تاياۋدا «اتامەكەن» ۇلتتىق كاسىپكەرلەر پالاتاسىنىڭ الاڭىندا جاڭا سالىق كودەكسىنە بايلانىستى جۇمىس توبىنىڭ كەزەكتى وتىرىسى ءوتتى. وندا بيزنەس وكىلدەرى قوسىمشا قۇن سالىعىنىڭ مولشەرلەمەسى ماسەلەسىن قاراستىرىپ, سالىقتىڭ بىرىڭعاي مولشەرلەمەسىن ساقتاۋ نەمەسە سارالانعان مولشەرلەمەنى ەنگىزۋدى تالقىلادى.
«سالىق مولشەرلەمەسىن بەلگىلەۋ – بارلىق كاسىپكەرگە قاتىسى بار ماڭىزدى دا تۇيتكىلدى ماسەلە. شەشىمى وڭاي كورىنگەنىمەن, مەملەكەتتىك ورگاندار شەشىم قابىلداعان كەزدە بيۋدجەتتىك تولىقتىرۋعا سۇيەنەتىنىن, سوندىقتان مولشەرلەمەلەردى بارىنە بىردەي تومەندەتۋ ءتاسىلى قاراستىرىلمايتىنىن ءتۇسىنۋ قاجەت. كاسىبىن ادال جۇرگىزەتىن بيزنەستى دامىتۋعا ىقپال ەتەتىن, بيزنەستىڭ كولەڭكەدەن شىعۋىن ىنتالاندىراتىن, شاعىن, ميكروبيزنەستىڭ ورتا, ال ورتا بيزنەستىڭ ءىرى بيزنەسكە كوشۋىن ىنتالاندىراتىن تەڭدەستىرىلگەن شەشىمدەر قاجەت», دەپ اتاپ ءوتتى «اتامەكەن» ۇكپ باسقارما توراعاسىنىڭ ورىنباسارى تيمۋر جاركەنوۆ.
تالقىلاۋ بارىسىندا قاتىسۋشىلار ەۋروپا ەلدەرىندە قوسىمشا قۇن سالىعىنىڭ سارالانعان مولشەرلەمەلەرىن قولدانۋ تاجىريبەسى كەڭ تارالعانىن, بىراق بۇل رەتتە ەل ەكونوميكاسىنىڭ ەرەكشەلىگى مەن دامۋ دەڭگەيىن ەسكەرۋ ماڭىزدىلىعىن, اسىرەسە الەۋمەتتىك ماڭىزى بار ازىق-ت ۇلىك تاۋارلارىنىڭ تىزىمىندە COVID-19 پاندەمياسى كەزىندە ققس تومەندەتىلگەن مولشەرلەمەسىنەن مىسال كەلتىرىلدى.
«ەلىمىزدىڭ ەكونوميكاسى ءۇشىن سالىق سالۋ جۇيەسى بارىنشا قاراپايىم جانە بارىنشا قولجەتىمدى بولۋعا ءتيىس. سالىق ساياساتىندا دا وسىنداي قاعيداتتاردى قولدانعان گونكونگتىڭ تاجىريبەسىندە سالىقتىڭ ءتۇرلى مولشەرلەمەسى بۋحگالتەردىڭ جۇمىسىن, كاسىپكەر مەن مەملەكەت اراسىنداعى ءوزارا ءىس-قيمىلدى قيىنداتىپ, ال بەلگىلى ءبىر سالادا نەمەسە وڭىرلەردە كاسىپكەرلەردى قولداۋ ءۇشىن مەملەكەت «سالىق كەشبەگى» دەپ اتالاتىن مەحانيزمدى ەنگىزە الادى», دەيدى «ۋچەت» كومپانيالار توبىنىڭ جەتەكشىسى ماكسيم بارىشەۆ.
جيىندا سالىق سالۋدىڭ ماقساتىن ءتۇسىنۋ, ەگەر بيۋدجەتتى تولىقتىرۋ قاجەت بولسا, وندا كەز كەلگەن سالىق مولشەرلەمەسىن كوتەرۋگە نەمەسە جاڭا سالىق ەنگىزۋگە بولاتىندىعىن, ەكونوميكالىق ساياساتتى رەتتەۋ بولسا, وندا ءتۇرلى قۇرال قاراستىرىلۋى كەرەك دەگەندى جەتكىزدى قاتىسۋشىلار.
«قولدانىستاعى قوسىمشا قۇن سالىعىن سالۋ جۇيەسىن ساقتاۋدا, شيكىزات وڭدەۋشىلەر ءۇشىن ققس سوماسىن قايتارۋ ماسەلەسىنىڭ ماڭىزدىلىعىنا نازار اۋدارىپ, سارالانعان قوسىمشا قۇن سالىعى بويىنشا ۇسىنىسىمىزدى قايتارۋدى جاسايىق. ويتكەنى ءبىز شيكىزات دەرجاۆاسىنا اينالىپ جاتىرمىز. بۇگىنگى تاڭدا شيكىزاتتى ەل ىشىندە وڭدەۋدەن گورى, ونى ساتىپ الۋ جانە ەكسپورتتاۋ ءتيىمدى. بۇل وتاندىق ەكونوميكا مەن ءوندىرىستى دامىتۋ ءۇشىن وتە ماڭىزدى ءارى كۇشتى قادام بولار ەدى», دەپ ەسەپتەيدى استىق وڭدەۋشىلەر وداعىنىڭ پرەزيدەنتى ءاليحان تالعاتبەك.
ول سونداي-اق تمد ەلدەرىنىڭ تاجىريبەسىن كەلتىرە وتىرىپ, يمپورتتالعان جانە ەكسپورتتالعان ونىمدەرگە ءتۇرلى مولشەرلەمە قولدانىلاتىندىعىنا توقتالدى.
«جەرگىلىكتى ءوندىرۋشى يمپورتپەن قاتار ققس تولەگەن كەزدە, ديستريبيۋتورلار ءۇشىن يمپورتتىق تاۋارلاردى ساتىپ الۋ تيىمدىرەك بولادى», دەگەن ويىن جەتكىزدى فارماكولوگيا سالاسىنىڭ وكىلى گۇلداريا ماناقباەۆا.
تالقىلاۋ بارىسىندا كاسىپكەرلەر ققس-تىڭ سارالانعان مولشەرلەمەسىنە كوشۋ كەزىندە تۋىنداۋى مۇمكىن تاۋەكەلدەردى دە, وڭ تۇستاردى دا قاراستىردى. سونىمەن قاتار ۋاكىلەتتى مەملەكەتتىك ورگاندار تاراپىنان نەعۇرلىم ەگجەي-تەگجەي پوزيتسيا ۇسىنىلعاننان كەيىن ققس مولشەرلەمەسى بويىنشا ماسەلەنى تالقىلاۋدى جالعاستىرۋ قاجەتتىگى دە ايتىلدى.