كاسىپكەرلەرمەن كەزدەستى

ۇكىمەت باسشىسى سوڭعى ءۇش جىلدا وسى وبلىستاردا 59 مىڭنان استام بيزنەس جوباسى مەملەكەتتىك قولداۋ شارالارىمەن قامتىلعانىن اتاپ ءوتتى. اتاپ ايتقاندا, 1,5 ترلن تەڭگەگە 28 مىڭ جوبانىڭ سىياقى مولشەرلەمەسى سۋبسيديالاندى. ونىڭ ىشىندە ورتا بيزنەستىڭ جالپى سوماسى 406 ملرد تەڭگە بولاتىن 2,5 مىڭنان استام جوباسى قولداۋ تاپتى. سونىمەن قاتار 12 مىڭ سۋبەكتىگە 487 ملرد تەڭگەگە جەڭىلدىكپەن قارجىلاندىرۋ ۇسىنىلدى, ونىڭ ىشىندە 102 ملرد تەڭگەگە 167 ورتا بيزنەس وكىلدەرىنىڭ جوبالارى قارجىلاندىرىلدى.

«سالالار بويىنشا قولداۋ شارالارى وڭدەۋ ونەركاسىبى, كولىك, قۇرىلىس, اۋىل شارۋاشىلىعى, ساۋدا سالالارىنا, سونداي-اق دەنساۋلىق ساقتاۋ جانە ءبىلىم بەرۋ سالالارىنداعى الەۋمەتتىك جوبالارعا باعىتتالدى», دەدى ءاليحان سمايىلوۆ.

كەزدەسۋ بارىسىندا كاسىپكەر­لەر بالىق سالاسىن دامىتۋدىڭ, اتاپ ايتقاندا, جابدىقتاردى جاڭارتۋ, ينفراقۇرىلىمدى جاڭعىرتۋ, وزىق ستاندارتتار ەنگىزۋ جانە ءونىم ەكسپورتى, مۇناي-گاز ماشينا جاساۋ سالاسىنداعى يمپورتتى الماستىرۋ, مۇناي سەرۆيسىن قولداۋ, باتىس وڭىرلەردىڭ كولىك-لوگيستيكالىق مۇمكىندىكتەرىن كەڭەيتۋ, سالىق سالۋ جانە باسقا دا بىرقاتار وزەكتى ماسەلەنى كوتەردى.

ماسەلەن, «ەدىل-ورال.kz» جشس وپەراتسيالىق ديرەكتورى ۆياچەسلاۆ كوندراشيحين مۇناي-گاز يندۋسترياسى ءۇشىن جالپى قۇنى 3,9 ملرد تەڭگە بولاتىن جابدىقتار وندىرەتىن جاڭا جوبانى تانىستىرىپ, مەملەكەت تاراپىنان بەرىلەتىن پرەفەرەنتسيالار بويىنشا جاردەمدەسۋدى سۇرادى.

پرەمەر-مينيستر بۇگىنگى تاڭدا قازاقستانداعى ينۆەستورلار ءۇشىن مەملەكەتتەن قولداۋ مەن پرەفەرەنتسيالار الۋدىڭ بىرقاتار تەتىگى جۇمىس ىستەيتىنىن اتاپ ءوتتى. اتاپ ايتقاندا, مۇنداي جەڭىلدىكتەر ارنايى ەكونوميكالىق ايماقتاردىڭ قاتىسۋشىلارىنا جانە ينۆەستيتسيالار تۋرالى كەلىسىم اياسىندا كوزدەلگەن.

ء«بىز ولاردى جاڭا جوبالار ءۇشىن ارنايى ازىرلەدىك. ماشينا جاساۋ سالاسىنا كەلەتىن بولساق, قازىر بىزدە ارنايى كەشەندى دامۋ جوسپارى ازىرلەنۋدە, وندا دا بىرقاتار قولداۋ شاراسى كوزدەلەتىن بولادى. ءبىز ماشينا جاساۋ كومپانيالارى ققس تولەمەي (ەسەپكە الۋ ادىسىمەن), اكەلە الاتىن جابدىقتار مەن قۇرامداس بولىكتەردىڭ تىزبەسىن كەڭەيتتىك. سونداي-اق «دامۋ» قورىنىڭ جەلىسى بويىنشا ينۆەستيتسيالىق جوبالاردى ىسكە اسىرۋ كەزىندە پايىزدىق مولشەرلەمەنى سۋبسيديالايتىن ارنايى ء«وندىرىس» شاعىن باعدارلاماسىن ىسكە قوسۋ جوسپارلانىپ وتىر», دەدى ءاليحان سمايىلوۆ.

