«الاتاۋ جاستارى» تۇرعىن ءۇي باعدارلاماسىنىڭ قارجىلاندىرىلۋى 3,6 ملرد تەڭگەگە ارتادى. بۇل تۋرالى الماتى وبلىسىنىڭ اكىمى مارات سۇلتانعازيەۆ «زاڭعار» جاستار سىيلىعىن سالتاناتتى تابىستاۋ راسىمىندە ايتتى, دەپ حابارلايدى Egemen.kz.
بيىل الماتى وبلىسىندا جاستاردى تۇرعىن ۇيمەن قامتاماسىز ەتۋ ءۇشىن «الاتاۋ جاستارى» باعدارلاماسى ىسكە قوسىلدى. ول بويىنشا اكىمدىك «وتباسى بانكپەن» كەلىسە وتىرىپ, وبلىس كولەمىندە العاشقى جارناسىز 60 پاتەر ساتىپ الۋ ماقساتىندا 600 ملن تەڭگە قارجى قاراستىرعان بولاتىن.
«وسى تىڭ جوباعا قاتىسۋ ءۇشىن 1374 ءوتىنىم كەلىپ ءتۇستى. بۇل وتە ۇلكەن كورسەتكىش. سول سەبەپتى, كەلەسى جىلى «الاتاۋ جاستارى» باعدارلاماسىن جۇزەگە اسىرۋعا قاراجات كولەمى 3,6 ملرد تەڭگەگە دەيىن كوبەيتىلدى. بۇل قارجى 200 پاتەر الۋعا مۇمكىندىك بەرەدى», دەدى مارات سۇلتانعازيەۆ.
سونداي-اق وبلىس باسشىسى الەۋمەتتىك سالانىڭ ىشىندەگى ءتۇرلى باعىتتاردى دامىتۋ ءارى جاستاردى قولداۋ ءۇشىن الماتى وبلىسىندا بىرقاتار باعدارلاما ىسكە قوسىلعانىن ايتتى. مىسالى, 2022 جىلى العاش رەت جاستاردىڭ بيزنەس, عىلىم, مەديا, مادەنيەت سالالارىنداعى باستامالارىن قولداۋ ماقساتىندا «تاۋەلسىزدىك ۇرپاقتارى» جوباسىن ىسكە اسىرۋ ءۇشىن وبلىستىق بيۋدجەتتەن 15 ملن تەڭگە ءبولىنىپ, 15 گرانت تاعايىندالدى. ال جاستار اراسىندا كاسىپكەرلىكتى دامىتۋ ماسقاتىندا 2500 ادام «باستاۋ بيزنەس» باعدارلاماسى بويىنشا وقىپ, 382-ءسى گرانت الدى.
«مۇنان بولەك, «ديپلوممەن – اۋىلعا» باعدارلاماسىنىڭ اياسىندا بيىل وبلىسىمىزدا 631 جاس مامانعا 193 ملن تەڭگەگە كوتەرمە جاردەماقى تولەنسە, 319 مامان تۇرعىن ءۇي ساتىپ الۋ ءۇشىن 1,5 ملرد تەڭگەگە جەڭىلدەتىلگەن نەسيە الدى. جاس مامانداردى كاسىبي ەڭبەك جولىنا دايارلاۋدى كوزدەيتىن «جاستار تاجىريبەسى» باعدارلاماسىنا بيىل 902 جاس ازامات قاتىستى», دەدى وبلىس اكىمى.