وتكەن جىلدىڭ سوڭىندا ماڭعىستاۋ وبلىسى بويىنشا قىلمىستىق اتقارۋ جۇيەسى دەپارتامەنتىنىڭ مۇراجايى اشىلىپ, قىم-قۋىت تاعدىر جولىن قاعازعا حاتتاعان كىتاپتىڭ تۇساۋى كەسىلدى.
ايماق باسشىسى ن.نوعاەۆ قاتىسقان ءىس-شارادا مۇراجايدى اشۋ, لەنتا قيۋ قۇرمەتى قىلمىستىق اتقارۋ جۇيەسىنىڭ ارداگەرلەرى ك.قۇلماعامبەتوۆ پەن م.شلەكەنوۆكە بەرىلسە, «ماڭعىستاۋ ءوڭىرىنىڭ قىلمىستىق اتقارۋ جۇيەسى: وتكەنى مەن بۇگىنى» اتتى كىتاپتىڭ تۇساۋىن كەسۋ قۇرمەتى وبلىس بويىنشا قىلمىستىق-اتقارۋ جۇيەسى دەپارتامەنتىنىڭ باستىعى, ادىلەت پولكوۆنيگى ا.قاليەۆ پەن اتالعان دەپارتامەنت ارداگەرلەر كەڭەسىنىڭ توراعاسى د.بەگاليەۆكە بۇيىردى.
دەرەكتى-پۋبليتسيستيكالىق سيپاتتا جازىلعان كىتاپتا ماڭعىستاۋ وبلىسىنداعى قىلمىستىق اتقارۋ جۇيەسىنىڭ قالىپتاسۋ جولى مەن دامۋ تاريحى, بۇگىنگى تاڭداعى تىنىس-تىرشىلىگى, وسى سالادا ەڭبەك ەتكەن جانە قىزمەت ەتىپ جۇرگەن ازاماتتاردىڭ ەڭبەكتەرى سيپاتتالادى. سونداي-اق تۋىندىدا وسى جۇيەنىڭ قيلى جولى, قالىپتاسۋى, قيىندىعى مەن جەتىستىگى حاتتالعان.
سالتاناتتى ءىس-شارادا وبلىس اكىمى ن.نوعاەۆ كىتاپتى تاريحي قۇندى ەڭبەك دەپ باعالاپ, مەكەمەنىڭ وتكەنى مەن بۇگىنىن قاعاز بەتىنە ءتۇسىرىپ, قاتتاپ بەرگەن اۆتورلارعا العىسىن ءبىلدىردى.
ماڭعىستاۋ وبلىسى