قىزىلوردا. 4 ماۋسىم. ۇلتتىق بىرىڭعاي تەستىلەۋدىڭ ءبىرىنشى كۇنى قىزىلوردا قالاسىندا 30 مەكتەپتىڭ وقۋشىلارى اراسىنان 35 ءبىتىرۋشى «التىن بەلگىنى» قورعاپ شىقتى. بۇل تۋرالى قالالىق ىشكى ساياسات بولىمىنەن حابارلادى.
«ۇلتتىق بىرىڭعاي تەستىلەۋدىڭ ءبىرىنشى كۇنى, ياعني 2 ماۋسىمدا قىزىلوردا قالاسىندا 30 مەكتەپتىڭ تۇلەكتەرى سىناق تاپسىرىپ, 35 تۇلەك «التىن بەلگىنى» قورعاپ شىقتى», - دەلىنگەن حابارلامادا.
ىشكى ساياسات بولىمىندەگى دەرەككوزى سونداي-اق, ەكى وقۋشىنىڭ وسى كۇنى ەڭ جوعارى 122 بالل جيناعانىن باياندايدى. ولار № 11, 136 ورتا مەكتەپتەردى بىتىرۋشىلەر ەكەن. سول سياقتى 169 وقۋشى 100-دەن جوعارى باللدىڭ يەگەرى اتانعان.
تەستىلەۋ قالاداعى قورقىت اتا اتىنداعى قىزىلوردا مەملەكەتتىك ۋنيۆەرسيتەتى مەن «بولاشاق» ۋنيۆەرسيتەتىنىڭ عيماراتتارىندا وتكىزىلدى.
«بولاشاق» ۋنيۆەرسيتەتىندە تەست تاپسىرعان 471 وقۋشىنىڭ ورتاشا بالى 82,2-ءنى قۇرادى. ال قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە سىناققا قاتىسقان 771 تۇلەكتىڭ ورتاشا بالى - 73,1.
بۇگىن, 4 ماۋسىم كۇنى 16 مەكتەپتىڭ تۇلەكتەرى ءبىلىم سىنىندا باق سىناماق.
ەرجان بايتىلەس.
دەرەككوز: قىزىلوردا قالالىق ىشكى ساياسات ءبولىمى.
فوتو: alashainasy.kz.