قازاقستان قارۋلى كۇشتەرىندە ماماندىق بويىنشا دايىندىق ساباقتارى اياقتالدى. ءار وقۋ كەزەڭىنىڭ باسىندا وتكىزىلەتىن بۇل شارا جاۋىنگەرلىك دايىندىق باعدارلاماسىنىڭ نەگىزگى كەزەڭى سانالادى, دەپ حابارلايدى Egemen.kz.
ماماندىق بويىنشا دايىندىق اسكەري قىزمەتشىلەردىڭ لاۋازىمدىق مىندەتىنە سايكەس وقۋدان وتەتىن ساباقتار كەشەنىن قامتيدى. ول اسكەري-ەسەپتىك ماماندىقتى, ۇرىسقا قاجەتتى داعدىلاردى, سونداي-اق قارۋ-جاراقپەن جانە اسكەري تەحنيكامەن ساۋاتتى جۇمىس ىستەۋدى يگەرۋگە نەگىزدەلگەن.
اسكەري بولىمدەردە جەكە دايىندىقتار شتاتتىق-لاۋازىمدىق مىندەتىنە سايكەس تاجىريبەلى نۇسقاۋشىلاردىڭ باسشىلىعىمەن جۇزەگە اسىرىلدى. ساباقتار وقۋ-ادىستەمەلىك جانە كورنەكى قۇرالداردى پايدالانا وتىرىپ, قارۋ-جاراق پەن اسكەري تەحنيكادا, وقۋ سىنىپتارى مەن پوليگونداردا وتكىزىلدى.
مەحانيك-جۇرگىزۋشىلەردى, كوزدەۋشى-وپەراتورلاردى, پۋلەمەتشىلەردى, گراناتا اتقىشتاردى, ءورت سوندىرۋشىلەردى جانە بولىمشەلەردىڭ جاۋىنگەرلىك دايىندىعىن انىقتايتىن باسقا دا مامانداردى دايارلاۋ ماقساتىمەن جەكە توپتار قۇرىلدى.
بولىمشە كومانديرلەرى ۇرىستى ۇيىمداستىرۋ, اتىستى باسقارۋ, قارۋدى قالىپتى ۇرىسقا كەلتىرۋ جانە جاۋىنگەرلىك دايارلىق پاندەرى بويىنشا ساباقتار وتكىزۋ ادىستەمەسىن پىسىقتادى.
جاۋىنگەرلىك دايارلىقتىڭ بارلىق پاندەرىنەن پراكتيكالىق داعدىلاردى جەتىلدىرۋگە, شتاتتىق قارۋ-جاراق پەن اسكەري تەحنيكانى قولدانۋعا, ادىستەمەلىك ءبىلىمدى ارتتىرۋعا جانە قاتاڭ جارعىلىق ءتارتىپتى ساقتاۋعا ەرەكشە نازار اۋدارىلدى.
وقۋ اياقتالعان سوڭ اسكەري قىزمەتشىلەر سىناقتار مەن ەمتيحاندار تاپسىرىپ, ناتيجەسىنە سايكەس شتاتتىق تەحنيكامەن جانە قارۋ-جاراقپەن جۇمىس ىستەۋگە رۇقسات بەرىلەدى.
جاۋىنگەرلىك دايىندىقتىڭ كەلەسى كەزەڭى جاۋىنگەرلىك مىندەتتەردى ورىنداۋ كەزىندە بولىمشەلەردىڭ, بولىمدەردىڭ, قۇرامالاردىڭ جانە باسقارۋ ورگاندارىنىڭ بىرلەسكەن ءىس-قيمىلدارىن ۇيلەستىرۋ جۇزەگە اسپاق.