سەنات توراعاسى ماۋلەن اشىمباەۆ جامبىل وبلىسىنىڭ ءماسليحات دەپۋتاتتارىمەن كەزدەسىپ, قازاقستاننىڭ ساياسي جۇيەسىن جاڭعىرتۋ ماسەلەسىن تالقىلادى, دەپ حابارلايدى Egemen.kz.
كەزدەسۋ بارىسىندا ماۋلەن اشىمباەۆ الداعى ۋاقىتتا سەنات وڭىرلەردىڭ مۇددەسىن بىلدىرەتىن پالاتا رەتىندە ماسليحاتتارمەن بايلانىستى ودان ءارى ارتتىرۋدى جوسپارلاپ وتىرعانىن ايتتى. پالاتا سپيكەرى ءوز سوزىندە بۇل باعىتتاعى جۇمىستىڭ ناقتى باعىتتارى مەن فورماتىنا كەڭىنەن توقتالىپ ءوتتى.
«زاڭ شىعارۋ ءىسى اۋقىمدى ءارى كەشەندى پروتسەسس. زاڭداردىڭ بارلىق نورمالارى الدىن الا جان-جاقتى تالقىلانىپ, پىسىقتالادى. وسى جۇمىستارعا ءماسليحات دەپۋتاتتارىنىڭ تۇراقتى قاتىسۋى ايرىقشا مانگە يە. سىزدەر جەرگىلىكتى جەرلەردەگى جاعدايدى جاقسى بىلەسىزدەر. سوندىقتان زاڭ شىعارۋ ىسىندە ءماسليحات دەپۋتاتتارىنىڭ وي-پىكىرلەرى مەن ۇسىنىستارىنىڭ ماڭىزى زور», دەدى ماۋلەن اشىمباەۆ.
ول مەملەكەت باسشىسى قاسىم-جومارت توقاەۆتىڭ باستاماسىمەن ىسكە اسىرىلعان كونستيتۋتسيالىق رەفورمانىڭ ناتيجەسىندە ءماسليحاتتاردىڭ ءرولى ەداۋىر ارتقانىن جانە سايلاۋ ۇلگىسى وزگەرگەنىن دە اتاپ ءوتتى. مۇنداي شارالاردىڭ ءبارى جەرگىلىكتى جەردە باسەكەلى ساياسي ورتا قالىپتاستىرىپ, ەلدىڭ الدىندا بەدەلى بار جاڭا تۇلعالاردىڭ ساياساتقا كەلۋى ءۇشىن قولعا الىنىپ وتىر.
سونىمەن قاتار ماۋلەن اشىمباەۆ ەلىمىزدە جۇرگىزىلىپ جاتقان جۇيەلى ساياسي جاڭعىرتۋلار اياسىندا سەناتتىڭ الدىندا تۇرعان ماقسات-مىندەتتەردى اتادى.
«بۇدان بىلاي سەنات وڭىرلەردىڭ مۇددەسىن قورعايتىن پالاتاعا اينالادى. ماڭىزدى ەكونوميكالىق جانە الەۋمەتتىك پروتسەستەر نەگىزىنەن ايماقتاردا وتەتىنى بەلگىلى. وڭىرلەردى كەشەندى تۇردە دامىتپاي, تۇتاس ەل دامۋىن جاڭا دەڭگەيگە كوتەرۋ مۇمكىن ەمەس. سوندىقتان مەملەكەت باسشىسى بەرگەن تاپسىرمالاردىڭ, ۇلتتىق جوبالاردىڭ, شاعىن جانە ورتا بيزنەستى قولداۋعا ارنالعان باعدارلامالاردىڭ وڭىرلەردە ىسكە اسىرىلۋ بارىسىن باقىلاۋعا باسا ءمان بەرىلەدى», دەدى ول.
سونداي-اق سەنات سپيكەرى اگرارلىق سالادا ەڭبەك ەتىپ جۇرگەن جەرگىلىكتى ماماندارمەن جانە ەڭبەك ۇجىمدارىمەن كەزدەستى. ءىس-شارادا «جامبىل وبلىسى تۇرعىندارىنىڭ تابىسىن ارتتىرۋ»جانە «اۋىلداردىڭ دەنساۋلىق ساقتاۋ جۇيەسىن جاڭعىرتۋ» پيلوتتىق جوبالارىن ىسكە اسىرۋ بارىسى تالقىلاندى.
«پرەزيدەنتىمىز اۋىل شارۋاشىلىعىن جانە اۋىلدىق اۋماقتاردى دامىتۋعا ۇنەمى باسا ءمان بەرىپ كەلەدى. اۋىل شارۋاشىلىعى كووپەراتسياسىن دامىتۋعا ۇلكەن كوڭىل بولىنەدى. الداعى جىلداردا مەملەكەت تاراپىنان وسى ماقساتقا 1 تريلليون تەڭگە بولىنەدى. ول 1 ميلليون اۋىل تۇرعىنىن قامتيدى. ءبىز بيۋدجەتتى قاراۋ جانە زاڭنامالىق جۇمىس بارىسىندا وسى ماسەلەلەردى نازارعا الىپ, جۇمىس ىستەيمىز. سىزدەر ايتقان ۇسىنىستار مەن باستامالاردىڭ ءبارى قولداۋعا لايىق. ولاردى ىسكە اسىرۋ جولىندا ءبارىمىز بىرگە بەلسەندى جۇمىس ىستەۋىمىز كەرەك», دەپ تۇيىندەدى ماۋلەن اشىمباەۆ.
وبلىسقا ساپارى كەزىندە سەنات توراعاسى قاراتاۋ قالاسىنىڭ ورتالىق قازاندىعىنىڭ جاي-كۇيىمەن جانە شاھارداعى ۇيلەر مەن ينفراقۇرىلىمدى قالپىنا كەلتىرۋ جۇمىستارىمەن تانىستى.
ەسكە سالا كەتسەك, ءبىر اپتا بۇرىن بۇل وڭىردە قاتتى داۋىل سوعىپ, سالدارىنان ايماقتاعى ينفراقۇرىلىمعا, كوپقاباتتى جانە جەكە تۇرعىن ۇيلەرگە, الەۋمەتتىك نىساندارعا, سونداي-اق ەلەكتر باعاندارى مەن جەلىسىنە ايتارلىقتاي زاردابى تيگەن ەدى.