قازاقستان حالقى اسا ماڭىزدى تاڭداۋ جاسادى. ءبىز ەلىمىزدىڭ بولاشاعىن ايقىنداپ, ساياسي جانە الەۋمەتتىك-ەكونوميكالىق سالاداعى وزگەرىستەردى ودان ءارى جالعاستىرۋدا جاڭا قازاقستاندى قۇرۋعا تىكەلەي ىقپال ەتەتىن شەشۋشى كەزەڭدە تۇرمىز. وسىنداي سىن ساتتە ەل باسقارۋ ءىسىن پاراساتتى, تاجىريبەلى, سەنىمدى جانە حالىق قامىن ويلايتىن ادامعا تاپسىردىق. بۇل – ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى جۇزەگە اسىرۋ ءۇشىن اسا قاجەت.
حالىقتىڭ ق.توقاەۆتىڭ الەۋمەتتىك-ەكونوميكالىق جانە ساياسي سالاداعى رەفورمالارى, ەلدىڭ ءال-اۋقاتىن جاقسارتۋعا باعىتتالعان باستامالارى تابىستى بولاتىنىنا ۇلكەن ءۇمىت ارتىپ وتىرعانى ءسوزسىز. ەل ەڭ الدىمەن, مەملەكەت باسشىسىنىڭ اشىق ءارى ءادىل قوعام ورناتۋ جونىندەگى باستامالارىن تولىقتاي قولدايدى.
بىرىنشىدەن, كونستيتۋتسيالىق رەفورما ەلدەگى تۇبەگەيلى ساياسي جاڭعىرۋدىڭ نەگىزىن قالادى. وزدەرىڭىز بىلەتىندەي, حالقىمىز بيىل 5 ماۋسىمدا وتكەن جالپىۇلتتىق رەفەرەندۋمدا كونستيتۋتسياعا ەنگىزىلگەن وزگەرىستەر مەن تولىقتىرۋلاردى تولىقتاي قولدادى.
ولاردىڭ ىشىندەگى ەڭ ماڭىزدى – كونستيتۋتسيانىڭ 6-بابىنا ەنگىزىلگەن وزگەرىس. ول ارقىلى ەلىمىزدىڭ اتا زاڭىندا جەر, ونىڭ قويناۋىنداعى بارلىق تابيعي رەسۋرس, وسىمدىكتەر مەن جانۋارلار حالىقتىڭ بايلىعى بولىپ تابىلاتىنى بەكىتىلدى. باسقاشا ايتقاندا, حالىق ەلىمىزدەگى جەردىڭ, ونىڭ قويناۋىنداعى بارلىق بايلىقتىڭ يەسى. بۇل قۇقىقتى حالىقتىڭ اتىنان مەملەكەت جۇزەگە اسىرادى. ءاربىر قازاقستاندىق جەرىمىزدىڭ جانە ونىڭ قويناۋىنداعى بايلىقتىڭ يگىلىگىن كورۋگە مۇمكىندىك الادى. بۇل قۇر ءسوز ەمەس ەكەنىنە بارشامىز كۋا بولىپ وتىرمىز. پرەزيدەنت بيىل 1 قىركۇيەكتەگى جولداۋىندا اتالعان نورمانىڭ جۇزەگە اسىرىلۋىنىڭ ناقتى تەتىگىن ۇسىندى.
مەملەكەت باسشىسى ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋدى ۇسىندى. قارجى ءار بالا 18 جاسقا تولعانعا دەيىن اۋدارىلىپ تۇرادى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالماق. بۇل باستاما 2024 جىلعى 1 قاڭتاردان جۇزەگە اسىرىلادى.
پرەزيدەنتىمىزدىڭ تاعى ءبىر ماڭىزدى باستاماسى – «سامۇرىق-قازىنا» قورى تازا پايداسىنىڭ كەمىندە 7 پايىزى جىل سايىن «قازاقستان حالقىنا» قوعامدىق قورىنا اۋدارىلادى.
ەكىنشىدەن, سىبايلاس جەمقورلىققا قارسى كۇرەس سالاسىندا قابىلدانىپ جاتقان شەشىمدەر مەن ءىس-قيمىلداردىڭ ناتيجەسى. بۇل باستامالار تامىر-تانىستىق پەن رۋشىلدىقتى تۇبەگەيلى جويىپ, «پاراسىز قوعام» قۇرۋعا ىقپال ەتەتىنىنە سەنىمدىمىن. بۇعان كونستيتۋتسيالىق رەفورما اياسىندا قابىلدانعان نورمالار كەپىلدىك بەرەدى.
مەملەكەت باسشىسىنىڭ وكىلەتتىك مەرزىمىندە ساياسي پارتيالاردا بولۋىنا تىيىم سالىنادى. پرەزيدەنت بۇل نورمانى ىسكە اسىرۋدى ءبىرىنشى وزىنەن باستادى, مۇنداي نورمانىڭ ءالى كۇشىنە ەنگەنىن كۇتپەستەن ق.توقاەۆ «Amanat» پارتياسىنىڭ قاتارىنان شىعاتىنىن جاريا ەتتى.
