قازاقستاندا قانداي ماماندىققا سۇرانىس جوعارى؟

كادرلارعا قاجەتتىلىكتىڭ جارتىسىن كاسىپتىك-تەحنيكالىق ءبىلىمى بار ادامدار وتەي الادى. ال تورتتەن ءبىر بولىگىنە ارنايى ءبىلىمسىز جۇمىسقا ورنالاسۋعا بولادى. ءار بەسىنشى ۆاكانسياعا جوعارى ءبىلىم قاجەت.

«ۇلتتىق پالاتا مۇنداي تالداۋدى جىل سايىن جۇرگىزەتىندىكتەن, جاعدايدىڭ ايتارلىقتاي وزگەرمەگەنىن بايقاۋعا بولادى. كاسىپكەرلەر اراسىندا جالپى قاجەتتىلىكتىڭ 70%-دان استامى جۇمىسشى ماماندارعا تيەسىلى. زاڭگەر, مەنەدجەر, ەكونوميست مامانداردى ىزدەيتىن كاسىپكەرلەر از. ايتا كەتەيىك, جۇمىسشى توبى – ەڭبەكاقىسى تومەن لاۋازىمدارعا جاتادى. ولاردىڭ جالاقىسى 115 مىڭ تەڭگەدەن 184 مىڭ تەڭگەگە دەيىن بولادى. تابىسىنىڭ ورتاشا دەڭگەيى – 147 مىڭ تەڭگە», دەدى تيمۋر ناقىپبەكوۆ.

سپيكەر جۇمىسشى كادرلار اراسىنداعى ورتاشا ەڭبەكاقىنىڭ ەڭ جوعارى يندەكسى 192 مىڭ تەڭگە – الماتى  قالاسىنا, ال ەڭ تومەنى 115 مىڭ تەڭگە – تۇركىستان وبلىسىنا تيەسىلى ەكەنىن اتاپ ءوتتى.

«كەيدە سۇرانىس سانى سول جىلى ۋنيۆەرسيتەت بىتىرەتىن تۇلەك سانىنان باسىم تۇسەتىن ماماندىقتار بار. مىسالى, وتكەن جىلى قازاقستاننىڭ جوعارى وقۋ ورىندارى تەك 359 ماركەتولوگ شىعارسا, ۇلتتىق پالاتانىڭ ساۋالناماسىنا سايكەس 1,2 مىڭنان استام ماركەتينگ مامانىنا قاجەتتىلىك بار. سونىمەن قاتار «ساۋلەت», «حورەوگرافيا», «قوعامدىق دەنساۋلىق ساقتاۋ» سياقتى ماماندىقتارعا قاجەتتىلىك جوعارى», دەپ تولىقتىردى سپيكەر.

زەرتتەۋدىڭ نەگىزگى مىندەتتەرىنىڭ ءبىرى – شەتەلدەن كەلەتىن جۇمىس كۇشىنە دەگەن قاجەتتىلىكتى زەردەلەۋ. ماسەلەن, شەتەلدىك قىزمەتكەرلەردىڭ ەڭ كوپ سانى باتىس قازاقستان, شىعىس قازاقستان وبلىستارىندا جانە شىمكەنت قالاسىندا تىركەلگەن. بۇل – رەسەي فەدەراتسياسى, وزبەكستان, ۋكراينا جانە قىتاي ازاماتتارى. ساۋالناما قورىتىندىسى بويىنشا, قازاقستاندىق جۇمىس بەرۋشىلەر شەتەلدىك ازاماتتاردى تىگىنشى جانە تىگىن وپەراتورى, PR مەنەدجەر, قولونەرشى, ينجەنەر, حيميا زەرتحاناشىسى, اۆتوسلەسار جانە IT-ديزاينەر سىندى ماماندىقتارعا ءجيى جۇمىسقا شاقىرادى.