن كۇزگى-قىسقى كەزەڭدە ساعات 23:00-گە دەيىن, كوكتەمگى-جازعى كەزەڭدە ساعات 23:30-عا دەيىن نەگىزسىز شەكتەگەنى انىقتالدى. وسىلايشا, شەبىر اۋىلىنىڭ اكىمدىگى كاسىپكەرلىك سۋبەكتىسىنە كەدەرگى كەلتىرگەن. ءتيىستى ورگانداردىڭ ارالاسۋىنان كەيىن اكىمدىك بۇرىن جاريالانعان نۇسقامالىق حاتتىڭ كۇشىن جويدى. ناتيجەسىندە اۋىلدا وسىنداي پروبلەماعا تاپ بولعان توعىز دۇكەن يەسىنە كومەك كورسەتىلدى», دەدى ول.
سونداي-اق دەپارتامەنت كاسىپكەرلەر ءۇشىن شەكتەۋلەر جاساعانى ءۇشىن اكىمدىكتىڭ باس مامانىنا «ەسكەرتۋ» تۇرىندە تارتىپتىك جازا جاريالانعانىن اتاپ ءوتتى. ال اۋىل اكىمى لاۋازىمدى تۇلعا بولا تۇرا كاسىپكەرلىككە زاڭسىز ارالاسقانى ءۇشىن 345 مىڭ تەڭگە كولەمىندە ايىپپۇل تولەدى.
«بيزنەستى قورعاۋ سىبايلاس جەمقورلىققا قارسى قىزمەتتىڭ نەگىزگى باعىتتارىنىڭ ءبىرى بولىپ تابىلاتىنىن اتاپ وتكەن ءجون. ەگەر ءسىز باقىلاۋشى ورگانداردان رۇقسات الۋ, سونداي-اق مەملەكەتتىك قولداۋ, اتاپ ايتقاندا نەسيە, گرانت, سۋبسيديا الۋ كەزىندە ناقتى پروبلەمالار مەن اكىمشىلىك كەدەرگىلەرگە تاپ بولساڭىز, بۇل تۋرالى سىبايلاس جەمقورلىققا قارسى قىزمەتكە حابارلاۋعا بولادى», دەيدى ءبىرجان حايرۋللين.
اقتورعىن وتەسباي