ىشكى ىستەر ءمينيسترى مارات احمەتجانوۆ اباي وبلىسىنداعى ورتكە قاتىستى تەرگەۋ امالدارى قارقىن العانىن حابارلادى. قازىرگى ۋاقىتتا قۇزىرلى ورگاندار ءۇش نۇسقانى قاراستىرىپ جاتىر, دەپ جازادى Egemen.kz.
باق وكىلدەرىنە سۇحبات بەرگەن مينيستر ءورتتىڭ بولجامدى سەبەپتەرىن اتادى.
«تەرگەۋ ءجۇرىپ جاتىر, ازىرگە ءۇش نۇسقا بار. ءىس ارنايى پروكۋرورلاردىڭ وندىرىسىنە قابىلداندى. بۇل توپتا ءىىم قىزمەتكەرلەرى دە بار. قۇزىرلى ورگاندار قاساقانا ورتەۋ, نەمقۇرايدىلىق جانە نايزاعاي جارقىلىنا قاتىستى ءۇش نۇسقانى قاراستىرىپ جاتىر. ساراپتامالار مەن ىزدەستىرۋ ءىس-شارالارى جالعاسادى. تەرگەۋگە ەكى اي ۋاقىت بەرىلدى», دەدى مارات احمەتجانوۆ ۇكىمەت الاڭىندا.
وسى تۇستا ۆەدومستۆو باسشىسى ەكس-مينيستر يۋري يلينگە قاتىستى تەكسەرۋ جۇرگىزىلەتىنىن قوسا ايتتى.
«پرەزيدەنت باس پروكۋرورعا تاپسىرما بەردى, ونىڭ شەڭبەرىندە اۋقىمدى تەكسەرۋ جۇرگىزىلەدى. وكىنىشكە قاراي, توتەنشە جاعداي كەزىندە ادامدار كوز جۇمدى, سوندىقتان بارلىعى قىلمىستىق ءىس اياسىندا تەكسەرىلەدى», دەپ ءتۇسىندىردى ىشكى ىستەر ءمينيسترى.