سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا دەپۋتاتتار كۇن تارتىبىنە شىعارىلعان زاڭ جوبالارىن قارادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەناتورلار قاراعان زاڭ جوباسىنىڭ ءبىرى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى». زاڭ جوباسىنداعى نورمالار كوپتەگەن سالاداعى ماسەلەلەردى شەشۋگە باعىتتالعان. اتاپ ايقاندا, وڭىرلەردىڭ قارجىلىق دەربەستىگىن ودان ءارى ارتتىرۋ ءۇشىن سالىق تۇسىمدەرىنىڭ جەكەلەگەن تۇرلەرىن جەرگىلىكتى بيۋدجەتكە بەرۋ كوزدەلىپ وتىر. تۇزەتۋلەر مەملەكەتتىك ساتىپ الۋداعى باسەكەلەستىك ورتانى كەڭەيتۋگە جانە وسى سالاداعى سىبايلاس جەمقورلىق تاۋەكەلدەرىن ازايتۋعا جاعداي جاسايدى. زاڭ جوباسى مونوپوليا وپەراتورلارىن رەتتەۋ مەحانيزمىن قايتا قاراۋدى جانە مەملەكەتتىك-جەكەمەنشىك سەرىكتەستىكتى ىسكە اسىرۋ تاسىلدەرىن جەتىلدىرۋدى دە قامتيدى.
جالپى سەناتورلار زاڭ جوباسىن قولدادى. الايدا قۇجاتتى قاراۋ بارىسىندا دەپۋتاتتار وعان بىرقاتار وزگەرتۋ ەنگىزۋدى ۇسىندى. سوعان بايلانىستى سەناتورلار ۇسىنعان تۇزەتۋلەر ەنگىزىلىپ, زاڭ جوباسىن ماجىلىسكە قايتارۋ تۋرالى شەشىم قابىلداندى.
«مەملەكەت باسشىسىنىڭ تاپسىرماسىنا سايكەس ەلگە 2022 جىلعى 1 قىركۇيەككە دەيىن اكەلىنگەن ءرۋلى وڭ جاقتا ورنالاسقان اۆتوكولىكتەر بويىنشا باستاپقى تىركەۋ مۇمكىندىگىن بەرۋ ۇسىنىلدى. بۇل 20 مىڭعا جۋىق ازاماتىمىزعا ءوز كولىكتەرىن زاڭداستىرۋعا مۇمكىندىك بەرەدى. سونداي-اق سەناتورلار ازاماتتاردىڭ بانكتىك, سالىقتىق قۇپياسىنا قول جەتكىزۋ ماسەلەلەرىنە قاتىستى ۋاكىلەتتى ورگاندارعا نەگىزسىز كەڭ وكىلەتتىكتەر بەرەتىن جەكەلەگەن ەرەجەلەردى الىپ تاستادى. وسى زاڭ قابىلدانعاننان كەيىن حالىقتىڭ ءال-اۋقاتىن جاقسارتۋعا وڭ اسەرىن تيگىزەدى دەپ سەنەمىز», دەدى ماۋلەن اشىمباەۆ.
سونىمەن قاتار وتىرىس بارىسىندا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. سەناتورلار بۇل قۇجاتقا سوت جۇيەسىنىڭ جانە «استانا» حالىقارالىق قارجى ورتالىعىنىڭ قىزمەتىنە بايلانىستى وزگەرتۋلەر ەنگىزۋدى ۇسىندى. ناتيجەسىندە سەناتتىڭ تۇزەتۋلەرى ەنگىزىلىپ, زاڭ جوباسى ماجىلىسكە قايتارىلدى.
پالاتا وتىرىسىندا سەناتورلار وزدەرىنىڭ دەپۋتاتتىق ساۋالدارىن دا جولدادى.
ولگا بۋلاۆكينا وڭىرلەردەگى ەنەرگەتيكالىق جابدىقتار مەن تازارتۋ نىساندارىنىڭ ابدەن توزعانىن ايتىپ, الاڭداۋشىلىق ءبىلدىردى. سەناتور ەنەرگەتيكالىق ستراتەگيانى ازىرلەۋدى, سونداي-اق قالالار مەن اۋدانداردىڭ كارىز تازارتۋ نىساندارىن توزىعى جەتكەن ينفراقۇرىلىم ءاۋديتى نىساندارىنىڭ تىزىمىنە ەنگىزۋدى ۇسىندى.
عالياسقار سارىباەۆ جەتىسۋ وبلىسىندا جەرگىلىكتى شارۋالاردىڭ جەر ۋچاسكەلەرى جاڭا وبلىستىڭ قۇرىلۋىنا بايلانىستى تيىسىنشە قايتا رەسىمدەلمەگەن جاعدايدا, ولار ءۇشىن مەملەكەتتىك سۋبسيديالار قولجەتىمسىز بولىپ قالۋى مۇمكىن ەكەنىن ايتىپ, ماسەلە كوتەردى.