ەرتەدەن كەلە جاتقان ەسكى كەسەلدىڭ ءبىرى – تالما اۋرۋى جايلى تالاي تراكتاتتار جازىلعان, ءالى دە زەرتتەلۋدە. دامىعان مەديتسينانىڭ ءوزى تۇقىم قۋالايتىن دەرتتىڭ داۋاسىن تولىق تابا الماسا دا, ميدىڭ سوزىلمالى اۋرۋىنا شالدىققانداردىڭ دەنساۋلىعىن وزىق مەديتسينالىق تەحنولوگيالار, وپەراتسيالار كومەگىمەن جەڭىلدەتۋگە, جاقسارتۋعا بولادى.
ال استانا, الماتى سياقتى ءىرى قالالارداعى بىلىكتى دارىگەرلەرگە قارالعىسى كەلەتىندەر ەلىمىزدىڭ بارلىق تۇكپىرىنەن تابىلادى. وسى ورايدا الماتىداعى پرەزيدەنت ءىس باسقارماسى مەديتسينالىق ورتالىعى – ورتالىق كلينيكالىق اۋرۋحاناسىنىڭ ءبىر توپ دارىگەرى اقتوبە قالاسىندا «قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ كۇندەرى» اياسىندا تابىستى جۇمىس ىستەگەنىن اتاپ وتۋگە بولادى.
وسىلايشا, بىلىكتى دارىگەرلەردىڭ ەلدەگى دەنساۋلىق ساقتاۋ ىسىنە جاڭا زاماناۋي ادىستەردى ەنگىزۋ ماقساتىندا قولعا العان باستاماسى ەلىمىزدىڭ باتىس وڭىرىنەن باستالدى. العاشقى كۇنى وكا نەيروحيرۋرگيا بولىمشەسىنىڭ مەڭگەرۋشىسى مارات سارشاەۆ اقتوبە مەديتسينالىق ورتالىعىندا وپەراتسيانىڭ جاڭا ءتۇرى – ميكروۆاسكۋليارلىق دەكومپرەسسيا جاساپ, ءۇش تارماقتى جۇيكە نەۆرالگياسى مەن گەميفاتسيالدى ءتۇيىلۋدى ەمدەۋدىڭ وزىق تاسىلدەرىن كورسەتتى.
– بۇل ءبىز ءۇشىن ناتيجەسىندە پاتسيەنت ءومىرىن ايتارلىقتاي جاقسارتاتىن ادەتتەگى وپەراتسيا. اقتوبەلىك ارىپتەستەرىمىز وسىنداي وپەراتسيالاردى وزدەرى اتقارۋى ءۇشىن ءوز تاجىريبەمىزبەن بولىسۋگە دايىنبىز. مەن وتكىزگەن كونسۋلتاتسياعا ناۋقاستار كوبىنەسە ومىرتقا جارىعى, قان تامىرى اۋرۋلارى, ميداعى ىسىك, ەپيلەپسيا ماسەلەلەرىمەن كەلدى. وسى ساپارىمىزداعى اقپارات الماسۋ, كەرى بايلانىس كەزىندە بۇل وڭىردە ەپيلەپسيا اۋرۋىن ەمدەۋ ەداۋىر دامىعانىن بايقادىم. ەندىگى جەردە جەرگىلىكتى دارىگەرلەرمەن ءوزارا بايلانىسىمىزدى بۇرىنعىدان دا نىعايتىپ, پاتسيەنتتەرگە بىلىكتى كومەك بەرە الاتىنىمىزعا سەنىمدىمىن, سەبەبى بىزدە جاقسى تاجىريبە بار, – دەدى دارىگەر م.سارشاەۆ.