پرەزيدەنتتىڭ جاقىن تۋىستارىنا مەملەكەتتىك ساياسي قىزمەتشىلەر مەن كۆازيمەملەكەتتىك سەكتور سۋبەكتىلەرىنىڭ باسشىلارى لاۋازىمدارىن اتقارۋعا تىيىم سالىنادى. وسى نورما ارقىلى كوررۋپتسيا مەن تامىر-تانىستىقتىڭ تامىرىنا بالتا شابىلادى دەپ ۇمىتتەنەمىن. جۇمىسقا ورنالاسۋدا, بيزنەس اشۋدا جانە كەز كەلگەن ازامات ءۇشىن ماڭىزدى ماسەلەنى شەشۋدە پروتەكتسيونيزم دەگەن ۇعىمنىڭ جوعالۋىنا ىقپال ەتەدى.
مەملەكەت باسشىسىنىڭ تاعى ءبىر جاقسى باستاماسى – سىبايلاس جەمقورلىقپەن كۇرەس باعىتىنداعى ءىس-شارالار. پرەزيدەنتتىڭ تاپسىرماسىمەن جەمقورلاردان الىنعان قارجى مەكتەپ سالۋعا جۇمسالاتىن بولدى. بۇگىنگى تاڭدا رەسپۋبليكا بويىنشا شامامەن 100 ملرد تەڭگە كولەمىندەگى قاراجات جايىندا ايتىلىپ وتىر.
ۇشىنشىدەن, پرەزيدەنت جاڭا, ادىلەتتى قازاقستان قۇرۋ جولىندا حالىقتىڭ, ءاربىر ازاماتتىڭ ءال-اۋقاتى مەن تۇرمىس-تىرشىلىگى ءبىرىنشى ورىنعا قويادى. بۇعان قاتىستى وزگەرىستەردى مەملەكەت باسشىسى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا جاريا ەتتى.
حالىقتىڭ ءال-اۋقاتىن جاقسارتۋداعى كەلەسى ماڭىزدى قادامنىڭ ءبىرى – حالىقتىڭ بەلگىلى ءبىر توپتارىنا ارنايى تولەماقى نەگىزىندە قولداۋ كورسەتۋ. مەملەكەت باسشىسى جولداۋىندا 2023 جىلعى 1 قاڭتاردان باستاپ بالا كۇتىمى ءۇشىن تولەماقى تولەۋ مەرزىمىن ءسابي ءبىر جارىم جاسقا تولعانعا دەيىن ۇزارتىلاتىنىن اتاپ ءوتتى. وسى ورايدا, ايتا كەتەتىن جايت, 2023 جىلعا ارنالعان رەسپۋبليكالىق بيۋدجەت جوباسىندا الەۋمەتتىك سالانىڭ شىعىستارى 2022 جىلمەن سالىستىرعاندا 1 779,3 ملرد تەڭگەگە ۇلعايتۋ كوزدەلگەن.
ق.توقاەۆ جاريا ەتكەن باستامالاردىڭ باسىم بولىگى ءبىلىم بەرۋ سالاسىنا باعىتتالعان. بۇل رەتتە, اۋىل جانە قالا مەكتەپتەرى اراسىنداعى ايىرماشىلىق ازايتىلىپ, ولاردىڭ مازمۇندىق جانە تەحنيكالىق دەڭگەيى تەڭەستىرىلەدى. 2025 جىلعا دەيىن 800 مىڭ بالانىڭ زاماناۋي مەكتەپتە وقۋىنا جاعداي جاسالماق. وسىلايشا, اپاتتى جاعدايداعى جانە ءۇش اۋىسىممەن وقيتىن مەكتەپ ماسەلەسى تولىق شەشىلەدى.
بۇل باستامانى جۇزەگە اسىرۋ ءۇشىن 2023-2025 جىلدارعا ارنالعان رەسپۋبليكالىق بيۋدجەت جوباسى اياسىندا «جايلى مەكتەپ» جاڭا پيلوتتىق ۇلتتىق جوباسى دايىندالعانى بەلگىلى. جوبا شەڭبەرىندە ءۇش جىلدىق مەرزىمدە جالپى سوماسى 2 606,6 ملرد تەڭگەگە 504 مەكتەپ سالۋ جوسپارلانىپ وتىر.
بۇل – جاڭا, ادىلەتتى قازاقستاندى قۇرۋ جولىندا پرەزيدەنت باستاماسىمەن جۇزەگە اسىرىلىپ جاتقان وزگەرىستەردىڭ بولىگى عانا. مەملەكەت باسشىسى ق.توقاەۆ «مەملەكەتتىڭ باستى مىندەتى – وتانداستارىمىزدىڭ يگىلىگى مەن تۇرمىس ساپاسىن قامتاماسىز ەتۋ. ءادىل باسەكەنى دامىتۋ, شاعىن جانە ورتا بيزنەستى قولداۋ» دەپ, ەلدى باسقارۋدا حالىقتىڭ تۇرمىس-تىرشىلىگىن جاقسارتۋ ماسەلەسىن ءبىرىنشى ورىنعا قوياتىنىن اتاپ ءوتتى.
مۇنىڭ بارلىعى ق.توقاەۆتىڭ مەملەكەتتىك باسقارۋ سالاسىندا ءبىلىمى مەن تاجىريبەسى مول, حالىقتىڭ سەنىمىن العان, كاسىبي ديپلومات, بيلىك جۇرگىزۋدە حالىقتىڭ مۇڭ-مۇقتاجىن ءبىرىنشى ورىنعا قوياتىن تۇلعا ەكەنىنىڭ دالەلى.
عاني تاشقاراەۆ,
ءماجىلىس دەپۋتاتى