ءيا, قىزىلوردادا قالا سالىنادى. سىرداريانىڭ سول جاعالاۋىنا. بۇگىندە قالا تۇسەتىن جەردىڭ استى-ءۇستى تولىق زەرتتەۋدەن ءوتتى. 90 مىڭعا جۋىق حالىق سياتىن جاڭا شاھاردىڭ كەسكىن-كەلبەتى دە ەرەكشە بولماق. ونىڭ ارحيتەكتۋراسىندا شىعىستىڭ شىرايلى كەلبەتى دە, قازاقى ناقىش تا, زاماناۋي تەحنولوگيا دا كورىنىس تابادى. قالانى باستاماس بۇرىن, سىرداريانىڭ ارعى بەتى مەن بەرگى شەتىن جالعايتىن كوپىر سالۋ كەرەك. مىنە, بۇرناعى كۇنى سول كوپىردىڭ قۇرىلىسى باستالدى. وعان وبلىس اكىمى قىرىمبەك كوشەرباەۆ جانە سەنات پەن ءماجىلىستىڭ ءبىر توپ دەپۋتاتتارى قاتىستى.
وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مارات بايىمبەتوۆ تۇساۋكەسەر راسىمگە ارنايى كەلگەن مەيمانداردى ستەند ارقىلى كوپىر قۇرىلىسىنىڭ جوباسىمەن تانىستىرىپ, ونىڭ جۇمىسىن ەلىمىزگە بەلگىلى «موستوترياد-25» جشس سەكىلدى تاجىريبەلى كومپانيا جۇرگىزگەلى وتىرعانىن جەتكىزدى. جينالعاندار الدىندا ءسوز العان ءوڭىر باسشىسى قىرىمبەك كوشەرباەۆ قىزىلوردا قالاسىنىڭ 2009 جىلى بەكىگەن باس جوسپارىنا سايكەس 2300 گەكتاردى قۇرايتىن سىرداريا وزەنىنىڭ سول جاعالاۋىن جوسپارلى يگەرۋ جۇمىستارى باستالعالى وتىرعانىن قۋانىشپەن اتاپ ءوتتى.
– بۇگىنگى شارانى جاي عانا كوپىردىڭ قۇرىلىسى باستالدى دەپ قابىلداماۋ كەرەك. مۇنى ۇلى وزەننىڭ سول جاعالاۋىندا جاڭا قالانىڭ قۇرىلىسى باستالاتىن تاريحي ءسات دەپ ساناۋىمىز قاجەت. باس جوسپارعا سايكەس بۇل اۋماقتا الەۋمەتتىك-اكىمشىلىك, وندىرىستىك, مادەني, ورتا جانە شاعىن بيزنەس نىساندارىن سالۋ قارالعان. بۇعان قوسا, ءبىز 15 مىڭ ادامدى جۇمىسپەن قامتيتىن بولامىز, – دەدى.
جالپى قۇنى 5,9 ميلليارد تەڭگە تۇراتىن كوپىر قۇرىلىسىنا بيىل رەسپۋبليكا بيۋدجەتىنەن 1 ميلليارد تەڭگە قارالىپتى. وزگە قاراجات ەل قازىناسىنان 2015 جىلى بولىنەدى. ال, كوپىر قۇرىلىسى كەلەر جىلدىڭ سوڭىن الا اياقتالادى.
كوپىر سالۋ, قۇدىق قازۋ ساۋاپتى ءىستىڭ قاتارىنان عوي. ال داريانىڭ ەكى شەتىن قوسىپ, جاڭا قالانىڭ قۇرىلىسىنا جول اشاتىن بۇل كوپىر ۇلكەن ساۋاپتى ءىستىڭ باستاماسى دەپ بىلەمىز.
ەرجان بايتىلەس,
«ەگەمەن قازاقستان».
قىزىلوردا.