جالپىۇلتتىق سوتسيال-دەموكراتيالىق پارتياسى فراكتسياسىنىڭ مۇشەسى ناۋرىز سايلاۋباي اقپارات جانە قوعامدىق دامۋ ءمينيسترى دارحان قىدىرالىگە, مادەنيەت جانە سپورت ءمينيسترى اسحات ورالوۆقا بالالار كونتەنتى, وتاندىق انيماتسيالىق ونىمدەردى دامىتۋ تۋرالى دەپۋتاتتىق ساۋال جولدادى, دەپ حابارلايدى Egemen.kz.
ءماجىلىس دەپۋتاتى ناۋرىز سايلاۋباي وتاندىق كينو سالاسىندا وزەكتى بولىپ وتىرعان ماسەلەنى قايتا كوتەرىپ, بالالارعا ارنالعان ونىمدەردىڭ سانىن كوبەيتۋ قاجەت ەكەنىن ايتتى.
«بۇگىنگى بالالار – ەرتەڭگى بولاشاعىمىز. ال قازىر ولار بويىنا قانداي قۇندىلىقتاردى ءسىڭىرىپ جاتىر؟ مۋلتفيلم – تاربيە قۇرالدارىنىڭ ءبىرى. الايدا فيلوسوفيالىق ءمانى مەن زاماناۋي ەلەمەنتتەرى بار قازاقشا انيماتسيالىق فيلمدەر ءالى دە جەتكىلىكسىز. وزدەرىڭىزگە ءمالىم, قازىر شەكسىز عالامتور الەمدىك نارىققا جول اشىپ جاتىر. ونداعى اقپاراتتى وسكەلەڭ ۇرپاق تالعاماي تۇتىنىپ وتىر. ماسەلەن, بۇلدىرشىندەر يۋتۋب جەلىسىنەن انيماتسيالىق بەينەلەردى وزدەرى تاۋىپ قارايدى. ەسەسىنە پسيحولوگياسى قالىپتاسىپ ۇلگەرمەگەن بالالاردىڭ ءتىلى شۇبارلانىپ جاتىر. ء«الىپتى تاياق دەپ بىلمەيتىن» ويى بەكىمەگەن بالالار, ءتىپتى, قاي ءسوز قاي تىلگە تيەسىلى ەكەنىن اجىراتا المايدى», دەدى ءماجىلىس دەپۋتاتى.
بۇل رەتتە ناۋرىز سايلاۋباي الەم نارىعىنداعى ونىمدەردى تۇتىناتىن بالالار ۇلتتىق قۇندىلىقتاردان بەزەتىنىن تىلگە تيەك ەتتى.
«قازىرگى تاڭدا قازاقستان اۋماعىندا 25 مۋلتكانال جۇمىس ىستەسە, ونىڭ 24-ءى شەتەلدىك ارنالار. ءاربىر ەلدىڭ جاساعان ءونىمى ءوزىنىڭ دىنىنە, مادەنيەتىنە, تۇسىنىگىنە ساي بولادى عوي. سول سەبەپتى شەتەلدىك مۋلتفيلمدەردىڭ كەيىپكەرلەرى بالالاردىڭ «يدەالىنا» اينالىپ وتىر», دەدى دەپۋتات.
ءماجىلىس دەپۋتاتى «Balapan» تەلەارناسىنا باسەكەلەس بولارلىق ارنالاردىڭ اشىلۋى مەن وتاندىق انيماتسيانىڭ دامۋىنا ءتيىستى قارجى بولىنبەيتىنىن قوسا ايتتى.
«بىلتىر انيماتور عالي مىرزاشەۆ ديماش قۇدايبەرگەندى مۋلتفيلمگە پروتوتيپ رەتىندە ۇسىنعان ەدى. سول بەينەدە ۇلتتىق قۇندىلىقتارىمىزدى كورسەتكىسى كەلدى. الايدا وتاندىق ونىمگە قارجىنىڭ جوقتىعى كەدەرگى بولىپ وتىر», دەدى ناۋرىز سايلاۋباي.
دەپۋتاتتىڭ ايتۋىنشا, قازاق ءمۋلتفيلمى وتاندىق كينونىڭ تاساسىندا قالىپ وتىر. بولىنەتىن قارجىنىڭ 80 پايىزى ەرەسەكتەرگە ارنالعان كينونىڭ ەنشىسىندە كەتەدى. ارنايى زاڭنىڭ جوقتىعى مۋلفيلمگە بولىنەتىن بيۋدجەتكە دە اسەر ەتەدى.
ءماجىلىس دەپۋتاتى كينو مەن مۋلتفيلمگە باعىتتالاتىن قارجىنى بولەك قاراستىرۋدى جانە امەن قايداردىڭ اتىن بەرىپ, جاڭادان ارنايى جەكە ستۋديا اشۋدى ۇسىندى.