استانا. 25 ماۋسىم. قاراعاندىعا «تسينحۋا» قىتاي ەنەرگەتيكالىق كورپوراتسياسىنىڭ باسشىلارى كەلىپ, وبلىس اكىمى نۇرمۇحامبەت ابدىبەكوۆپەن كەزدەستى. بۇل تۋرالى «قازاقپارات» حابارلادى.
اتالعان كەزدەسۋدە «كۋزنەتسكي» رازرەزىندە كومىردى كەشەندى وڭدەۋ بويىنشا جوبانى جۇزەگە اسىرۋعا قاتىستى ماسەلەلەر تالقىلاندى.
نۇرمۇحامبەت ابدىبەكوۆ: «بۇگىن ءبىز جوبانىڭ قازىرگى جاعدايىن تالقىلاپ, الداعى ۋاقىتتا بىرلەسكەن جۇمىستىڭ ناقتى جوسپارىن انىقتاۋ ءۇشىن جينالدىق», – دەدى.
ال «تسينحۋا» كورپوراتسياسى باس ديرەكتورىنىڭ ورىنباسارى لانگ ينگ ءوز كەزەگىندە: «ينۆەستيتسيالاردىڭ جالپى سوماسى 2 ملرد. دولاردى قۇرايدى. زاۋىت قۇرىلىسى ەكى كەزەككە بولىنگەن», – دەدى. سونداي-اق, اتالعان كورپوراتسيانىڭ باسقارما توراعاسى حۋو كسينگحۋا: «ءبىز بۇل ايماقتا جاڭا كومىر حيمياسى ءوندىرىسىن دامىتامىز. كومىر ارقىلى قازاقستاندا تازا قۋات كوزىن ەنگىزۋگە جول اشامىز», – دەدى.
قىتايلىق ينۆەستورلاردىڭ سوزىنە قاراعاندا, «كۋزنەتسكي» كومىر رازرەزىنە ارنايى تالداۋى جۇرگىزىلگەن. دەگەنمەن, ءالى دە بولسا تەرەڭدەتىلگەن ماركەتينگتى زەرتتەۋلەر جۇرگىزۋ قاجەت. ال قارجىلاندىرۋ سحەماسى ازىرگە انىقتالا قويماعان.
مامانداردىڭ ەسەپتەۋىنشە, جوبانىڭ جۇزەگە اسىرىلۋى وندىرىلگەن كومىردىڭ ءار تونناسىنان ەكونوميكالىق تيىمدىلىكتى 5-7 ەسە ۇلعايتۋعا مۇمكىندىك بەرەدى.
كەزدەسۋدە جەرگىلىكتى حالىقتىڭ جوبا بويىنشا جۇمىسقا تارتىلۋى جانە وتاندىق ماتەريالداردى پايدالانۋ ماسەلەلەرى باستى نازاردا بولدى. سونىمەن قاتار, ءوڭىر باسشىلارى ەكولوگيالىق تالاپتار مەن ستاندارتتاردى ساقتاۋ ءىسىن ناقتىلادى.
ەكىجاقتى كەزدەسۋدە قاراعاندى وبلىسى مەن قىتايلىق «تسينحۋا» ەنەرگەتيكالىق كورپوراتسياسى كومىردى كەشەندى وڭدەۋ جونىندە مەموراندۋمعا قول قويدى.
ەستەرىڭىزگە سالا كەتەيىك, بۇل كەلىسىم مەملەكەت باسشىسى نۇرسۇلتان نازارباەۆ پەن قىتاي حالىق رەسپۋبليكاسىنىڭ توراعاسى سي تسزينپين اراسىنداعى كەلىسسوز بارىسىندا قول جەتكىزىلگەن ۋاعدالاستىقتار اياسىندا جۇزەگە اسىرىلعالى وتىرعان جوبالاردىڭ ءبىرى. جىلپى, قىتاي ينۆەستورلارى كومىردەن سينتەتيكالىق سۇيىق وتىن ءوندىرۋدى جوسپارلاپ وتىر. كاسىپورىن بەنزين, ديزەلدىك وتىن مەن جوعارى باعالى ءتۇرلى حيميالىق ونىمدەردى شىعارادى دەپ كۇتىلۋدە.
«تسينحۋا» كورپوراتسياسى كومىردى ءوندىرۋ, بايىتۋ, كوكستاۋ جانە حيميالاۋ بويىنشا ءىرى جەكەمەنشىك كومپانيا بولىپ تابىلدى.
جولدىباي بازار.
دەرككوز: «قازاقپارات».
فوتو: «قازاقپارات».