ءبىر كەزدەرى انالارىمىزدىڭ قولىنان تۇسپەگەن ۇرشىق بۇگىندە ەستەلىككە, جادىگەرگە اينالىپ بارادى. بۇرىن قولىنا ۇرشىق ۇستاماعان جاندى كەزدەستىرۋ سيرەك بولسا, قازىر ۇرشىقتى شىرق ۇيىرەتىندەردى اۋىل-اۋىلدان ىزدەپ تاۋىپ, ءوزارا سايىستىرۋ دا قاسيەتتى مۇرانى جوعالتپاۋدىڭ, ناسيحاتتاۋدىڭ ءبىر دالەلى.
مامىر ايىنىڭ مامىراجاي كۇندەرىنىڭ بىرىندە اقتاۋ قالاسىندا ماڭعىستاۋ وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعىنىڭ قولداۋىمەن ء«سوز بەن ساز» باعدارلاماسىنىڭ «ۇمىتپايىق, ۇلىقتايىق ۇرشىقتى» اتتى رۋحاني ءىس-شارا ءوتتى. وڭىردەگى ەكى قالا مەن بەس اۋداننان قاتىسقان 46 ۇمىتكەردىڭ ىشىنەن ىرىكتەۋ تۋرىنان 15 ۇمىتكەر ءوتتى. قاتىسۋشىلار اراسىندا 73 جاستان اسقان اجەلەر مەن 39 جاستاعى انالار بار. ولكەگە تانىمال كونەكوز اپالار قازىلىق ەتكەن سايىستا شيرەك فينالعا ون ادام ءوتىپ, ءوز كەزەگىندە جارتىلاي فينالعا جەتى ادام جىبەرىلدى, ال اقتىق سىندا 5 ۇمىتكەر باق سىناستى. ناتيجەسىندە, مۇنايلى اۋدانىنان كەلگەن ەڭ جاس قاتىسۋشى ۆ.پالۋانوۆا باس جۇلدەگەر بولىپ, ماڭعىستاۋ وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعى تاعايىنداعان 150 000 تەڭگەگە يە بولدى. وزگە دە جۇلدەگەرلەرگە باعالى سىيلىقتار تابىستالدى. سايىس بارىسىنداعى كونتسەرتكە وڭىرگە تانىمال ونەرپازدار مەن «جىبەك» جەتىگەن مەكتەبى, «ناراتۋ» دومبىراشىلار ءانسامبلى جانە «ارنا» توبى قاتىستى. اۋلادا ۇلتتىق قولونەر شەبەرلەرى مەن ۇلتتىق تاعامداردىڭ كورمەسى ۇيىمداستىرىلىپ, جەڭىسكە جەتە الماسا دا قاتىسقان بارلىق ۇمىتكەر ۇلتتىق ناقىشتاعى سىيلىقتارمەن, العىس حاتتارمەن ماراپاتتالدى.
اق جاۋلىقتى اجەلەر ۇلتتىق قۇندىلىقتاردى ناسيحاتتايتىن رۋحاني شارالاردىڭ ءجيى ۇيىمداستىرىلۋىنا تىلەكشى ەكەندىكتەرىن, تەك سايىسىپ قانا قويماي, وسىنداي بايقاۋلار ارقىلى جاستارعا ءوز بىلگەندەرىن ۇيرەتۋگە بولاتىندىعىن جەتكىزدى.
ماڭعىستاۋ وبلىسى