ۇلىس تويى قونىستويعا ۇلاستى

ناۋرىز مەرەكەسىنىڭ قارساڭىندا كاسىپورىننىڭ 50 قىزمەتكەرى ءوز ءۇيىنىڭ كىلتىن الدى. ولاردىڭ قاتارىندا كوپ­بالا­لى جانە تولىق ەمەس وتباسىلار, سونداي-اق وندىرىستەگى نەگىزگى جانە ونەركاسىپتەگى ەرەك ماماندىق يەلەرى دە بار.

– مەتاللۋرگتەر «وتباسى بانك» اق-نىڭ ERG ماماندارى ءۇشىن ارنايى ازىر­لەنگەن بىرەگەي باعدارلاماسى بويىنشا – باستاپقى جارناسىز ءارى جالداۋ-جيناقتاۋ تەتىگىمەن پاتەر الدى. العاشقى 8 جىل ىشىندە قىزمەتكەرلەر ەڭ تومەنگى جالداۋ اقىسىمەن وسى پاتەرلەردە تۇرادى. وسى كەزەڭدە ولار «وتباسى بانكىندەگى» دەپوزيتتەرىندە پاتەر قۇنىنىڭ 50% -ىن جيناقتاۋعا ءتيىس. بۇل شارت ورىندالعان كەزدە, پاتەر قۇنىنىڭ قالعان 50%-ىن «وتباسى بانك» ولارعا جىلدىق 3,5%-تەن 5% مولشەرلەمەمەن تۇرعىن ءۇي زايمى رەتىندە بەرمەك. سودان كەيىن باسپانا كومپانيادان ساتىپ الىنادى. بۇل پاتەرلەردىڭ قۇنى بۇگىنگى نارىقتاعى باسپانا باعاسىنان ەداۋىر ارزان, دەيدى بىلەتىن ماماندار.

«قازاقستاندىق ەلەكتروليز زاۋىتى» اق باس ديرەكتورى اندرەي باتراچەنكو قۇتتى قونىس يەلەرىنە پاتەر كىلتتەرىن تابىستاپ, جۇمىسشىلاردى ۇلىق مەرەكە – ۇلىستىڭ ۇلى كۇنىمەن قۇتتىقتاپ ءسوز سويلەدى.

– ناۋرىز – جىل باسى. وسى كوكتەمگى مەيرام قارساڭىندا ءبىزدىڭ قىزمەتكەردىڭ ءوز شاڭىراعىنا كىرىپ, ءۇيلى بولىپ جاتقانى قاتتى قۋانتادى. قىزمەتكەرلەردىڭ ءومىر سۇرۋىنە قولايلى جاعداي جاساۋ – كوم­پانيانىڭ الەۋمەتتىك ساياساتىنىڭ اجىراماس بولىگى. ءبىز ولاردىڭ ءومىرىن ۇدايى جاقسارتۋعا تىرىسامىز. كوپتەن بەرى كەزەك كۇتىپ, پاتەر كىلتىن بۇگىن العانداردىڭ بار­لىعىنا جاڭا باسپانادا باق پەن بەرەكە ورناسىن دەپ تىلەيمىن, دەدى ول.

– جۇمىس بەرۋشىنىڭ مۇنداي قولداۋى باسپانالى بولۋعا تالپىنعاندارعا ۇل­كەن ءۇمىت سىيلايتىنى انىق. ءبىز كاسىپ­ورىن­دارمەن بىرلەسىپ ازاماتتاردىڭ تۇر­عىن ءۇي ماسەلەسىن جەدەل شەشۋگە ىقپال ەتەمىز. ال بۇل جۇمىس بەرۋشى تاراپىنان الەۋ­مەتتىك پاكەتتى كۇشەيتۋدىڭ تاعى ءبىر امالى, دەدى قۋانىش جيىنىنا قاتىسقان «وت­باسى بانك» اق پاۆلودار وبلىستىق فيليالىنىڭ ديرەكتورى تالعات بايلوۆ.

