ەلوردادا العىس ايتۋ كۇنىنە وراي قانداي ءىس-شارالار وتەدى؟

مەرەكە كۇندەرى مادەنيەت, سپورت, ءبىلىم بەرۋ ۇيىمدارى, ەلوردالىق قازاقستان حالقى اسسامبلەياسى جانە باسقا دا مەكەمەلەر قالا تۇرعىندارى مەن قوناقتارىنا ارناپ ءتۇرلى ءىس-شارالار دايىنداپ وتىر. العىس ايتۋ كۇنىنە وراي استانادا بالالار مەن وقۋشىلارعا ارنالعان ارنايى تاقىرىپتاعى كورمەلەر وتكىزىلەدى. جالپى جوسپارلانعان ءىس-شارالاردىڭ ءبارى تاۋەلسىزدىك قۇندىلىقتارىن, ۇلتتىق بىرلىكتى, قازاقستاندىق ءپاتريوتيزمدى نىعايتۋعا ىقپال ەتەدى.

مىسالى, 28 اقپاندا ساعات 11:00-دە قۇتقارۋشىلار الاڭىندا مەموريالعا گۇل شوقتارىن قويۋ ءراسىمى وتەدى, وندا تجد قىزمەتكەرلەرىنە العىس ءبىلدىرۋ ماقساتىندا «باتىرلارعا العىس!» اكتسياسى باستالادى. ولار كۇندەلىكتى ءوز ءومىرىن قاتەرگە تىگىپ, وزگەلەردى قۇتقارادى.

سونداي-اق قالا مەكتەپتەرىندە اپتا بويى «جانىڭدا ءجۇر جاقسى ادام» اتتى كەزدەسۋ كەشى, ءورت ءسوندىرۋ باتىرلارىنىڭ قۇرمەتىنە «قاھارماندار ورتامىزدا» قايىرىمدىلىق اكتسياسى جانە ء«بىزدىڭ ارامىزداعى باتىرلار چەللەندجى وتكىزىلەدى. 1 ناۋرىز كۇنى ءبىلىم باسقارماسىنىڭ جانە جاستاردىڭ قاتىسۋىمەن «قازاق ەلىنە مىڭ العىس!» فلەشموبى وتەدى.

سول كۇنى «بارىس» سپورت كەشەنىندە سپورتشىلار مەن سپورت مەكتەپتەرىنىڭ تاربيەلەنۋشىلەرى «مەيىرىمگە تولى جۇرەك» اكتسياسىن وتكىزەدى, ساعات 16:00-دە № 8 وليمپيادالىق رەزەرۆتىڭ مامانداندىرىلعان بالالار-جاسوسپىرىمدەر سپورت مەكتەبى 2010 جىلى تۋعان جاسوسپىرىمدەر اراسىندا شايبالى حوككەيدەن جولداستىق ويىن ۇيىمداستىرادى.

سول كۇنى ساعات 11:00-دە «اتامەكەن «قازاقستان كارتاسى» ەتنو-مەموريالدىق كەشەنىندە «التىن الما, العىس ال» تاقىرىبىندا ءدارىس وتەدى. وسى ۋاقىتتا «الجير» مەموريالدى-مۇراجاي كەشەنى «العىس ايتۋ – اسىل قاسيەت» كورمەسىن, ال ساكەن سەيفۋللين مۇراجايى – «قازاق ەلىنە العىس ايتۋ» ءدارىسىن ۇيىمداستىرادى.

كەشكى ساعات 19:00-دە مۋزىكالىق جاس كورەرمەن تەاترىنىڭ ساحناسىندا «بۋكەت سوزۆۋچي مۋزىكي ي سلوۆ…» اتتى مۋزىكالىق-پوەتيكالىق كەش وتەدى. كۇنى ساعات 12:00-دە «ناز» مەملەكەتتىك بي تەاترى مەرەكەگە وراي «مىڭ العىس ساعان – قازاعىم» تاقىرىبىندا دوڭگەلەك ۇستەل ۇيىمداستىرادى. ورتالىقتاندىرىلعان كىتاپحانا جۇيەسىندە بۇل كۇنى كىتاپ كورمەلەرى, تاربيە ساعاتتارى مەن اكتسيالار وتەدى.

1 ناۋرىز كۇنى كەشكى ساعات 19:00-دە NOMAD City Hall ساحناسىندا «اشتەن» سپەكتاكلى, ال «جاستار» تەاترىندا «قيانات» قويىلىمى كورسەتىلەدى.

ەلوردا جاستارى سوعىس جانە ەڭبەك ارداگەرلەرىنىڭ اۋلاسىندا 1-3 ناۋرىز كۇندەرى سەنبىلىكتەر وتكىزەدى. سونداي-اق قالانىڭ سوو-لارىندا جانە باسقا دا اشىق الاڭداردا تاقىرىپتىق فلەشموبتار جوسپارلانىپ وتىر, الەۋمەتتىك قورعاۋ مەكەمەلەرىندە ءتۇرلى ءىس-شارالار وتەدى.

استانا پەرزەنتحانالارىندا 1 ناۋرىز كۇنى ء«ومىر ءۇشىن راحمەت!» اكتسياسى وتەدى.

العىس ايتۋ كۇنى ساعات 12:00-دە دارىگەرلەرگە العىس ءبىلدىرۋ ماقساتىندا «التىن جۇرەك» مەموريالىنا گۇل شوقتارى قويىلادى.

1 ناۋرىز كۇنى ساعات 12:00-دە ەلوردالىق دوستىق ۇيىندە قازاقستان حالقى اسسامبلەياسى مۇشەلەرىنىڭ, پارلامەنت دەپۋتاتتارىنىڭ, مەملەكەتتىك ورگاندار, ەتنومادەني بىرلەستىكتەر, بۇقارالىق اقپارات قۇرالدارى وكىلدەرىنىڭ قاتىسۋىمەن العىس ايتۋ كۇنىنە ارنالعان دوڭگەلەك ۇستەل وتەدى.

مۇندا حالىق تاعامدارى بويىنشا شەبەرلىك سىنىبىن استانا قحا انالار كەڭەسىنىڭ مۇشەلەرى ۇيىمداستىرادى.