استانا تورىندە ءوتىپ جاتقان حالىقارالىق ەرىكتىلەر فورۋمىنا الەمدىك ساراپشىلار قاتىسىپ, ەرىكتىلەردىڭ قوعامداعى ءرولى جايلى ءسوز قوزعادى, دەپ حابارلايدى Egemen.kz.
20-21 ماۋسىم ارالىعىندا وتەتىن حالىقارالىق ەرىكتىلەر فورۋمنىڭ نەگىزگى ماقساتى – ۆولونتەرلىك قوزعالىستى دامىتۋ جانە قولداۋ سالاسىنداعى قازاقستاندىق تاجىريبەنى حالىقارالىق دەڭگەيدە پاش ەتۋ.
وسى تۇستا ءىس-شارا تۋرالى قىزىقتى ءارى ماڭىزدى دەرەك جايلى ايتا كەتسەك, فورۋمنىڭ سيمۆولى «مەيىرىمدىلىك گەنىن» بەينەلەيتىن دنق فراگمەنتى بولدى. سەبەبى دنق جىنىسىنا, جاسىنا, ۇلتىنا جانە باسقا دا ەرەكشەلىكتەرىنە قاراماستان بارلىق ادامدارعا بىردەي ءتان. بۇل پلانەتامىزداعى ءار ادام ءبىر-بىرىنە بىردەي مەيىرىمدى بولىپ, تەك ىزگى امالداردى ىستەۋ قاجەت ەكەنىن بىلدىرەدى.
فورۋم اياسىندا حالىقارالىق ۆولونتەرلىك ۇيىمداردىڭ قىزمەتى, ازاماتتىق باستامالاردى قولداۋداعى كورپوراتيۆتىك جاۋاپكەرشىلىكتىڭ ءرولى, ەكولوگياداعى, ءبىلىم بەرۋدەگى, دەنساۋلىق ساقتاۋداعى جانە توتەنشە جاعدايلارداعى ۆولونتەرلىك تاقىرىپتار كەڭىنەن تالقىلاندى.
ماڭىزدى ءىس-شارادان تىسقارى قالماي, ات باسىن استاناعا بۇرىپ كەلگەن حالىقارالىق ساراپشىلار مەن الەمنىڭ ەڭ بەدەلدى ۇيىمدارىنىڭ مۇشەلەرى دە پىكىرلەرىن ورتاعا سالدى.
ماسەلەن, بۇۇ-نىڭ قازاقستان رەسپۋبليكاسىنداعى تۇراقتى ۇيلەستىرۋشىسى ميكاەلا فريبەرگ-ستوري ۆولونتەرلىك قىزمەتتىڭ ماڭىزدىلىعىنا توقتالدى.
«قاي جەردە ۆولونتەر بولىپ قىزمەت ەتىپ, كىمگە جاردەم بەرسەڭىز دە – ونىڭ ماڭىزى زور. مەيلى, بۇل افريكا بولسىن, كورشى ءۇيدىڭ بالاسى بولسىن, ەرىكتىلەر كەز-كەلگەن مۇقتاج جانعا مەيىرىمدى بولۋى كەرەك. بۇگىندە قاراپايىم ادامدار ۆولونتەر بولۋ ارقىلى قوعامنىڭ دامۋىنا زور ۇلەس قوسىپ وتىر. تازا پەيىل مەن يگى ىستەر ادامعا قۋانىش سىيلاپ, ءومىردىڭ كەز-كەلگەن سالاسىندا جەتىستىككە جەتەلەيدى», دەدى ميكاەلا فريبەرگ-ستوري.