تۇركياداعى جەر سىلكىنىسىنەن بەرى ءبىر ايعا جۋىق ۋاقىت وتسە دە, زارداپ شەككەندەردىڭ جاعدايى ءماز ەمەس. ولار ءالى دە گۋمانيتارلىق كومەككە مۇقتاج, دەپ حابارلايدى Egemen.kz Tengrinews.kz سايتىنا سىلتەمە جاساپ.
تۇركيادا بولعان اۋىر اپاتتان كەيىن دە بىرنەشە رەت جەر سىلكىندى. مالاتياداعى جەر استى ءدۇمپۋى كەزىندە ادام شىعىنى بولىپ, 100-دەن استام ادام زارداپ شەكتى. كەيبىر ايماقتاردا 4-5 ماگنيتۋداعى جەر سىلكىنىستەرى تىركەلىپ جاتىر.
ءزىلزالا سالدارىنان قالالار قيراپ, مىڭداعان ادام باسپاناسىز قالدى. الەم ەلدەرى جاردەمدەسىپ جاتقانىمەن, ءۇيسىز-كۇيسىز جۇرگەندەردىڭ سانى ءالى كوپ. وسى ورايدا قازاقستاندىق قوعام بەلسەندىلەرى «100 كيىز» ناۋقانىن جاريالاپ, باۋىرلاس ەلگە باسپانا جەتكىزگەن ەدى.
تۇركيادا تۇراتىن گۇلنيسا قاسىموۆا تۇرىكتەرگە قازاقتىڭ كيىز ءۇيى ءالى دە قاجەت دەيدى.
«مەن تۇركيانىڭ شىعىسىنداعى ەرزۋرۋم قالاسىندا تۇرامىن. بىزدە ءالى جەر سىلكىنىپ جاتىر. وزدەرىڭىز بىلەتىندەي, مالاتيادا دا 4-5 باللدىق جەر استى ءدۇمپۋى بولدى. قازىرگى كەزدە مالاتيا مەن ادىيامان تۇرعىندارىنىڭ جاعدايى وتە قيىن», دەدى ول.
ونىڭ ايتۋىنشا, جەرگىلىكتى تۇرعىندارعا گۋمانيتارلىق كومەك جەتىسپەيدى.
«ادىيامان قالاسى قاڭىراپ قالدى. وندا كوپتەگەن ادام قازا تاپتى. مالاتيا ماڭىنداعى اۋىلدا ءبىزدىڭ دوستارىمىز بار. ولار ءۇيى قيراپ قالعان سوڭ, وزدەرى جاساپ العان شاتىردا تۇرىپ جاتقاندارىن ايتتى. ولارمەن بىرگە 40-قا جۋىق وتباسى بار. قالاعا جەتۋ مۇمكىن ەمەس. ويتكەنى جول ەكىگە ءبولىنىپ كەتكەن. ادامدار قالاعا كىرۋدەن قورقادى, ويتكەنى عيماراتتار ءالى قيراپ, ادامدار قازا تاۋىپ جاتىر», دەدى ايەل.
ونىڭ ايتۋىنشا, زارداپ شەككەن تۇرعىندار قازاق كيىز ۇيلەرىنە مۇقتاج جانە قازاقستاندىقتاردان كيىز ۇيلەردى مالاتيا مەن ادىيامانعا جىبەرۋىن سۇراپ جاتىر.
«مەنىڭ قازاقستاننان ەكەنىمدى ءبىلىپ, كيىز ۇيلەردى تابۋعا كومەكتەسۋىمدى ءوتىندى. ادامدار دالادا قالدى. جاڭا تۋعان نارەستەلەر, جۇكتى ايەلدەر بار. ولارعا ءبىزدىڭ كيىز ۇيلەرىمىز كەرەك, كومەكتەسىڭىزدەرشى!», دەدى گۇلنيسا قاسىموۆا