قازۇۋ وقىتۋشىلارى تۇركيادا تاعىلىمدامادان ءوتىپ جاتىر

14-21 جەلتوقسان ارالىعىنا جوسپارلانعان ساپار اياسىندا 50-گە جۋىق وقىتۋشى-پروفەسسورلار اقتەڭىز, ءبىلىم ۋنيۆەرسيتەتتەرىنىڭ قىزمەتىمەن تانىسىپ, بىلىكتىلىك ارتتىرادى.

دەلەگاتسيا قۇرامىندا كومەندانت, ءىس باسقارماسى, وندىرىستىك تسەح, كىتاپحانا, ارت ورتالىعىنىڭ قىزمەتكەرلەرى, IT ماماندار مەن جۋرناليستەر بار.

اقتەڭىز ۋنيۆەرسيتەتى – تۇركياداعى جەتەكشى جوعارى وقۋ ورىندارىنىڭ ءبىرى. تۇركيادا اكادەميالىق زەرتتەۋلەر نەگىزىندە جازىلعان عىلىمي ماقالالار بويىنشا اقتەڭىز ۋنيۆەرسيتەتى ۇزدىك بەستىككە كىرەدى.

جەرورتا تەڭىزىنىڭ جاعالاۋىندا ورنالاسقان ۋنيۆەرسيتەت كامپۋسىندا 250-دەن اسا عيمارات بار. ءبىلىم ورداسىنىڭ عىلىمي-تەحنولوگيالىق بازاسى جوعارى مۇمكىندىكتەرگە يە. سونداي-اق لوگيستيكالىق كوممۋنيكاتسياسى جولعا قويىلعان.

قازۇۋ ۇجىمى تۇرىك جوعارى ءبىلىم بەرۋ جۇيەسىمەن ەتەنە تانىسىپ, وقۋ ۇدەرىسىن ۇيىمداستىرۋ بويىنشا تاجىريبە الماسادى. سونىمەن قاتار زاماناۋي ءبىلىم بەرۋ, يننوۆاتسيالىق ازىرلەمەلەر مەن وقىتۋداعى وزىق تەحنولوگيالار تاقىرىبىندا ترەنينگتەرگە قاتىسادى. سونداي-اق ءىسساپار بارىسىندا بىرلەسكەن ءبىلىم بەرۋ باعدارلامالار مەن جوبالاردى ىسكە اسىرۋ بويىنشا ارىپتەستىكتى ودان ءارى نىعايتۋ كوزدەلۋدە.

قازۇۋ دەلەگاتسياسىمەن كەزدەسۋدە اقتەڭىز ۋنيۆەرسيتەتىنىڭ دەنساۋلىق ساقتاۋ سالاسىن باسقارۋ ءىسى كافەدراسىنىڭ مەڭگەرۋشىسى مۇستافا چوبان ءسوز سويلەپ, الداعى ۋاقىتتا دا قازۇۋ مەن اقتەڭىز ۋنيۆەرسيتەتى اراسىندا بىرلەسكەن جوبالار جۇزەگە اساتىنىن جەتكىزدى.

«اقتەڭىز ۋنيۆەرسيتەتى – تۇركياداعى ەڭ ۇلكەن ۋنيۆەرسيتەت. ءال-فارابي اتىنداعى قازاق ۇلتتىق ۋنيۆەرسيتەتىمەن الداعى ۋاقىتتا ستۋدەنتتەرگە عىلىمي جەتەكشىلىك ەتەتىن كوپتەگەن اۋقىمدى جوبالاردى جۇزەگە اسىرۋدى جوسپارلاپ وتىرمىز. ماسەلەن, اقتەڭىز ۋنيۆەرسيتەتى مەديتسينا سالاسىندا اۋقىمدى جەتىستىكتەرگە يە, سۇيەككە, بەتكە پلاستيكالىق وتا جاساۋ مىقتى جولعا قويىلعان. ءتىپتى, پلاستيكالىق وتا ارقىلى بەدەۋلىككە ۇشىراعان ايەلدەرگە انا بولۋ باقىتىن سىيلايدى. تۋبەركۋلەزدى زەرتتەيتىن ارناۋلى ورتالىق جۇمىس ىستەيدى», دەدى مۇستافا چوبان.