ەڭبەك ۇجىمىمەن كەزدەستى

«ماي» كاسىپورنى – ەلىمىزدەگى ەڭ العاشقى, ورتالىق ازيا اۋماعىنداعى كۇنباعىس مايىن وندىرەتىن ءىرى زاۋىتتاردىڭ ءبىرى. زاۋىت سوڭعى جىلدارى جابدىقتارىنا تەرەڭ جاڭعىرتۋ جۇرگىزدى. ناتيجەسىندە, زاۋىت تۇتىنۋشىعا پرەميۋم ماركالى تازارتىلعان, يىسسىزدەندىرىلىپ مۇزداتىلعان كۇنباعىس مايىن ۇسىنۋعا قول جەتكىزدى. زاۋىتتىڭ جۇمىس ۇدەرىسى تولىعىمەن اۆتوماتتاندىرىلعان, كۇنباعىس تۇقىمدارى قول ەڭبەگىنىڭ ارالاسۋىنسىز كۇنباعىس مايىنا اينالادى.

زاۋىتتا ەڭ زاماناۋي جابدىقتار – شۆەيتساريالىق «Buhler» كومپانياسىنىڭ تۇقىمداردى اۆتوماتتى تازالاۋ جانە دايىنداۋ جەلىسى, سوڭعى ءونىمنىڭ ەرەكشە ساپاسىن قامتاماسىز ەتەتىن بەلگيالىق «De Smett Ballestra» كومپانياسىنىڭ جوعارى تەحنولوگيالىق تازالاۋ جەلىسى, پلاستيكالىق ىدىس ءوندىرۋ جانە وسى يندۋسترياداعى الەمدىك كوشباسشى يتاليالىق «Sipa» كومپانياسىنىڭ قۇيۋ جەلىسى ورناتىلعان. ءوندىرىستىڭ جاڭا تەحنولوگيالارى مەن زاماناۋي جابدىقتاردىڭ ارقاسىندا زاۋىت شىعاراتىن كۇنباعىس مايى ادام اعزاسىنا قاجەتتى پايدالى زاتتار مەن دارۋمەندەردى بارىنشا تولىق ساقتايدى.

– ءبىز ماجىلىستە اگرارشىلار مەن وتاندىق ازىق-ت ۇلىك وندىرۋشىلەرىن ءسوزسىز مەملەكەتتىك قولداۋعا بەرىك كەپىلدىكتەر بەرەتىن «ازىق-ت ۇلىك قاۋىپ­سىزدىگى تۋرالى» كونستيتۋتسيالىق زاڭ قابىلدايمىز. وتاندىق بيزنەستى يمپورت قىسىمىنان قورعاۋ ءۇشىن جاڭا كەدەندىك-تاريفتىك ساياساتتى قولدانىسقا ەنگىزەمىز. كۆازيمەملەكەتتىك سەكتور ارقىلى اۋىل شارۋاشىلىعى ونىمدەرىن وتكىزۋ جانە كەپىلدەندىرىلگەن ساتىپ الۋ جۇيەسىن قۇرۋعا قول جەتكىزەمىز, – دەدى كەزدەسۋدە «اۋىل» پارتياسىنان ءماجىلىس دەپۋتاتتىعىنا كانديدات قايرات ايتۋعانوۆ.

كۇنباعىس مايىن ءوندىرۋ تولىق اۆتومات­تاندىرىلعانىن ءوز كوزىمەن كورگەن پارتيا مۇشەلەرى زاۋىت تىنىسىن جوعارى باعالاپ, ۇجىمنىڭ الداعى جۇمىسىنا ساتتىلىك تىلەدى. كەزدەسۋ سوڭىندا كانديداتتار زاۋىت جۇمىسشىلارىنا «اۋىل» پارتياسى سايلاۋالدى باعدارلاماسىنىڭ نەگىزگى باعىتتارىن ءتۇسىندىردى.