اتىراۋ وبلىسىمەن ەكونوميكالىق, ىسكەرلىك بايلانىس ورناتىپ, قوماقتى ينۆەستيتسيا سالعان ەلدىڭ ءبىرى – فرانتسيا. وسى ەلدىڭ قازاقستانداعى توتەنشە جانە تۇراقتى ەلشىسى فرانسيس ەتەنن مىرزانىڭ ءمالىم ەتۋىنشە, بۇگىنگى تاڭدا قازاقستاندا فرانتسيانىڭ 50-گە جۋىق كومپانياسى ءار سالادا جۇمىس ىستەيدى. اسىرەسە, فرانتسۋز كومپانيالارى ەلىمىزدىڭ مۇناي-گاز جانە تاۋ-كەن ونەركاسىبىنە قىزىعۋشىلىق تانىتۋدا. سونىمەن بىرگە, تەمىرجول لوكوموتيۆىن, ۇشاقتار مەن تىكۇشاقتاردى يمپورتتاۋ, سپۋتنيكتىك بايلانىس جانە قۇرىلىس ماتەريالدارىن ءوندىرۋ, قىزمەت كورسەتۋ سەكىلدى سالالاردا ەكى ەلدىڭ 100-گە بىرلەسكەن كاسىپورنى قۇرىلىپتى. ءدال قازىر اتالعان ەلدىڭ قازاقستان ەكونوميكاسىنا قۇيعان ينۆەستيتسياسىنىڭ كولەمى 9 ميلليارد دوللارعا جەتىپ وتىر. ال اتىراۋ وبلىسىمەن اراداعى تاۋار اينالىمى وتكەن جىلى 4,2 ميلليارد دوللاردى قۇراپتى. بۇل وڭىردە فرانتسۋزدار كاپيتالى سالىنعان التى ءىرى كاسىپورىن جۇمىس ىستەيدى.
– قازاقستاننىڭ ەكونوميكالىق وركەندەۋى, اسىرەسە, اتىراۋ سەكىلدى ينۆەستيتسيا سالۋعا قولايلى ايماقتار الەم ەلدەرىنىڭ قىزىعۋشىلىعىن تۋعىزادى, –دەدى فرانتسيانىڭ ەلشىسى فرانسيس ەتەنن مىرزا اتىراۋداعى قۇرمەتتى كونسۋلدىقتىڭ اشىلۋ سالتاناتىندا. – ءبىزدىڭ ەلىمىز قازاقستانمەن, سونىڭ ىشىندە, اتىراۋ وڭىرىمەن ىسكەرلىك, ساۋدا-ەكونوميكالىق قارىم-قاتىناستى بۇرىنعىدان جانداندىرا ءتۇسۋدى كوزدەيدى. سول سەبەپتەن, مۇنايلى اتىراۋمەن بايلانىستى ورىستەتۋ ماقساتىندا فرانتسيانىڭ قۇرمەتتى كونسۋلدىگىن اشۋدى كوزدەدىك. بۇل – ءبىزدىڭ قازاقستان وڭىرلەرىندە قۇرمەتتى كونسۋلدىعىمىز.
فرانتسيانىڭ ەلشىسى اتىراۋ وبلىسىنداعى قۇرمەتتى كونسۋل قىزمەتىن اتقارۋعا «مەركۋر حولدينگ» جشس باس ديرەكتورى ەسەنعالي بايمەنوۆتىڭ تاڭدالعانىن جەتكىزدى.
– ءبىز فرانتسيا مەن اتىراۋ وبلىسىنىڭ اراسىنداعى ىسكەرلىك جانە مادەني بايلانىستاردى نىعايتۋعا جۇمىستانامىز, – دەپ كونسۋلدىقتىڭ الداعى ماقساتىمەن ءبولىستى ە.بايمەنوۆ. – سونىمەن قاتار, اتىراۋ وبلىسى مەن باسقا وڭىرلەردىڭ تۇرعىندارى ءۇشىن فرانتسياعا بارۋعا ۆيزا الۋدى جەڭىلدەتىپ, اتىراۋدان فرانتسياعا اۋە قاتىناسىن اشۋدى قولعا الماق جوسپارىمىز بار.
اتىراۋ وبلىسى اكىمىنىڭ ورىنباسارى ش.مۇقان ءبىزدىڭ وبلىسىمىز بەن فرانتسيا اراسىنداعى تىعىز ەكونوميكالىق بايلانىستار تۋرالى ەسكە سالدى. اتاپ ايتقاندا, ول 2013 جىلى اتىراۋ وبلىسى مەن فرانتسيا اراسىنداعى تاۋار اينالىمى 4,2 ملرد. دوللار قۇراعانىن اتاپ ءوتتى. بۇل 2012 جىلعا قاراعاندا 12 پايىزعا كوپ. اتىراۋ وبلىسىندا فرانتسۋز كاپيتالى قاتىسقان التى ءىرى كاسىپورىندار جۇمىس ىستەيدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.