قازاقستان ەلشىسى ساتىبالدى بۇرشاقوۆتىڭ يزرايل پرەزيدەنتىنىڭ سىرتقى ساياسات جونىندەگى اعا كەڭەسشىسى تسۆي ۆاپنيمەن كەزدەسۋى بارىسىندا قازاقستان مەن يزرايل اراسىنداعى 2023 جىلعا ارنالعان ءىس-قيمىل جوسپارى تالقىلاندى, دەپ حابارلايدى Egemen.kz.
كەلىسسوزدەر اياسىندا قازاقستاندىق ديپلومات يزرايلدىك ارىپتەستەرگە مەملەكەتتىك ورگانداردا قاراستىرىلىپ جاتقان ەكىجاقتى كەلىسىمدەردىڭ جوبالارىن كەلىستىرۋدى جانداندىرۋدى, سونىمەن قاتار ساۋدا-ەكونوميكالىق بايلانىستاردى نىعايتۋ بويىنشا جۇمىستى كۇشەيتۋدى ۇسىندى.
سونىمەن بىرگە س. بۇرشاقوۆ يزرايلدىك ديپلوماتتى پرەزيدەنت قاسىم-جومارت توقاەۆتىڭ «ادىلەتتى قازاقستان» قۇرۋ بويىنشا جۇرگىزىپ جاتقان ماڭىزدى رەفورمالارى تۋرالى ەگجەي-تەگجەيلى حاباردار ەتتى.
«تس. ۆاپني جاڭا جىلداعى ەكىجاقتى ىنتىماقتاستىقتىڭ كۇن ءتارتىبىنىڭ وزەكتىلىگىن اتاپ ءوتىپ, بەلسەندى ارەكەتتەسۋگە دايىن ەكەنىن ءبىلدىردى. كەزدەسۋ قورىتىندىسى بويىنشا تاراپتار قازاقستان-يزرايل باستامالارىن ودان ءارى ىلگەرىلەتۋگە ۋاعدالاستى», دەپ جازىلعان ءسىم تاراتقان حابارلامادا.