شىنايى شىعارما ەرەك تاعدىردان تۋادى. ۇلت جانى سىنعا تۇسكەن ۋاقىتتا قارۋ مەن قالامىن قاتار ۇستاعان جازۋشىلار شىعارماشىلىعى پىكىرىمىزگە ايعاق. وشپەس ونەگە, ومىرشەڭ تۋىندىلارىمەن رۋحاني قورىمىزدى بايىتقان كوركەمسوز شەبەرىنىڭ ءبىرى – اسكەن نابيەۆ.
12 مامىر كۇنى ەكىنشى دۇنيەجۇزىلىك سوعىسىنىڭ ارداگەرى, بەلگىلى جۋرناليست-جازۋشى اسكەن نابيەۆتىڭ 100 جىلدىعىنا ارنالعان «بارمىسىڭدار, ارمىسىڭدار بابالار» اتتى ەسكە الۋ كەشى ءوتتى.
كەشكە قازاقستاننىڭ تۇڭعىش عارىشكەرى توقتار اۋباكىروۆ, جازۋشى جابال ەرعاليەۆ, جۋرناليست ءبادۋان يماش ۇلى سىندى بەلگىلى ازاماتتار قاتىستى.
مەرەكەلىك شارا اسكەن نابيەۆتىڭ شىعارمالارى بويىنشا مايدان ومىرىنەن سىر تارتقان تەاترلىق قويىلىممەن اشىلدى. قويىلىم ارقىلى كورەرمەن قان-قاساپ سوعىس جىلدارىنا وي جىبەرىپ, ەرلىككە تولى ءومىر ورنەگىن كوردى. مۇنان سوڭ پرەزيدەنت اكىمشىلىگى باسشىسىنىڭ ورىنباسارى ايدا بالاەۆانىڭ قۇتتىقتاۋ حاتىن قالالىق ىشكى ساياسات باسقارماسىنىڭ ءبولىم باسشىسى ايدانا باقىتجانقىزى وقىدى.
– دارىندى جازۋشى, قارىمدى جۋرناليست سوعىس ارداگەرى اسكەن نابيەۆتىڭ 100 جىلدىق مەرەيتويىنا ارنالعان ەسكە الۋ كەشى قۇتتى بولسىن. اسكەن اتامىز سۇراپىل سوعىس جىلدارى جانقيار ەرلىك پەن وتانىن قورعاعان ەرجۇرەك باتىرلار ساپىنداعى تاۋ تۇلعا. سوندىقتان بولاشاق ءۇشىن كەۋدەسىن وققا توسىپ, باسىن بايگەگە تىككەن ارداگەر اتامىزدى ەسكە الۋعا ارنالعان عاسىر تويى ءبىر اۋلەتتىڭ عانا ەمەس, تۇتاس حالىقتىڭ قۋانىشى, –دەدى ول.
سونىمەن قاتار پارلامەنت سەناتىنىڭ توراعاسى ماۋلەن اشىمباەۆ پەن اقپارات جانە قوعامدىق دامۋ ءمينيسترى دارحان قىدىرالىنىڭ قۇتتىقتاۋ حاتتارى وقىلدى.
مۇنان سوڭ قالامگەرمەن قاتار جۇرگەن جۋرناليست ءبادۋان يماش ۇلى ەسكى جىلداردان سىر تارتتى.
– اسكەن اعامەن سوناۋ وتكەن عاسىردىڭ 1966 جىلى قورعالجىن اۋدانىنىڭ مادەنيەت سارايىندا تانىسىپ ەدىك. ول كەزدە مەكتەپ وقۋشىسىمىن. مەكتەپتە قولىمىزدان قالام تۇسپەيتىن, ولەڭ جازاتىنبىز. بىردە اقمولادان قورعالجىنعا اسكەن اعامىز, نۇرعوجا وراز, سەيىتجان وماروۆ, تاعى دا بەس-التى اقىن-جازۋشى كەلىپ مەكتەپتە كەزدەسۋ كەشىن وتكىزدى. سوندا اسەكەڭ باستاعان قاۋىم ارقايسىمىزعا جول كورسەتىپ, جوبا نۇسقادى. اعامىز زيالى, ءجۇزى جارقىن, بولمىسى بيىك ەدى. كەيىن ارىپتەس بولىپ, بىرگە قىزمەت ىستەدىك. اسكەن اعامىز جازۋشىلىعىمەن قاتار كوپتەگەن پۋبليتسيستيكالىق دۇنيەلەر جازدى. ادامگەرشىلىگى مول, ار-ۇياتى جوعارى جان ەدى,– دەدى ول.
سونىمەن قاتار جازۋشىنىڭ ۇلى, قوعام قايراتكەرى مارات اسكەن ۇلى ءسوز الىپ, اكەسى جايلى جايدارى ەستەلىگىمەن ءبولىستى.
– ءبىز وتباسىمىزدا ون بالامىز. اكەم بالا كۇنىمىزدەن ءارتۇرلى اسپاپتا ويناپ, كۇردەلى شىعارمالار تىڭداتاتىن. بىزگە مۇنىڭ ءبارى قالىپتى دۇنيەدەي كورىنەتىن, الايدا جىلدار وتكەن سوڭ بۇل ۇلكەن ونەر ەكەنىن باعامدادىق. اقمولادا وقىعان تۋىستارىمىزدىڭ كوبى ءبىزدىڭ ۇيدە تۇردى. كەيدە اكەم ءان باستاپ, ءبارىمىز سوعان قوسىلاتىنبىز. اكەم باسىلىمعا فەلەتوندار جازىپ, كەلەڭسىز دۇنيەلەردى سىناپ وتىراتىن. ادىلەتسىزدىككە, جالعاندىققا جانى قاس ەدى. ءوزى ۇزاق جاساپ نەمەرە, شوبەرە كورىپ ۇلگەردى. قازاقتا ء«ولى ريزا بولماي, ءتىرى بايىمايدى» دەگەن ماقال بار. بارلىقتارىڭىزعا العىسىمدى بىلدىرەمىن, – دەدى.
كەش سوڭىندا مارات اسكەن ۇلى قادىرلى قوناقتاردى «اسكەن نابيەۆكە 100 جىل» مەرەيتويلىق توسبەلگىسىمەن ماراپاتتاپ, ريزاشىلىق ءبىلدىردى.
مەرەيتويدا «قورقىت» ەتنو-ءانسامبلى ونەر كورسەتىپ, كەشتىڭ كورىگىن قىزدىردى. سونداي-اق مەرەكەلىك ءىس-شارا اياسىندا قالامگەردىڭ ءومىرى مەن شىعارماشىلىعىنا ارنالعان فوتوكورمە ۇيىمداستىرىلدى.
ايتا كەتەيىك, اسكەن نابيەۆكە ارنالعان ءىس-شارا مۇنىمەن توقتاماق ەمەس, الداعى ۋاقىتتا مەرەيتوي اياسىندا عىلىمي-تاجىريبەلىك كونفەرەنتسيالار, كورمەلەر, رەسپۋبليكالىق ۇزدىك شىعارمالار جانە كوركەمسۋرەت بايقاۋلارى مەن ت.ب. ءىس-شارالار ۇيىمداستىرۋ جوسپارلانىپ وتىر.