الماتىداعى ورتالىق كلينيكالىق اۋرۋحاناسىنىڭ ونكوحيرۋرگتەرى ەستاي ابزالبەك پەن مارات احەتوۆ تە ارقايسىسى ءتورت ساعاتقا سوزىلعان كۇردەلى وپەراتسيا جاسادى. ولار اسقازاندى قايتادان ءىش قۋىسىنا قالپىنا كەلتىرەتىن اسقازاندى جەڭدىك كەسۋ مەن كوكەت جارىعى وپەراتسيالارىن جاسادى. اقتوبەلىك پاتسيەنتتىڭ اسقازانى كوكەتتى قىسىپ, دەنساۋلىعىنا ۇلكەن قيىندىق كەلتىرگەن. ەكى وپەراتسيا دا قوسارلى اۋرۋلارىمەن بىرگە اسقىنۋ تۋدىرعان, ءبىر پاتسيەنتتە ديابەت, سەمىزدىك بولسا, ەكىنشىسىندە – بۇرىنعى وپەراتسيادان قالعان تىرتىقتىڭ سالدارى مەن ءجىتى حولەتسيستيت كەدەرگى كەلتىرگەن. الايدا لاپاروسكوپيالىق وپەراتسيا ءساتتى ءوتتى.
– ارينە, اقتوبەلىك ارىپتەستەرىمىز بىزگە دەيىن دە وسىنداي وپەراتسيا جاساپ كەلگەن. بىراق ولار ءبىزدىڭ شەتەلدەگى شەبەرلىك ساباقتارىنان سۇرىپتاپ اپارعان جاڭا كوزقاراستى, جاڭا ادىستەردى كوردى. ونىڭ ۇستىنە ءبىز ماشىقتانعان ونكوحيرۋرگتەر بولعاندىقتان, كۇردەلى وپەراتسياعا بايىپپەن قارايمىز, قاۋىپتەردەن, وزگەشەلىكتەردەن قورىقپايمىز. وسى بىرىگىپ جاساعان تابىستى وپەراتسيالارىمىزدان كەيىن اقتوبەلىك ارىپتەستەرىمىزگە الىس شەتەلدە وقۋ ءۇشىن قارجىلاندىرۋ قوسۋعا ۋادە بەرىلدى. بۇل دا ناتيجە. ويتكەنى قازىرگى تاڭدا الەمدىك دەڭگەيدەگى مەديتسينا مايتالماندارىمەن قارىم-قاتىناس جاساماسا بولمايدى, ونىڭ ۇستىنە مەديتسينا دا جىلدام دامىپ جاتىر, ءار جەتىستىكتى, وزىق تاجىريبەلەردى قالت جىبەرمەۋىمىز قاجەت, – دەيدى الماتىلىق ماماندار.
الداعى كۇندەرى الماتىدان كەلگەن دارىگەرلەردىڭ باسقا كۇردەلى وپەراتسيالارى, شەبەرلىك ساباقتارى, كونسۋلتاتسيالارى كەڭىنەن تالقىلاناتىن بولادى. قازىردىڭ وزىندە بۇل باستامانى جەرگىلىكتى الەۋمەتتىك جەلىلەر بەلسەندى تۇردە تالقىلادى. اقتوبە ءۇشىن استانا مەن الماتى دارىگەرلەرىنىڭ كەلۋى ۇلكەن وقيعاعا اينالدى. بۇدان ءارى قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ كۇندەرى اقتوبە قالاسىنداعى تاجىريبەنى قاپەرگە الا وتىرىپ, باسقا وڭىرلەردە جالعاسىن تابادى. مۇندا ەڭ باستى ماقسات – حالىق قاي وڭىردە تۇرسا دا, بىلىكتى مامانداردىڭ كومەگىنە قول جەتكىزە الۋى كەرەك. ويتكەنى «قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ كۇندەرى» اياسىندا ناۋقاس جانداردىڭ كوپشىلىگى استانا مەن الماتىعا بارۋعا مۇمكىندىگى جوق الىس اۋىلداردا تۇراتىنى ايان بولدى.
الماتى