تاعى ءبىر وزەكتى ماسەلە «سارجا» كوپفۋنكتسيونالدى تەڭىز تەرمينالىن سالۋ اياسىندا تەڭىز ءتۇبىن تەرەڭدەتۋ جۇمىستارىن جۇرگىزۋگە قاتىستى بولدى. پرەمەر-مينيستر ۋاكىلەتتى مەم­لە­كەتتىك ورگاندارعا جوبانى ىسكە اسىرۋ مەرزىمدەرىن كەشىكتىرمەي, ماسەلەنى جەدەل پىسىقتاۋدى تاپسىردى.

سونىمەن قاتار وتىرىسقا قاتىسۋشىلار باتىس وڭىرلەر ءۇشىن تۇيە شارۋاشىلىعى سياقتى اوك-تەگى الەۋەتى زور باعىتتى دامىتۋ, فارماتسەۆتيكالىق ونىمدەر ءون­دىرىسىن ۇلعايتۋ, وتاندىق كوم­پا­نيا­لاردىڭ جەر قويناۋىن پاي­دا­لانۋشىلاردىڭ ساتىپ الۋ­لارى­نا قولجەتىمدىلىگىن كەڭەيتۋ جانە باسقا دا بىرقاتار ماسەلەنى تالقىلادى.

بارلىق كوتەرىلگەن ماسەلە بو­يىنشا ورتالىق مەملەكەتتىك ورگان­داردىڭ, ۇلتتىق كومپانيالاردىڭ, وبلىس اكىمدىكتەرىنىڭ باسشىلارى جاۋاپ بەرىپ, پروبلەمالىق ماسەلەلەردى باقىلاۋعا الدى.

تالقىلاۋدى قورىتىندىلاي كەلە, پرەمەر-مينيستر ۇكىمەت ورتا كاسىپكەرلىكتى دامىتۋ مەن كەڭەيتۋ ءۇشىن بارىنشا قولايلى جاعداي جاساۋدى جالعاس­تىرا­تىنىن اتاپ ءوتتى.

«بۇگىندە سىزدەردىڭ وڭىرلەرى­ڭىزدە تەك 517 ورتا بيزنەس سۋبەك­تىسى جۇمىس ىستەيدى. بۇل – ورتا بيزنەستى قۇرۋ, دامىتۋ, كەڭەي­تۋ الەۋەتى تولىق پايدالانىل­ماي, ول ەكونوميكانى ارتا­راپتاندىرۋعا جانە ەكونومي­كالىق ءوسىمدى ارت­تىرۋعا ىقپال ەتە الماي جاتىر دەگەن ءسوز. ءبىز ورتا بيزنەستىڭ بار­لىق باستاماسىن بەلسەندى تۇردە قولداپ, ولاردىڭ تەزدەتىپ ىسكە اسىرىلۋىنا جاردەم بەرەتىن بولامىز», دەدى ءاليحان سمايىلوۆ.

ۇكىمەت باسشىسى وڭىرلەردىڭ اكىم­دىكتەرى ينفراقۇرىلىم جۇر­گىزۋ, جەر ۋچاسكەلەرىن ءبولۋ جانە ولاردىڭ قۇزىرەتىنە كىرەتىن باس­قا دا ماسەلەلەر بويىنشا كورسە­تى­لەتىن قولداۋ دەڭگەيىن ارتتىرۋى قاجەت ەكەنىن ايتتى. وڭىرلىك دامۋ ينستيتۋتتارى دا ورتا بيزنەسپەن ىنتىماقتاستىقتى كەڭەيتۋى كەرەك.

ء«ار اكىمدىك الاڭىندا كاسىپ­كەر­لەردىڭ ماسەلەلەرىن شەشۋ بويىنشا جۇيەلى كەزدەسۋلەر وتكىزۋ قاجەت. بيزنەس مەملەكەتتىك باسقارۋدىڭ بارلىق دەڭگەيىندە قولداۋدى سەزىنۋى كەرەك»,  دەدى ءاليحان سمايىلوۆ.