باسقا جاقتىڭ بالالارى قانداي ەكەنىن كىم ءبىلسىن, الماتىنىڭ بالالارىنىڭ جۇتپايتىنى جوق. جىل باسىنان بەرى بالالار شۇعىل مەديتسينالىق كومەك كورسەتۋ ورتالىعىنا اسقازان-ىشەك جولدارىنا بوگدە زات تۇسكەن 125 بالا, تىنىس جولدارىندا بوتەن زات تۇرىپ قالعان 32 بالا ءتۇستى. كوبىنەسە بالالار تيىن, باتارەيكا, كىشكەنتاي ويىنشىقتاردى جۇتىپ قويادى.
وسى جولى دارىگەرلەر ءۇش جاسار بالانىڭ اسقازانىنان شىناشاقتاي «باتارەيانى» وپەراتسياسىز الىپ تاستادى. «شىناشاقتاي» باتارەيا دەپ ماماندار ايتىپ وتىر. شىن مانىندە, بۇل بالا اسقازانى ءۇشىن بارماقتاي ۇلكەن زات. قولىندا ءۇش جاسار بالاسى بار اكە-شەشە بالالار شۇعىل مەديتسينالىق كومەك كورسەتۋ ورتالىعىنا جەتكىزىلدى. ءسابيدىڭ اناسىنىڭ ايتۋىنشا, بالاسى قولىنداعى باتارەيانى اۋزىنا سالىپ, جۇتىپ قويعان.
ارينە, فگدس زەرتتەۋى – اسقازاننىڭ تومەنگى جاعىندا شىناشاقتاي بوگدە زاتتىڭ بار ەكەنىن كورسەتتى. بالالار جەدەل جاردەم ءبولىمىنىڭ دارىگەرلەرى بالانىڭ دەنەسىنەن قاۋىپتى زاتتى شىعارۋدى دەرەۋ قولعا الۋعا ءماجبۇر بولدى. ويتكەنى بالادا باتارەيانى جۇتقاننان كەيىن بىرنەشە ساعات ىشىندە قابىنۋ پروتسەسى باستالادى. بۇل اسقازاننىڭ نەمەسە وڭەشتىڭ شىرىشتى قابىعىنىڭ كۇيىپ كەتۋىنە, ءتىپتى وسى اعزانىڭ پەرفوراتسياسىنا اكەلۋى ابدەن مۇمكىن.
«بوتەن زاتتى شىعارۋ كەزىندە قايتا-قايتا وڭەشتىڭ جوعارعى ۇشتەن ءبىر بولىگىنەن, ءدال جوعارعى فيزيولوگيالىق تارىلۋ ايماعىندا سىرعىپ كەتە بەردى. سودان ءبىز باتارەيانى جوعارعى بولىككە جەتكىزىپ, ونىڭ ارتىنا فولەي كاتەتەرىن قويۋدى شەشتىك. بوتەن دەنە دورميا كارزەڭكەسىنىڭ (ەندوسكوپيالىق پروتسەدۋرالار كەزىندە قۋىستاعى تاستار مەن ءتۇرلى بوگدە دەنەلەردى الىپ تاستاۋعا ارنالعان قۇرال) كومەگىمەن الىندى. سودان كەيىن فولەي كاتەتەرى ۇرلەنىپ, ەندوسكوپتىق تۇتىك جانە بوگدە دەنەنى ۇستاپ العان دورميا سەبەتىمەن بىرگە اسقازان مەن وڭەشتەن ءساتتى شىعارىلدى», دەدى بالالار شۇعىل مەديتسينالىق كومەك كورسەتۋ ورتالىعىنىڭ حيرۋرگ-ەندوسكوپيست دارىگەرى مۇرات دۇيسەباەۆ.
بۇل جولى جەدەل مەديتسينالىق كومەك پەن دارىگەرلەردىڭ تاپقىرلىعىنىڭ ارقاسىندا حيرۋرگيالىق وپەراتسيا جاساۋدىڭ قاجەتى بولمادى.
دارىگەرلەر اتا-انالاردان كىشكەنتاي بالالارعا مۇقيات بولۋدى, نارەستە وينايتىن زاتتارعا نازار اۋدارۋدى سۇرايدى. بالالاردىڭ قولىنا تۇسكەننىڭ ءبارىنىڭ ءدامىن تاتىپ, جەمەيتىن زاتتاردى ۇنەمى اۋزىنا سالا بەرەتىن ادەتىن جۇرتقا ءتۇسىندىرۋدىڭ ءوزى ارتىق. ەسى كىرمەگەن بالا مۇنى قىزىعۋشىلىقتان عانا ەمەس, وزىنە باسقالاردىڭ نازار اۋدارۋى ءۇشىن دە جاسايدى, دەيدى ماماندار.
الماتى