مارات قاراباەۆ ماڭعىستاۋ وبلىسىنداعى بىرقاتار نىساندى ارالادى

مينيستر «كاسپي» تۇششىلاندىرۋ زاۋىتىنىڭ قۇرىلىس بارىسىمەن تانىستى. مۇنايلى, تۇپقاراعان جانە قاراقيا اۋداندارىنىڭ تۇرعىندارىن سۋمەن تۇراقتى تۇردە قامتاماسىز ەتۋ ءۇشىن بيۋدجەتتىك كرەديتتەۋ شەڭبەرىندە وسى جوبانى ىسكە اسىرۋعا 12,3 ملرد تەڭگە ءبولىندى. قازىر نىساندا قۇرىلىس-مونتاج جۇمىستارى 80%-عا ورىندالعان.

كەلەسى كەزەكتە ۆەدومستۆو باسشىسى كەمەلەردى, قايىقتار مەن تەڭىزگە ارنالعان تەحنيكالاردى جوندەپ, قىزمەت كورسەتەتىن, سونداي-اق كەمە قۇرىلىسى مەن تەڭىز قۇرىلىمدارىنىڭ وندىرىسىمەن اينالىساتىن «كەمە جابدىقتارى جانە سەرۆيس» كومپانياسىنا باردى. اتالعان كومپانيا «بالىقشى» جشس-نە تيەسىلى «اتاش» تەڭىز مۇناي وپەراتسيالارىن قولداۋ بازاسىندا كەمە جوندەۋ جۇمىستارىن جۇرگىزىپ كەلەدى. بۇل ۇيىم قۇرىلعالى بەرى تەحنيكالىق قىزمەت كورسەتۋ بويىنشا 140-تان استام جوبا ءساتتى جۇزەگە استى.

بۇعان قوسا قر يدم باسشىسى «كاسكور-ماشزاۆود» ماشينا جاساۋ كاسىپورنىنىڭ الەۋەتىن باعامدادى. كومپانيا مۇناي-گاز وندىرۋگە ارنالعان جابدىقتاردى شىعارۋعا ماماندانعان. كاسىپورىن جوعارى تەحنولوگيالىق جابدىقتارمەن جاراقتالعان جانە مۇناي-گاز سەكتورى ءۇشىن بىرنەشە كۇردەلى مەتالل كونسترۋكتسياسىن ءوندىرۋدى قوسا العاندا, ونىمدەردىڭ كەڭ سپەكترىن ۇسىنىپ كەلەدى. زاۋىتتىڭ باسشىسى بولات ارقاروۆتىڭ ايتۋىنشا, شىعارىلاتىن ءونىم وبلىستىق, رەسپۋبليكالىق جانە حالىقارالىق دەڭگەيدە كوپتەگەن بەدەلدى كونكۋرس پەن كورمەلەردە جوعارى باعاعا يە بولعان.

«قازىر ءبىزدىڭ كومپانيا مۇناي-گاز سالاسىندا جۇمىس ىستەيتىن قازاقستاننىڭ ءىرى جەتەكشى كومپانيالارىمەن تۇراقتى ارىپتەستىك قارىم-قاتىناس ورناتقان. بىلىكتى قىزمەتكەرلەردەن جاساقتالعان كوماندامىز جوعارى تەحنولوگيالىق جابدىقتاردىڭ كومەگىمەن كەز كەلگەن كۇردەلى ءوندىرىس جوبالارىن جۇزەگە اسىرا الادى. جوسپار بويىنشا ءوندىرىس قۋاتتارىن ودان ءارى نىعايتۋدى, كىرىس پەن نارىق ۇلەسىن ۇلعايتۋدى, حالىقارالىق نارىققا شىعۋدى, سونىمەن بىرگە وندىرىسكە وزىق تەحنولوگيالار مەن كايدزەن ىسكەرلىك فيلوسوفياسىن ەنگىزۋدى كوزدەپ وتىرمىز», دەدى ب.ارقاروۆ.

بۇدان بولەك مارات كارىمجان ۇلى «قازازوت» اق كاسىپورنىنا دا ايالدادى. بىلتىر وسى كومپانيا 310 مىڭ توننا كولەمىندە اممياك سەليتراسىن شىعارىپ, ەكسپورت كولەمى 17,8 مىڭ تونناعا جەتكەن بولاتىن. كاسىپورىندا 1250-دەن استام قىزمەتكەر جۇمىس ىستەپ كەلەدى. باسشىلىقتىڭ ايتۋىنشا, كومپانيا ەڭبەك قاۋىپسىزدىگىنە ەرەكشە كوڭىل بولەدى. ايتالىق, كاسىپورىننىڭ ءار قىزمەتكەرىندە تاۋەكەلدى باعالايتىن ايلىق كارتاسى بار. بۇل كاسىپورىنداعى قاۋىپسىزدىكتى قامتاماسىز ەتەتىن نەگىزگى قۇرالدارداردىڭ ءبىرى.

سونىمەن قاتار م.قاراباەۆ اقتاۋداعى كارىز-تازارتۋ جۇيەلەرىنىڭ جۇمىسىن تەكسەرىپ شىقتى. قازىر قالادا 2 كتج جۇمىس ىستەپ تۇر. حالىق ءوسىمى مەن №1 كتج-ءنىڭ جويىلۋىنا بايلانىستى 2021 جىلى جوبالاۋ-سمەتالىق قۇجاتتاما ازىرلەنىپ, تاۋلىكتىك قۋاتتىلىعى 40 مىڭ تەكشە مەتر بولاتىن №2 كارىز-تازارتۋ قۇرىلىمىن سالۋ بويىنشا مەملەكەتتىك ساراپتامانىڭ وڭ قورىتىندىسى الىندى. اتالعان جوبانىڭ جالپى قۇنى – 7,5 ملرد تەڭگە.