قوعامدىق كولىكتەگى كەزدەسۋ

پارلامەنت ءماجىلىسىنىڭ دەپۋتاتتىعىنا «اۋىل» پارتياسى اتىنان تۇسەتىن كانديداتتار مەن جەرگىلىكتى ءماسليحاتتار دەپۋتاتتىعىنا ۇمىتكەرلەر ۇگىت-ناسيحات جۇمىسىن كۇندىزگى ساعات 11.00-دە قوعامدىق قولىكتەردىڭ سوڭعى ايالداماسىنان باستادى. الدىمەن اۆتوبۋستاردى «اۋىل» پارتياسىنىڭ سايلاۋعا قاتىستى «اۋىل تورگە شىقسىن!» سياقتى ۇراندار جازىلعان جارنامامەن ارلەدى. كەيىن كانديداتتار مەن بەلسەندىلەر ءۇش توپقا ءبولىنىپ, قالا تۇرعىندارىمەن, جولاۋشىلارمەن كەزدەستى. ءىس-شارا اياسىندا اۆتوبۋسقا كىرگەن جولاۋشىلارعا پارتيانىڭ سايلاۋالدى باعدارلاماسىنىڭ نەگىزگى باعىتتارى ءتۇسىندىرىلدى. حالىق­تان جەرگىلىكتى اتقارۋشى ورگاننىڭ جۇمى­سىن جاقسارتۋعا ارنالعان ۇسىنىستاردى جينادى.

– پارتيا اكىمدەر مەن ءماسليحات دەپۋتاتتارى­نىڭ حالىق الدىنداعى دەربەس جاۋاپكەرشىلى­گىن كۇشەيتەدى. ول ءۇشىن جەرگىلىكتى مەملەكەت­تىك باسقارۋ جانە ءوزىن-ءوزى باسقارۋ تۋرالى زاڭنامانى تۇبەگەيلى قايتا قارايدى. ولار حالىق الدىنداعى مىندەتتەرىن ورىنداماعان جاعدايدا ەڭ قاتاڭ شارالاردى قولدانۋعا قول جەتكىزەدى, – دەدى پارلامەنت ءماجىلىسى سايلاۋىنا «اۋىل» پارتياسى اتىنان تۇسەتىن كانديدات داۋلەتكەرەي كاپ ۇلى.

كەيىن كانديداتتار اۆتوبۋستار تيەسىلى اۆتوپارككە بارىپ, كولىك جۇرگىزۋشىلەرىمەن كەزدەستى. كولىك جۇرگىزۋشىلەرى وزدەرىن تولعاندىراتىن ماسەلەلەرمەن, اتاپ وتسەك, جالاقى, ەڭبەك جاعداي­لارى, جۇمىس جۇكتەمەسى تۋرالى سۇراقتار­مەن ءبولىسىپ, ەڭبەك ادامىنىڭ مارتەبەسىن كوتەرۋ تۋرالى ۇسىنىستارىن پارتيا وكىلدەرىنە جەتكىزدى.

كانديدات قايرات ايتۋعانوۆتىڭ ايتۋىنشا, «اۋىل» پارتياسى ماجىلىسكە بارعاندا ەڭبەك ادامىنا ەرەكشە قۇقىقتىق مارتەبە بەرۋگە قول جەتكىزەدى. پارتيانىڭ اۋىلدىقتارعا عانا ەمەس, قالالىقتارعا دا ۇسىناتىن كوپتەگەن باعىتى بار ەكەنىن اتاپ ءوتتى. «قۋاتتى اۋىل – ەلدىڭ سەنىمدى تىرەگى. ءبىز ازىق-ت ۇلىك نارىعىنان ارتىق دەلدالداردى ىعىستىرۋ ءۇشىن بار كۇشىمىزدى سالامىز. فەرمەرلەردى ءىرى ساۋدا ورتالىقتارىنا مۇمكىندىگىنشە جاقىنداتامىز», دەدى كانديدات.