استانادا Dala dauysy شىعارماشىلىق بايقاۋىنىڭ جەڭىمپازدارى ماراپاتتالدى. بايقاۋ 5 نوميناتسيا بويىنشا 16 سىيلىقتى قامتىدى, دەپ حابارلايدى Egemen.kz.
جوباعا قاتىسۋ ءۇشىن 200-دەن استام ءوتىنىم تۇسكەن. بۇل قازاقستاندىق كومپوزيتورلار مەن جازۋشىلاردىڭ سوڭعى ءۇش جىلدا جازىلعان جانە بۇرىن كوپشىلىك الدىندا ورىندالماعان تۋىندىلارى.
«بايقاۋ كوپشىلىككە تىڭ تۋىندىلار ۇسىنىپ قانا قويماي, مۇلدەم جاڭا ەسىمدەر اشتى. جەڭىمپازدار مەن لاۋرەاتتاردىڭ شىعارماشىلىق جۇمىستارى حالقىمىزدىڭ تاريحى مەن مادەنيەتىندە ماڭىزدى ءىز قالدىرىپ, قازىرگى مادەني لاندشافتتىڭ ءبىر بولىگىنە اينالاتىنىنا سەنىمدىمىن. بۇل جوبانى ءبىز جاس اۆتورلاردىڭ وزدەرىن تانىتۋى جانە مەملەكەتتىڭ قولداۋىنا يە بولۋ ءۇشىن داستۇرگە اينالدىرعىمىز كەلەدى», دەدى مادەنيەت جانە سپورت ءمينيسترى داۋرەن اباەۆ رەسمي ماراپاتتاۋ راسىمىندە.
جەڭىمپازدار مەن لاۋرەاتتاردى قازاقستاننىڭ بەلگىلى مادەنيەت جانە ونەر قايراتكەرلەرىنەن ارنايى قۇرىلعان قازىلار القاسى جابىق تۇردە انىقتادى. بايقاۋدىڭ ەرەكشەلىگى – قاتىسقان اۆتورلاردىڭ دا, ولاردىڭ جۇمىسىن ساراپتاعان قازىلار القاسىنىڭ قۇرامى دا سوڭعى ساتكە دەيىن قۇپيا بولدى.
رەسپۋبليكالىق Dala dauysy بايقاۋىنىڭ جەڭىمپازدارى كىمدەر؟
«ۇزدىك كلاسسيكالىق مۋزىكا» نوميناتسياسىمەن جەكە اسپاپقا ارنالعان «يلليۋزيا» شىعارماسى ءۇشىن بەيبىت ءابىل ۇلى دالدەنباي, انسامبلدەرگە ارنالعان «(Re)incarnation [Yerlik]» شىعارماسى ءۇشىن سانجار بايتەرەكوۆ, حالىق اسپاپتارى, ۇرمەلى, سيمفونيالىق جانە ەسترادالىق-سيمفونيالىق وركەسترلەرىنە ارنالعان «سكريپكا جانە سيمفونيالىق وركەسترىنە ارنالعان كونتسەرت» شىعارماسى ءۇشىن شىرىن بازارقۇلوۆا ماراپاتتالدى.
«ۇزدىك مۋزىكالىق-تەاترلىق جانر تۋىندىسى» نوميناتسياسى بويىنشا «ساكەن» وپەراسى ءۇشىن كومپوزيتور ءالىبي ءابدىنۇروۆ, ليبرەتتو اۆتورى قانات ءجۇنىسوۆ, «الدار كوسە» بالەتى ءۇشىن كومپوزيتور المابەك مەيىربەكوۆتىڭ مۇراگەرى ەردەن وردابەك ۇلى, ليبرەتتو اۆتورى دامير ۋرازىمبەتوۆ, «الپامىس» بالەتى ءۇشىن كومپوزيتور ارمان جايىم, ليبرەتتو اۆتورى ايتقالي جايىموۆ ماراپاتتالدى.
ەسترادا جانرىنداعى «رەسپۋبليكا ءانى» نوميناتسياسىن «ەلىم دەپ سوققان جۇرەگىم» ءانى ءۇشىن يسا اۋعانتاي الدى. ءماتىنىن جازعان – سايات راقىمجان.
«ۇزدىك فولكلورلىق مۋزىكا» نوميناتسياسىنا اۆتورلىق ۆوكالدىق-اسپاپتىق تۋىندى ء«بىزدىڭ اۋىل تاماشا» ءانى ءۇشىن ورال بايسەڭگىر, اۆتورلىق ۆوكالدىق نەمەسە ۆوكالدىق-اسپاپتىق تۋىندى «Love story» باللاداسى ءۇشىن ءساتجان شامەنوۆ, اۆتورلىق اسپاپتىق شىعارما (كۇي) «بەس پەرىشتە» كۇيى ءۇشىن اسىلبەك كەنىگەسوۆ لايىق دەپ تانىلدى.
«ۇزدىك دراماتۋرگيالىق تۋىندى» نوميناتسياسىن درامالىق تەاترلارعا ارنالعان تاريحي نەمەسە زاماناۋي تاقىرىپتاعى پەسا «زور بىلگامەش ءھام قورقىت اتا» شىعارماسى ءۇشىن اسىلبەك يحسانوۆ, بالالار مەن جاسوسپىرىمدەر اۋديتورياسىنا ارنالعان پەسا «قاشقىن» شىعارماسى ءۇشىن قۋانىش جيەنباي الدى.
قازاقستان رەسپۋبليكاسى مادەنيەت جانە سپورت مينيسترلىگىنىڭ 2 ارنايى جۇلدەسىنىڭ يەگەرلەرى: جاڭاباي وتەگەنوۆ «تۇركىستان» ءانى, عالىمبەك يسىمبەرگەنوۆ «مەيىرىم كەرەك» ءانى.