ون قاباتتان تۇراتىن عيمارات قالا­نىڭ ەڭ جاقسى اۋداندارىنىڭ بىرىندە ورنا­لاسقان. جاقىن ماڭدا جولايرىق بار. ينفراقۇرىلىمى جاقسى. جايلى ءومىر سۇرۋگە قاجەت نارسەنىڭ ءبارى تاياق تاستام جەردە. مەكتەپتەر, بالاباقشالار مەن اۋرۋ­حانالار تىپتەن ءتيىپ تۇر ەكەن.

زاۋىت ۇستاسى – ەلمۇرات پارمانوۆتىڭ ءتورت بالاسى بار. ول كوپبالالى وتباسى رەتىندە باسپانالى بولىپ جاتىر. زا­ۋىت­تىڭ ىرگەتاسى قالانعان ساتتەن بەرى وسىندا جۇمىس ىستەيدى. الدىمەن ونىڭ قۇ­­­رىلىسىنا قاتىسسا, بۇگىندە سۇيىكتى كا­سىپ­ورنىنان باسپانا الدى.

– مەن سياقتى وتباسىلار ءۇشىن تاماشا مۇمكىندىك. وسى باعدارلاماعا قاتىسۋ باقىتىنا يە بولعانىمىزعا وتە قۋا­نىشتىمىن. بۇعان دەيىن ءبىز قالا ما­ڭىنداعى اۋىلدا جالدامالى ۇيدە تۇرۋعا ءماجبۇر بولدىق. ەندى ء«وز ءۇيىم – ولەڭ تو­سەگىم بار». بالالارىم ناۋرىز مەيرامى قارساڭىنداعى اتاۋلى سىيلىققا ەرەكشە قۋانىشتى. ەندى ءۇش بولمەلى پاتەردە ولاردىڭ ارقايسىسىنىڭ كەڭ دە جايلى ءوز ورنى بولادى, دەدى ۇستا.

ال تۇرعىن ءۇي باعدارلاماسىنىڭ شارتتارى وتباسى بيۋدجەتىنە سالماق بول­مايدى. العاشقىلاردىڭ ءبىرى بولىپ پاتەر كىلتىن العان قويما جانە قوسالقى جۇ­مىستار تسەحىنىڭ قويماشىسى, ەرلى-زا­يىپتار ءمولدىر ءابجانوۆا مەن باۋىرجان دەر­مەنوۆ تە قۋانىپ جاتىر. باۋىرجان زاۋىتتا ەلەكتر-گازبەن دانەكەرلەۋشى بولىپ قىزمەت ەتەدى.

– زاۋىت مەنىڭ جانە وتباسىم ءۇشىن تەك جۇمىس ورنى عانا ەمەس. كاسىپورىن مە­نىڭ جەكە تۇلعا رەتىندە دە, كاسىبي مامان رە­تىندە قالىپتاسۋىم ءۇشىن سەپتەسكەن ۇل­كەن ۇستاحانا. مۇندا مەن جان جارىممەن تا­نىس­تىم, ال بۇگىن پاتەردىڭ كىلتىن الدىم. ەن­دەشە, ۇلىستىڭ ۇلى كۇنىندە ەرەكشە با­قىتتىمىز, دەدى قۋانىشىن جاسىرماعان ءمولدىر ءابجانوۆا.

سوڭعى ەكى جىلدا «وتباسى بانكى» ارقىلى ەۋرازيالىق توپ قىزمەتكەرلەرىنە 485 پاتەر ساتىلعان. ونىڭ 79-ى «قازاق­ستاندىق ەلەكتروليز زاۋىتى» مەتال­لۋرگ­تەرىنە بۇيىرعان. وسىنداي يگى باعدار­لامالاردى جۇزەگە اسىرا وتىرىپ, ERG قىزمەتكەرلەرىن تۇرعىن ۇيمەن قامتاماسىز ەتۋ جالعاسا بەرمەك.

ال «وتباسى بانك» ءوز كەزەگىندە ازاماتتاردى قولجەتىمدى جانە ساپالى تۇرعىن ۇيمەن قامتۋ جونىندەگى مەملەكەتتىك سايا­سات­تىڭ ماقساتتارىن ۇزبەي ورىنداي بەرۋدى باسشىلىققا العان.