تالداۋ مەكتەبىنىڭ ەكىنشى كەزەڭىنە قاتىسۋشىلاردى وقىتۋ باستالدى. سەنات جانىنداعى جاس ساراپشىلار كلۋبىنىڭ باستاماسىمەن قولعا الىنعان بۇل جوباعا بۇعان دەيىن پالاتا توراعاسى ماۋلەن اشىمباەۆ قولداۋ بىلدىرگەن ەدى. مەكتەپتىڭ ەكىنشى كەزەڭىندە قازاقستاندىق جانە شەتەلدىك بەلگىلى ساراپشىلار ءدارىس وقيدى, دەپ حابارلايدى Egemen.kz.
ەكىنشى كەزەڭنىڭ اشىلۋىندا سەنات توراعاسى قازىرگى تاڭدا سىني ويلاۋدى جۇيەلى تۇردە دامىتۋدىڭ ماڭىزدى ەكەنىن جانە بارلىق سالادا ساپالى تالداۋعا دەگەن سۇرانىستىڭ ارتىپ كەلە جاتقانىن ايتتى. سونداي-اق پالاتا سپيكەرى ساراپشىلار تاراپىنان جوباعا دەگەن قىزىعۋشىلىقتىڭ جوعارى بولۋىنا بايلانىستى ەكىنشى كەزەڭگە قابىلداناتىن وتىنىمدەر كولەمى ۇلعايتىلعانىن اتاپ ءوتتى. سوعان سايكەس قاتىسۋشىلار سانىن دا ارتتىرۋ جونىندە شەشىم قابىلدانعان.
ماۋلەن اشىمباەۆ اتاپ وتكەندەي, جوبا مەملەكەتتىك باسقارۋدا, الەۋمەتتىك جانە گۋمانيتارلىق زەرتتەۋلەردە, مەديا جانە باسقا دا سالالاردا تالدامالىق تاسىلدەردى كۇشەيتۋدى كوزدەيدى. سوعان سايكەس وقىتۋ پروتسەسىندە ساپالى تالداۋدىڭ كريتەريلەرىن, ستاندارتتارى مەن ەرەكشەلىكتەرىن يگەرۋگە, اناليتيكالىق ماتىندەردى جازۋدىڭ تاجىريبەلىك داعدىلارىن پىسىقتاۋعا باسىمدىق بەرىلەدى. بيىلعى وقىتۋ كۋرسى «قازاقستاننىڭ وڭىرلىك دامۋى: پروبلەمالار مەن پەرسپەكتيۆالار» تاقىرىبىنا ارنالىپ وتىر.
ءوز دارىسىندە سەنات توراعاسى مەملەكەتتىك باسقارۋداعى اناليتيكالىق ادىستەر مەن تاسىلدەرگە نازار اۋداردى. سونىمەن قاتار ساپالى اناليتيكا فورمۋلاسىمەن جانە زەرتتەۋلەر مەن پراكتيكالىق داعدىلاردى جەتىلدىرۋگە قاتىستى جەكە تاجىريبەسىمەن ءبولىستى.
«قازاقستاندا مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن اۋقىمدى ساياسي جانە الەۋمەتتىك-ەكونوميكالىق رەفورمالار ىسكە اسىرىلىپ جاتىر. رەفەرەندۋم قورىتىندىسى بويىنشا كونستيتۋتسياعا ماڭىزدى وزگەرىستەر ەنگىزىلدى. بارلىق بيلىك ورگاندارىن قايتا جاڭعىرتۋ جانە كادرلىق جاڭارتۋ پروتسەسى باستالدى. مۇنىڭ ءبارى – ساياسي جۇيەنى, ەكونوميكالىق, الەۋمەتتىك سالالاردى وزگەرتەتىن ىرگەلى باستامالار. ەلىمىز دەموكراتيالىق جانە الەۋمەتتىك تۇرعىدان ودان ءارى ءوسىپ-وركەندەۋى ءۇشىن ءالى كوپ جۇمىس ىستەلۋى قاجەت. سوندىقتان بىزگە دۇرىس شەشىم قابىلداي الاتىن, سىني ويلاۋ جانە تالداۋ قابىلەتى جوعارى, ءبىلىمدى ماماندار كەرەك», دەدى ماۋلەن اشىمباەۆ.
سەنات سپيكەرىنىڭ ايتۋىنشا, تالداۋ مەكتەبى اناليتيكالىق ويلاۋ قابىلەتىن جەتىلدىرۋگە, ورتامەن قارىم-قاتىناس جاساۋعا جانە نەتۆوركينگتى كەڭەيتۋگە كومەكتەسەدى.
«اناليتيكالىق جۇمىس ادامنان ۇنەمى ءوزىن-ءوزى دامىتىپ, جەتىلدىرىپ وتىرۋدى تالاپ ەتەدى. قولعا العان ءىستى ەگجەي-تەگجەي تالداپ, ونىڭ ءمانىن ءتۇسىنۋ اسا ماڭىزدى. وسى باعىتتا ءوز ويلارىڭىزدى جۇيەلەپ الىڭىزدار. يدەيالارىڭىزدى جەتكىزۋدىڭ ماڭىزدى, قىزىقتى جولىن ىزدەڭىزدەر. ەگەر بولىپ جاتقان جاعدايدى جۇيەلەۋدى, ساپالى تالداۋدى مەڭگەرىپ, كاسىبي ماتىندەر ازىرلەۋ بىلىكتىلىگىن جەتىلدىرىپ, دالەلدى ءارى سەنىمدى سويلەۋدى ۇيرەنسەڭىزدەر – وزدەرىڭىزدىڭ باسەكەگە قابىلەتتىلىكتەرىڭىزدى جانە سۇرانىسقا يە بولۋ مۇمكىندىگىن ارتتىراسىزدار. وسى جولدا ءبىزدىڭ تالداۋ مەكتەبى ءوز سەپتىگىن تيگىزەدى دەپ سەنەمىن», دەدى ماۋلەن اشىمباەۆ.