ەگەر جازۋشى وقىرمانىن, سۋرەتشى كورەرمەنىن سەلت ەتكىزىپ, وي سالماسا – ول تۋىندى ومىرشەڭ بولا الا ما؟ ەندەشە, وقىرمان وسى جولى قوعامنىڭ كوكەيكەستى ماسەلەلەرىن سۋرەتىمەن سويلەتەتىن ساۋلە سۇلەيمەنوۆانىڭ پوليەتيلەن, تسەللوفان پاكەتتەردەن جاسالعان «شىڭجاڭدى تازالاۋ», «قانداستار تۋرالى داستان» سەرياسىنا قالىڭ قاعازعا بالاۋىزبەن باسىلعان «I love you», «Sunset Workers», «Kazakh cancan», «Green Bus», «Barakholka» سەرياسىنداعى «Bazar Busstop-1» تۋىندىلارىنا زەر سالىپ كورىڭىزشى.
وزىندىك مانەرى بار اۆتور قازىرگى تاڭدا سۇرانىسقا يە سۋرەتشىلەردىڭ قاتارىندا. ساۋلەنىڭ تۋىندىلارى Sharjah Art Foundation, Alain Servais كوللەكتسياسى, ەۋرازيالىق مادەني اليانس, ءا.قاستەەۆ ونەر مۇراجايى سىندى گالەرەيالاردا تۇر.
سۋرەتشى شىعارماشىلىعىنداعى وسىناۋ ادىسكە قوعامنىڭ تابيعات-اناعا دەگەن كوزقاراسى تۇرتكى بولعان. «قايبىر جىلدارى استانا مەن الماتى اراسىندا پويىزبەن ءجيى ساپارلادىم. جازىق دالامەن ءارى-بەرى وتكەندە قىزعالداقتار جايقالعان مەزگىلدى كورگىم كەلەتىن. الايدا ونىڭ ورنىنا پلاستيك شولمەكتەر مەن پاكەتتەردىڭ شاشىلىپ جاتقانىنا ءىشىم اشيتىن. دالا – ءبىزدىڭ ءرامىزىمىز, ەل ماقتانىشى, ءتىپتى بارلىق جەردە پلاستيك قوقىس جايراپ جاتسا دا, ءبارىمىز وسى دارحان دالامىزبەن ماقتانامىز. تسەللوفان قالتالار جەر-كوكتە ۇشىپ ءجۇر, ءوسىپ تۇرعان شوپتەر مەن اعاشتارعا جابىسىپ, جەر-جەردە شاشىلىپ جاتادى. ءبىر قىزىعى, ولار ەرىپ, جوق بولىپ تا كەتپەيدى. مىنە, بۇل – كەزەڭنىڭ دەرتى», دەيدى ساۋلە سۇلەيمەنوۆا.
سۋرەتشىنى تولقىتقان وسىنداي ىشكى تولعانىستار ءۇنى ونەرىنە اۋىسقان.
«تسەللوفان پاكەتتەردى قالاي پايدالانۋعا بولاتىنىن ويلاستىرا باستاعاندا, ونىڭ ەشتەڭەگە دە جابىسپايتىنىن بايقادىم. ول تەك جوعارى تەمپەراتۋرادا ەرىتىلگەندە عانا ەكىنشى پلاستيككە جابىسادى ەكەن. سوندىقتان ماعان جەلىم پيستولەت پەن پوليگال (قالىڭ ءمولدىر پلاستيكالىق پاراقتار) قولدانۋعا تۋرا كەلدى. ءبىر جاعىنان, ول قوقىس, بىراق ونىڭ مۇلدەم جوق بولىپ كەتپەيتىنىنە زەر سالساق, پلاستيكتى قىمبات مەتالل نەمەسە مۇناي ءونىمى, التىنمەن پارا-پار دەپ قاراۋعا دا بولادى. پاكەتتەردىڭ مولدىرىنەن باستاپ, اق, ءتۇرلى-ءتۇستى كەمپىرقوساق سىندى, ءتىپتى قارا تۇسكە دەيىنگى بارلىق ءتۇستى تابۋعا بولادى. سول سەكىلدى, ونداعى جارناما ماتىنىندە, برەند اتاۋىندا جانە باسقا دا سىرتىندا باسىلعان اقپاراتتاردا جازىلعان سوزدەردە نەشە ءتۇرلى وي, پايىم بار. مۇنىڭ ءبارى تۋرا ءبىزدىڭ ءومىرىمىز سەكىلدى, قيلى-قيلى, اششى دا ءتاتتى, كۇلكىلى دە قورقىنىشتى, ادەمى ءارى سۇرىقسىز», دەيدى سۋرەتشى.
س.سۇلەيمەنوۆانىڭ استانادا وتكەن «Milestone» اتتى جەكە كورمەسىن ۇيىمداستىرعان تاۋەلسىز ارت-كەڭەسشى ۆلاديسلاۆ سلۋدسكي: «سۋرەتشى 1993 جىلدارداعى جاعداي, ناتيۋرمورت, گۇل, جەكە وقيعادان باستايدى دا, ارۋاق, استانا-لاين, ۋربانيزاتسيا, وتكەنىمىز بەن بولاشاعىمىز ارقىلى ساياسي, الەۋمەتتىك ماسەلەلەرگە ويىسادى. ونىڭ «جۇمىسشىلار» دەگەن كارتيناسىن الىپ قاراڭىزشى. نەگىزى مۇنداي تاقىرىپقا كوپ سۋرەتشى بارا بەرمەيدى. «ارۋاقتار» دەگەن كارتيناسىن دا جەكەلەگەن ادامدار مەن ساياساتتىڭ ورتاسىنداعى كوپىر دەپ ەسەپتەيمىن. سۋرەتشىنىڭ ساياسي تاقىرىپتاعى تۋىندىلارىن كورەرمەن جىلى قابىلدايدى. ءبىر قۋانىشتىسى, سۇلەيمەنوۆا حالىقارالىق دەڭگەيدە دە جوعارى باعالانىپ ءجۇر. ءدال قازىر ونىڭ تۋىندىلارى ديۋنكەرك قالاسىنداعى FRAC Grand Large – Hauts-de-France مۇراجايىندا تىنىمال سۋرەتشىلەردىڭ ەڭبەگىمەن قاتار تۇر», دەيدى.
الماتى