جاقىندا دوستىق ۇيىندە وبلىستىق حالىق شىعارماشىلىعى ءۇيىنىڭ ۇيىمداستىرۋىمەن وتكەن «وتانىم – وتباسىم» اتتى وتباسىلىق انسامبلدەردىڭ ايماقتىق بايقاۋىنا قازاقستاننىڭ باتىس وڭىرىندەگى وبلىستاردان 13 ونەرلى وتباسى قاتىستى. بايقاۋ شىمىلدىعىن رەسپۋبليكاعا تانىمال اقتوبەلىك ونەر تارلاندارى قانات پەن سۆەتلانا ايتباەۆتار انمەن اشتى. ودان كەيىن بايقاۋ قاتىسۋشىلارىنا ەلۋ جىل بويى جۇپتارى جازىلماي, جاراستى شاڭىراق استىندا ءومىر ءسۇرىپ, 6 بالا, 12 نەمەرە, 2 شوبەرە ءسۇيىپ وتىرعان قادىرمەندى قاريالار بولات پەن باقىتشەكەن شالاباەۆتار اق باتالارىن بەردى. وبلىستىق ءمادەنيەت, مۇراعات جانە قۇجاتتاما باسقارماسى باسشىسىنىڭ ورىنباسارى قىدىرعالي ەرمۇقان ونەر دوداسىنا قاتىسۋشىلارعا قۇتتىقتاۋ ءسوز ارناپ, ونەرپازدارعا ساتتىلىك ءتىلەدى. باتىس قازاقستان وبلىسى كازتالوۆكا اۋدانى, جالپاقتال اۋىلىنان كەلگەن قابيەۆتەردىڭ, قاراتوبە اۋدانىنان كەلگەن بايتەمىروۆتەردىڭ حالىقتىق اتاعى بار وتباسىلىق انسامبلدەرىنىڭ ونەرىنە كورەرمەندەر ريزا بولدى. اتىراۋ وبلىسى, قىزىلقوعا اۋدانىنان كەلگەن قاراباليندەردىڭ حالىقتىق, ماڭعىستاۋ وبلىسى, قاراقيا اۋدانىنىڭ جاكۋپوۆتەردىڭ وتباسىلىق انسامبلدەرى ساحنا ءسانىن كەلتىرىپ, بايقاۋدى انمەن ادىپتەپ, كۇيمەن كومكەردى. اقتوبەلىكتەردىڭ نامىسىن قاي سايىستا دا قولدان بەرمەي جۇرگەن ىرعىزدىق ەسمۇرزيندەر وتباسى ءبىرىنشى ورىنعا لايىق دەپ تانىلدى. ەكى ەكىنشى ورىننىڭ ءبىرى – بايعانيندىك حالىقتىق ءانۋاروۆتار, ەكىنشىسى, ويىلدىق ماحمەتوۆتەر وتباسىلىق انسامبلدەرىنە بۇيىردى. ال ءۇش ءۇشىنشى ورىندى اتىراۋلىق قارابالين, باتىسقازاقستاندىق بايتەمىروۆتەر, ماڭعىستاۋلىق جاكۋپوۆتەر انسامبلدەرى يەلەندى. «ۇلتتىق ونەردى ناسيحاتتاعانى ءۇشىن» نوميناتسياسىنا العا اۋدانىنان كەلگەن كرەمەرلەر, «ءداستۇرلى ءاندى دارىپتەگەن» نوميناتسياسىنا اقتوبەلىك جەتەسوۆتەردىڭ «شاشۋ», «كورەرمەندەر كوزايىمى» نوميناتسياسىنا تەمىر اۋدانىنان كەلگەن شىلمۋرزيندەردىڭ, «گۇلسانا», «مەرەيلى وتباسى» نوميناتسياسىنا مۇعالجارلىق سەيتىموۆتەردىڭ, «اسەمدىگىمەن ارلەندىرگەن» نوميناتسياسىنا حرومتاۋلىق قازباەۆتاردىڭ, «ونەرلىلەر ورداسى» نوميناتسياسىنا ءايتەكەبيلىك ورازىمبەتوۆتەردىڭ وتباسىلىق انسامبلدەرى يە بولدى. جەڭىمپازدار مەن جۇلدەگەرلەر ديپلومدارمەن, باعالى سىيلىقتارمەن ماراپاتتالدى.
ءساتىبالدىساۋىرباي,
«ەگەمەن قازاقستان».
اقتوبە وبلىسى.