سىبايلاس جەمقورلىققا قارسى ءىس-قيمىل اگەنتتىگى ءبىلىم بەرۋ جۇيەسىندەگى جەمقورلىق تاۋەكەلدەرىنە سىرتقى تالداۋ جۇرگىزىپ, بيۋدجەت قاراجاتىن جىمقىرۋدىڭ تۇراقتى قىلمىستىق سحەمالارىن اشتى.
كەيىنگى ءۇش جىلدا مەملەكەت ءبىلىم بەرۋ سالاسىن دامىتۋعا 12,1 ترلن تەڭگە باعىتتاعان. بۇل 2021-2023 جىلدارعا ارنالعان مەملەكەتتىك بيۋدجەتتىڭ بارلىق شىعىسىنىڭ 28 پايىزىن قۇرايدى. «پەداگوگ مارتەبەسى تۋرالى» زاڭ قابىلدانىپ, مۇعالىمدەردىڭ جالاقىسى ەكى ەسەگە, ال عىلىمي دارەجەسى مەن ساباقتان تىس ساباقتارى بولعان جاعدايدا ءۇش ەسەگە ارتتىرۋعا مۇمكىندىك بەرىلدى.
الەۋمەتتىك قولداۋ شارالارىنا قاراماستان ءبىلىم بەرۋ سالاسى ەڭ كوپ جەمقورلىق جايلاعان سالالاردىڭ ءبىرى بولىپ قالىپ وتىر. 2020 جىلدان باستاپ وسى سالاداعى قىلمىستىق ىستەر بويىنشا 143 ادام سوتتالدى. مەملەكەتكە كەلتىرىلگەن زالال شامامەن 11 ملرد تەڭگەنى قۇرادى, ونىڭ 5,2 ملرد تەڭگەسى وتەلدى. تەك جەتىسۋ وبلىسىندا قالالىق ءبىلىم ءبولىمىنىڭ قىزمەتكەرلەرى 2,5 جىل ىشىندە 4,4 ملرد تەڭگەنى ۇرلاعان. قىلمىستىق توپقا باسشى جانە ەكى ءبىلىم بەرۋ ءبولىمىنىڭ بۋحگالتەرى, سونداي-اق 13 مەكتەپ بۋحگالتەرى كىرگەن. مۇنداي قىلمىستىق سحەمالار ەلدىڭ بارلىق اۋماعىندا انىقتالىپ وتىر. الماتى, شىمكەنت قالالارىندا, قىزىلوردا, اقتوبە جانە الماتى وبلىستارىندا ەڭ ءىرى جىمقىرۋ فاكتىلەرى تىركەلدى.
جەمقورلىق تاۋەكەلدەرىنە سىرتقى تالداۋ ناتيجەلەرى بويىنشا بيۋدجەت اقشاسىن جىمقىرۋدىڭ تۇراقتى تاسىلدەرى انىقتالدى. ماسەلەن, ولاردىڭ قاتارىندا قىزمەتكەرگە ونىڭ لاۋازىمىنا قاراعاندا الدەقايدا كوپ اقشا اۋدارۋ, مەكتەپتە مۇلدەم جۇمىس ىستەمەيتىن ادامدارعا جالاقى تولەۋ, قىزمەتكەردىڭ كارت-شوتتارىنا جالاقى ەسەپتەلىپ, ال تولەمدەردە باسقا ادامنىڭ تەگىن كورسەتۋ, ءبىر ادامعا اقشانى بىرنەشە رەت اۋدارۋ, اقشانى ء«ولى جاندارعا» – تۋىستارى مەن جاقىندارىنا اۋدارۋ سەكىلدى قيتۇرقى جولدار بار.
بۇل جىمقىرۋ ادىستەرى ءبىر سحەما ارقىلى جۇزەگە اسىرىلادى. الدىمەن بۋحگالتەر تولەم قۇجاتتارىن ۆەدومستۆولىق ەسەپ جۇيەلەرىنەن تۇسىرەدى. ءارى قاراي قاجەتتى تۇزەتۋلەر قولمەن ەنگىزىلىپ, بۇرمالانعان مالىمەتتەرى بار قۇجاتتار كەيىن تولەمگە جىبەرىلەدى.