الەمدىك دودادا جۇلدەلى بولۋ ءۇشىن سپورتشىعا ۇلكەن جۇرەك قاجەت. بۇل – مەكتەپتە وقىپ ءجۇرىپ, ۇلكەن سپورتقا ءۇيىر بولعان وقۋشى ءۇشىن دە باستى مىندەت. مۇنى تالدىقورعانداعى نازارباەۆ زياتكەرلىك مەكتەبىنىڭ شاكىرتتەرى جاقسى تۇيسىنەدى. وعان بىرىككەن اراب امىرلىكتەرىندە دجيۋ-دجيتسۋدەن جەڭىمپاز بولعان جاستار دالەل.
اشىق چەمپيونات ابۋ-دابيدە ءوتتى. اتالعان دوداعا الەمنىڭ تۇكپىر-تۇكپىرىنەن بەس مىڭنان استام سپورتشى قاتىستى. بۇل دودادا ءبىزدىڭ جاس بالۋانداردىڭ دا باعى جاندى. سول بايراقتى باسەكەدە دجيۋ-دجيتسۋدەن اڭسار نەسىپقالي موينىنا التىن تاقسا, كابير ءالىمحانوۆ كۇمىسپەن كۇپتەلدى. ال ايات مامانوۆ قولا مەدالدى قانجىعاسىنا بايلاپ قايتتى.
5-سىنىپ وقۋشىسى اڭسار نەسىپقالي مۇنداي اۋقىمداعى چەمپيوناتقا ءبىرىنشى رەت قاتىسىپ وتىرعان جوق. ول جەڭىسكە جەتەتىنە ەش كۇماندانباعان. جاس سپورتشى وتكەن جىلى ماسكەۋدە دە ونەر كورسەتىپ, جۇلدەگەرلەر قاتارىنان تابىلعان ەدى.
«مەن دجيۋ-دجيتسۋمەن ءتورتىنشى جىل اينالىسامىن. ءتۇرلى جارىستاردا باق سىناپ, ءوزىمدى كورسەتتىم. بۇل دودادا بەس جەكپە-جەك وتكىزدىم. مەنىڭ باسەكەلەستەرىم ازەربايجان, يران, ءباا ەلدەرىنەن كەلگەن دجيتسەرلەر بولدى. ءبارىن دە جەڭىپ, التىن مەدالعا قول جەتكىزدىم», دەيدى ا. نەسىپقالي.
ونىڭ جان دوسى 4-سىنىپ وقۋشىسى كابير ءالىمحانوۆ ەكىنشى ورىندى مىسە تۇتسا دا, ءالى تالاي جەڭىسكە جەتەرىنە سەنىمدى. حالىقارالىق چەمپيوناتقا العاش رەت قاتىسىپ وتىرعان ول, ۇزدىك ۇشتىكتەن كورىنۋدىڭ ءوزى ۇلكەن جەتىستىك ەكەنىن جەتكىزدى.
«مەن ۇمىتىلماس ەموتسيالاردى باستان وتكەردىم. وسى جەڭىسىمدى, قۋانىشىمدى اناما ارنايمىن. ءبىزدى دايىنداعان باپكەرلەرىمە ۇلكەن العىسىمدى ايتامىن. قاتتى تىرىستىم, كەلەسى جىلى بۇدان دا جاقسى ناتيجە كورسەتەمىن دەگەن ۇمىتتەمىن», دەيدى ك. ءالىمحانوۆ.
ال موينىنا قولا تاعىپ, جەتىسۋلىقتاردى جەلپىنتكەن ايات بولسا ءسال دايىندىقتىڭ ازداۋ بولعانىن جاسىرمادى. ول دا كەلەر جىلى ءانۇرانىمىزدى شىرقاتۋعا اسىق.
ء«بىزدىڭ وقۋشىلاردىڭ حالىقارالىق ارەناداعى ونەرى قازىردىڭ وزىندە ۇلكەن جەتىستىك دەپ ەسەپتەيمىن. ارىپتەسىم ەرنۇر نۇرمۇحانوۆ ەكەۋمىز بارىنشا ۇزدىك ناتيجەگە ۇمتىلامىز. سوندىقتان دجيۋ-دجيتسۋدەن مەكتەپتەگى دايىندىقپەن قاتار, بالالار اپتاسىنا ەكى رەت قالانىڭ سپورت سەكتسيالارىندا جاتتىعادى. بۇل چەمپيوناتتا ءبىزدىڭ ءجاسوسپىرىم جىگىتتەر تاجىريبە مەن بولاشاق جەڭىستەرگە موتيۆاتسيا الدى», دەيدى جاتتىقتىرۋشى ايدوس دۇيسەنتاەۆ.
نازارباەۆ زياتكەرلىك مەكتەبىنىڭ دجيۋ-دجيتسۋ ۇيىرمەسى 2013 جىلدان بەرى جۇمىس ىستەيدى. وسى جىلدار ىشىندە تالاي وقۋشى حالىقارالىق, رەسپۋبليكالىق جارىستاردا چەمپيون اتاندى. جارقىن مىسال رەتىندە «Astana Open» حالىقارالىق گرەپپلينگ ءتۋرنيرىنىڭ جەڭىمپازدارى اتانعان ەرنار ومىرزاقوۆ پەن ۆلاديمير كاندى ايتۋعا بولادى.
جەتىسۋ وبلىسى