اقمولا وبلىسى, كوكشەتاۋ قالاسىنىڭ يپپودرومىندا جامبى اتۋ (ات ۇستىندەگى ساداق اتۋ) مەن تەڭگە ىلۋدەن جاسوسپىرىمدەر, جاستار, ەرەسەكتەر اراسىنداعى ەل چەمپيوناتى ءوتىپ جاتىر, دەپ حابارلايدى Egemen.kz.
چەمپيونات اياسىندا قر جامبى اتۋ فەدەراتسياسى كەزەكتەن تىس كونفەرەنتسيا وتكىزدى. كونفەرەنتسيا بارىسىندا فەدەراتسيا ۇجىمى ەلىمىزدەگى جامبى اتۋ سالاسىنداعى ماماندار مەن سپورتشىلارعا 2023-2027 جىلدارعا ارنالعان دامۋ باعدارلاماسىن تانىستىردى.
جامبى اتۋ رەسمي ۇلتتىق سپورت رەتىندە كەش دامىعان سپورت ءتۇرى (2014 جىلى تىركەلگەن). سول سەبەپتى دە قابىلدانعان ستراتەگيالىق باعدارلاما ارقىلى ات ۇستىندە ساداق اتۋ ونەرىن حالىقارالىق ارەنادا دامىتۋعا جول اشپاق.
سونداي-اق كونفەرەنتسيادا 2024 جىلى وتەتىن V دۇنيەجۇزىلىك كوشپەندىلەر ويىندارىنا دايىندىق ماسەلەسى پىسىقتالدى. فەدەراتسيا پرەزيدەنتى ەركەبۇلان يلياسوۆ («AlageumGroup» جشس باس ديرەكتورى) باپكەرلەر مەن سپورتشىلاردى جىگەرلەندىرۋ ماقساتىندا دكو-دا ۇزدىك ونەر كورسەتكەن سپورتشىعا پاتەر, باپكەرىنە قارجىلاي سىيلىق بەرەتىنىن ايتتى.
ەلىمىزدە سپورتشىلارعا ساداق دايىندايتىن ارنايى ءوندىرىس ورنى جوق, وسى ماسەلە دە الداعى ۋاقىتتا شەشىمىن تاۋىپ, مەرگەندەر ءوز ەلىمىزدە وندىرىلگەن زامانۋي ساداقتارمەن ونەر كورسەتەتىن بولادى.
اتالعان كونفەرەنتسياعا جامبى اتۋ سپورتىن دامىتۋعا اتسالىساتىن ۇلتتىق جانە ات سپورتى تۇرلەرى ورتالىعى ديرەكتورى باقداۋلەت ءسابيتوۆ, قر ۇلتتىق سپورت قاۋىمداستىعىنىڭ باس حاتشىسى تاستانبەك ەسەنتاەۆ تا قاتىسىپ, ءوز تاراپتارىنان بارىنشا قولداۋ كورسەتەتىنىن ايتتى.
اتالعان ەل چەمپيوناتى 23 ماۋسىمعا دەيىن جالعاسادى.