بۇل كۇندەرى الماتىدا ازەربايجاننان شىققان ايگىلى قىلقالام شەبەرى بابي بادالوۆتىڭ «To See, To Read, To Tell» اتتى العاشقى كورمەسى ءوتىپ جاتىر. كۇزگە دەيىن جالعاساتىن دەربەس كورمەنىڭ وزىندىك ەرەكشەلىگى, بادالوۆتى «بەينەلەۋ ونەرىندەگى اقىن» دەسەك تە بولادى.
بادالوۆتىڭ ۆيزۋالدى پوەزياسى ءوز كۇندەلىگى ىسپەتتى. سۋرەتكەر, ءتىپتى ساياحاتشى, ميگرانت, بوسقىن بولسىن, كوشپەلى ءومىر مادەني ينتەگراتسيانىڭ كۇردەلى بەيىمدەلۋ كەزەڭىن تۋدىرىپ قانا قويماي, ەڭ الدىمەن, سول بىرەۋدى ءتىل تۇتقىنىنا اينالدىرۋى ابدەن مۇمكىن. ال بابي بادالوۆ شىعارماشىلىعىندا ماتىندەر سۋرەتكە, ال سۋرەت ماتىنگە اينالادى.
بادالوۆتىڭ ايتۋىنشا, ونىڭ تۋىندىلارىندا جازۋمەن بايلانىستى ەشقانداي دا ءبىر جەلىلىك قيسىن جوق, پوەزيا سوزدە عانا ەمەس, قىلقالام سىزىقتارىندا دا جاتىر.
«بۇل تۋىندىلار زورلىق-زومبىلىق, تاريحي جادىنى ءوشىرىپ تاستاۋ, ءتىس جارماۋ مادەنيەتى, سونىمەن قاتار قوعام تاراپىنان كوبىنەسە ەستىلمەي قالاتىن – مارگينالدانعان ادامدار مەن قاۋىمداستىقتار تاعدىرىنا ارنالادى. بابي بادالوۆتىڭ العاشقى دەربەس كورمەسىن وتكىزىپ وتىرعانىمىزدى مارتەبە تۇتامىز», – دەيدى Aspan Gallery ديرەكتورى مەرۋەرت قاليەۆا.
ايتقانداي, سۋرەتشى قازىر پاريجدە ءومىر ءسۇرىپ, ونەر تۋدىرىپ وتىر. حالىق اراسىندا باربەس دەپ اتالىپ كەتكەن اۋداندا ورنالاسقان بادالوۆتىڭ شەبەرحاناسىن قورشاپ تۇرعان پاريج كوشەلەرىنىڭ الۋان ءتۇرلى ديالەكتىلەرى, كوشە بازارلارى, شىعىس, باتىس, وڭتۇستىك جانە سولتۇستىك ەميگرانتتارىمەن كەلگەن مادەنيەت تۇرلەرىنىڭ ستيحيالىلىعى, سۋرەتشىنىڭ كوركەمدىك تاجىريبەسىنىڭ توسىندىعى مەن ەركىندىگى – وسىنىڭ بارلىعى Aspan Gallery ەكسپوزيتسياسىنا كوشىپ وتىر. مۇندا ءىلۋلى تۇرعان تازا كويلەك-كونشەكتەر مەن تەركويلەكتەردى قاتارىنان ءتىزىپ قويعان كوشە بازارلارىنا دا سىلتەمەلەر بارشىلىق. الايدا ەڭ الدىمەن, قالا ورنەگى بادالوۆتىڭ ءوز جۇمىستارىندا قولداناتىن ماتالارى ارقىلى كورىنەدى. بۇلار – سەكوند-حەند دۇكەندەرىنەن ساتىپ الىنعان, ياكي كوشە بويىنان تابىلعان توسەك جايمالار, پەردەلەر, كيىم, سۇلگىلەر, ياعني, وزىندىك «تاعدىرى» مەن تاريحى بار, ونەر تۋىندىسى رەتىندە ەكىنشى رەت ومىرگە قايتا كەلىپ وتىرعان قاراپايىم زاتتار.
الماتى