اكىمدەر وزدەرىنىڭ قالالارىندا, ەلدى مەكەندەرىندە جاياۋ ءجۇرۋى ءتيىس. بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە پرەزيدەنت قاسىم-جومارت توقاەۆ ايتتى, دەپ حابارلايدى Egemen.kz.
ء«بىزدىڭ قالالارىمىزدىڭ ناشار كورىنەتىنىن, بالالار الاڭدارى لايىقتى دەڭگەيدە جابدىقتالماعانىن مويىنداۋىمىز كەرەك. شەتەلدە بولىپ تۇرامىز. اسىرەسە شىعىس ەۋروپادا, بالقاندا قالالارىنىڭ بيۋدجەتى ءبىرشاما از بولعانىنا قاراماستان تارتىمدى كورىنەتىن شاھارلارى بار. بۇل مۋنيتسيپالدى بيلىكتىڭ جۇمىسى شىعار. دەگەنمەن, ەكىنشى جاعىنان بۇل سول جەردە تۇراتىن ادامداردىڭ دا قارىم-قاتىناسىنا بايلانىستى. ول بىزدە جوق. قالالىقتار وزدەرىنىڭ ۇيلەرىنە, كوشەلەرىنە جانە باسقالارىنا قالاي بولسا سولاي, بەي-بەرەكەت قارايتىندىعى سىندى پروبلەمالارمەن بەتپە-بەت كەلىپ وتىرامىز. مۇنداي جايت ەلوردادا دا ورىن الىپ وتىر. مەن ەلوردانىڭ جوعارى مارتەبەسىنە قالالىق ورتالىق قانا ەمەس شەتكى ايماقتارى دا ساي بولۋى تيىستىگىن بىرنەشە رەت ايتتىم», دەدى پرەزيدەنت.
وسى رەتتە ول بارلىق دەڭگەيدەگى اكىمدەردىڭ, ءماسليحات وكىلدەرىنىڭ نازارىن اتالعان ماسەلەگە اۋداردى.
«تاياۋدا سەمەيدەگى بالالار الاڭى تۋرالى سيۋجەت كورسەتىلدى. ونى پايدالانۋدىڭ ءوزى قاۋىپتى. اكىمدەر وزدەرىنىڭ قالالارىندا, ەلدى مەكەندەرىندە جاياۋ ءجۇرۋى ءتيىس. بۇل ەلورداعا دا قاتىستى», دەدى مەملەكەت باسشىسى.